Ko Hotau Ngaahi ʻApí, Hotau Ngaahi Fāmilí
Ko e Tāpuakí ʻa e Ngaahi Faingataʻá
ʻOku nofo ʻa e tokotaha naʻá ne faʻú ʻi Nuʻu Sila.
Ko e ngaahi meʻa ne u fakakaukau ko e ngaahi faingataʻa ʻo e mali temipalé, ne hoko ia ko ha ngaahi tāpuaki fakaʻofoʻofa.
Ne u talanoa mo ha kaungāmeʻa lelei kau ki he ngaahi tāpuaki ʻo e mali ʻi he temipalé. Ne u fakakata ʻo pehē ange ʻoku siʻisiʻi pē e ngaahi tāpuakí ka ʻoku lahi e ngaahi faingataʻa ʻoku ou fakakaukau ki aí. Naʻá ne pehē, “Mahalo ko e ngaahi tāpuakí ʻena ia!”
Ne u ʻilo ʻoku moʻoni ia.
Kuo tāpuekina au ʻe he sila ʻi he temipalé ʻaki ha fakakaukau taʻe ngata ki he nofomalí mo e fāmilí. Kuo hoko ʻa ʻeku ngaahi fuakava he temipalé ko e “sioʻata” ʻoku ou mamata ai mo hoku husepānití ki he ngaahi fili ʻokú ma fetaulaki mo ia ʻi heʻema hoko ko ha ongomeʻa mali foʻou kei talavou.
Ko ha Fakakaukau Taʻengata
Ne ma kamata ʻema nofomalí ʻaki ha fakakaukau taʻengata, peá ma ongoʻi ʻoku ʻuhinga ia ʻoku ʻikai totonu ke ma fakatoloi pe fakangatangata ʻa e fānau ʻe haʻu ki homa fāmilí. Ne hoko atu e ako (teʻeki maʻu ha mataʻitohi) hoku husepānití lolotonga e tupu tokolahi homa fāmilí. Ka ʻi heʻene ngāue taimi kakató, ne toko nima ʻema fānaú. Ne hoko atu ʻeku akó ka naʻe ʻikai taimi kakato kae lava pē ke u tokangaʻi ʻema fānaú ʻi ʻapi. ʻOku ou manatu melie ki he ngaahi fuofua taʻu ko iá. Naʻa nau fakafiefia moʻoni! Ne mau nofo ʻi ha kiʻi loki mo ʻema fānau ʻe toko ua teʻeki māhina ʻe 15, pea moʻui ʻi ha kiʻi paʻanga tokoni ki he kau akó pea lahi kai kakanoʻi manu momosí (hemipēká).
ʻOku ou fakakaukau ki he ngaahi fuofua taʻu ko iá ko ʻema ngaahi taʻu paioniá—naʻá ma kolosi ʻi he “ngaahi potu tokalelei” ʻo e ako ʻi he akoʻanga māʻolunga angé, kamata homa fāmilí, pea moʻui ʻi ha kiʻi maʻuʻanga tokoni fakapaʻanga siʻisiʻi. ʻOku faitatau ʻeku ongó—ki ha kiʻi konga—ʻo e lea ha tokotaha ne moʻui mei he kau toho saliote ʻa Mātiní: “Ne hau e tokotaha kotoa ʻo kitautolu mo ha ʻilo pau ʻoku moʻui ʻa e ʻOtuá he kuo tau maheni mo ia ʻi heʻetau aʻu ki he tumutumu ʻo e faingataʻá.”1
ʻI he vakai ʻa e māmaní, ne ʻikai ʻuhingamālie ʻa e fili naʻá ma fai ʻi he ngaahi fuofua taʻu ko ia ʻo ʻema nofomalí. Mahalo ne ngali vale hono fakatoloi ʻeku ʻosi mei he akó ke maʻu ha fānau, moʻui ʻi ha maʻuʻanga paʻanga pē ʻe taha, pea hangē ʻoku ngalivalé ʻa hono feilaulauʻi ʻo e ngaahi meʻa fakafiefia ʻe niʻihi. Ka naʻe fakahā ʻe he ʻEikí kia ʻĪsaia:
“He ʻoku pehē ʻe [he ʻEikí] ʻoku ʻikai ko hoʻomou ngaahi mahaló ʻa ʻeku mahaló, pea ʻoku ʻikai ko homou ngaahi halá ʻa hoku ngaahi halá.
“He ʻoku hangē ʻoku māʻolunga hake ʻa e ngaahi langí mei he māmaní, ʻoku pehē hono māʻolunga ʻo hoku ngaahi halá, pea mo ʻeku mahaló ʻi hoʻomou ngaahi mahaló” (ʻIsaia 55:8–9).
Kuo hoko ʻa hono feilaulauʻi ʻa e ngaahi taumuʻa fakaemāmaní ke muimui ki he finangalo ʻa e Tamai Hēvaní ki homau fāmilí ko ha tāpuaki fakatupu loto fakatōkilalo ʻi heʻemau moʻuí.
Fehangahangai mo e Ngaahi Faingataʻá Fakataha
ʻOku tau lau ʻi he Tokāteline mo e Ngaahi Fuakavá ko kinautolu kotoa pē “ʻoku loto-fiemālie ke tauhi ʻa ʻenau ngaahi fuakavá ʻi he feilaulaú … ʻoku tali ʻa kinautolu [ʻe he ʻEikí].
“He ko au, ko e ʻEikí, te u pule ke nau fakatupu mai ha fua ʻo hangē ko ha ʻakau fua lahi, ʻa ia kuo tō ʻi ha kelekele lelei, ʻi ha veʻe vaitafe maʻa, ʻa ia ʻoku fua ʻaki ʻa e fua lahi ʻoku mahuʻinga lahi” (T&F 97:8–9). Ko ʻema fānau ʻe toko nimá ʻema fua mahuʻinga tahá. ʻOku nau hoko moʻoni ko ʻema tāpuaki maʻongoʻonga tahá.
ʻI he ʻalu ʻa e ngaahi taʻú, kuó u fehangahangai mo hoku husepānití mo ha ngaahi faingataʻa ʻi heʻema nofomalí, pea ʻi heʻeku fakakaukau ki aí te u pehē ʻoku ou houngaʻia moʻoni ai. ʻOku tāpuekina kitautolu ʻe he ʻEikí ʻaki ha ngaahi faingataʻa ke siviʻi fakafoʻituitui kitautolu pea tokoniʻi ke tau tafoki kiate Ia mo hotau hoá.
Ko e mali temipalé ʻa e fuakava taupotutaha ʻo e hakeakiʻí. ʻI he taimi ʻoku tauhi ai e fuakava ko ʻení, ʻoku fakatau ki he tuʻunga maʻolunga taha ʻi he puleʻanga fakasilesitialé, pe moʻui taʻengatá, ʻo ʻuhingá ke tupulaki ʻo taʻe ngata (vakai, T&F 131:1–4). Koeʻuhí ko e pale maʻongoʻonga ko ʻení, ʻoku totonu ke tau ʻamanaki atu ke fakatupulaki kitautolu ʻe ha mali temipale, ke liliu hotau natulá.
Naʻe pehē ʻe ʻEletā Pulusi C. Heifeni, ko ha mēmipa mālōlō ʻo e Kau Fitungofulú: “Mahalo te tau kamata ʻaki e mali pē ke fiemālie. Ka ʻoku hoko mai leva e ngaahi palopalemá. Kapau te tau feinga fakamātoato ke fakaleleiʻi kinautolu mahalo, he ʻikai pē ke tau ongoʻi fiemālie, ka te tau tupulaki. Te tau iku mali ʻo ʻikai ke fiemālie ka ke fiefia.”2 ʻOku ʻikai fiemālie maʻu pē ʻa hono fakaleleiʻi fakataha ʻema ngaahi palopalemá, ka ʻokú ne ʻomai moʻoni ha fiefia.
Ngāue Mālohí mo e Fiefiá
Ko e hoko ko ha faʻeé, ʻa e meʻa faingataʻa taha kuó u faí. Kimuʻa pea maʻu ha fānaú, ne u pehē ko e tuʻunga fakafaʻeé ʻe lahi fakafiefia, kapau ʻe ʻikai hoko maʻu pē—pea ʻi ai ha ngāue lahi ʻe taha pe ua. Ka kuo mahino kiate au ʻoku tuʻu fehangahangai ia. Koeʻuhí ko ʻeku hoa ngāue taʻengata mo hoku husepānití, kuo hoko hoku tuʻunga fakaemātuʻá mo e nofomalí ko ha akoʻanga ki he hoko ʻo hangē ko e Tamai Hēvaní. ‘Oku fakatatau ‘a e fatongia fakaemātuʻa ʻi he moʻui ní ki he ngāue mo e ngaahi taumuʻa ʻa ʻetau Tamai Hēvaní, “ke fakahoko ʻa e moʻui taʻe-faʻa-maté mo e moʻui taʻengata ʻa e tangatá” (Mōsese 1:39). ʻOku fie maʻu ʻi he hoko ko ha uaifi mo e faʻeé ha kātaki fakalangi, mālohi mo e ʻofa. ʻOku tokoni mai ʻa e hoko ko ha faʻeé ke u hoko ʻo tatau ange mo e ʻOtuá ʻi he natula, holi mo e meʻa ʻe malavá.
Kuo tāpuekina au ʻe he sila he temipalé ʻi ha ngaahi founga taʻe ʻamanekina. Ko ha maʻuʻanga mālohi kiate au pea mo ha meʻa fokotuʻumaʻu ki heʻeku fānaú. Ko ha fehokotakiʻanga mālohi ki heʻeku ngaahi kuí pea tāpuekina kinautolu ʻi heʻeku fai ʻenau ngāue fakatemipalé. ʻOku ʻaonga e feilaulau kotoa pē ki heʻeku mali temipalé, pea ʻoku ou ʻilo ʻokú ne ʻomai ha ngaahi tāpuaki maʻongoʻonga.
Maʻu e taá ʻi he angalelei ʻa Rachel Harrison