Ngaahi Fehuʻi mo e Talí
“Ko e hā ‘a e meʻa oku totonu ke u fakakaukau ki ai lolotonga ‘a e sākalamēnití?”
Neongo ʻoku tau tuʻu ko e kau fakamoʻoni ʻo Sīsū Kalaisi ʻi he taimi kotoa, ʻi he ngaahi meʻa kotoa, pea ʻi he feituʻu kotoa (vakai, Mōsaia 18:9), ko e taimi ʻe niʻihi ʻoku feʻauhi ʻa e ivi takiekina ʻo e māmaní ke maʻu ʻetau tokangá. ʻOku ʻomi ʻe he sākalamēnití ha faingamālie ke nofo taha ʻetau fakakaukaú ki he Fakamoʻuí ʻo ʻikai ha hohaʻa.
Lolotonga e sākalamēnití, ʻe lava ke ke fakakaukau ki he ʻuhinga mo e fakaʻofoʻofa ʻo e ouaú. ʻE lava ke tokoni ʻa hono maʻu e fakamanatu ʻo e sino mo e taʻataʻa e Fakamoʻuí ke ke fakakaukau ki Heʻene feilaulau taʻe-fakangatangata mo fakaleleí. ʻI hoʻo maʻu ʻa e sākalamēnití, ʻokú ke fakafoʻou ai hoʻo ngaahi fuakava ʻo e papitaisó. ʻI hoʻo fai iá, te ke lava ʻo toe fakatukupaaʻi koe ke manatu maʻu ai pē kiate Ia mo tauhi ʻEne ngaahi fekaú.
Te ke lava ʻo fakaleleiʻi hoʻo aʻusia ʻi he sākalamēnití ʻaki hono teuteuʻi fakalaumālie koe. Lolotonga e uiké, fakakaukau ke ako ʻa e ngaahi lea ʻo e konifelenisi lahí pe ngaahi potufolofola ʻoku nau tokoniʻi koe ke nofotaha e tokangá ʻi he feilaulau ʻa e Fakamoʻuí pea mo hoʻo ngaahi tuʻunga fakaākongá. Lolotonga ʻa e himi sākalamēnití mo e lotú, tokanga taha ki he ngaahi lea ʻokú ke hivaʻí mo fanongo ki aí, pea fakakaukau atu ki honau ʻuhingá.
Lolotonga e sākalamēnití, tuku ha taimi ke fakakaukau ki he ngaahi liliu ʻokú ke fai ʻi hoʻo moʻui fakatāutahá ke hoko ʻo tatau ange mo Sīsū Kalaisí. Hili hono maʻu ʻi he moʻui taau e sākalamēnití, te ke lava ʻo ongoʻi maʻa mo haohaoa, hangē ko ia naʻá ke maʻu ʻi ho papitaisó.
Fakakaukau ki he Fakaleleí
Lolotonga e sākalamēnití, ʻoku ou fakakaukau kia Sīsū Kalaisi mo ʻEne Fakaleleí. ʻOku faingataʻa kiate au ke fakahaaʻi e ongo ʻoku ou maʻu lolotonga e sākalamēnití ʻi heʻeku fakakaukau ki he Fakalelei ʻo Sīsū Kalaisí. ʻOku ou ʻilo ne fili ʻa Sīsū Kalaisi ke hoko ko hotau Huhuʻí. ʻOku ou ʻilo ʻokú Ne moʻui.
Nīfai B., taʻu 20, Palasavile, Lepupelika ʻo Kongokoú
Fakakaukau kia Sīsū Kalaisi
Lolotonga e sākalamēnití ʻoku ou fakakaukau atu ki he meʻa ne foua ʻe he Fakamoʻuí kae lava ke tau fakatomala mei he fehalaaki kuo tau faí. ʻOku ou fakakaukau foki ki he ngaahi tāpuaki kuó Ne ʻomai mo e ngaahi mana fakaofo kuó Ne ʻosi fai mo ʻamanaki ke fakahokó. ʻOku tau monūʻia fau ke tau lava ʻo maʻu ʻa e sākalamēnití koeʻuhí ke tau lava ʻo fakatomala mei heʻetau ngaahi angahalá pea tukupā ke fai lelei.
ʻEnitī B., taʻu 13, ʻIutā, USA
Fakalaulauloto ki he Ngaahi Lea ʻo e Ngaahi Himi Sākalamēnití
ʻOku akoʻi ʻe he ngaahi himi sākalamēnití e meʻa ʻoku totonu ke tau fakakaukau ki ai lolotonga e sākalamēnití. Hangē ko ʻení, ko e himi sākalamēniti ʻoku ou saiʻia taha aí ko e, “Sīsū Homau Huhuʻi” (Ngaahi Himí, fika 90), ne pehē, “Pea fakatapuʻi, Ki hoʻo pekia mamahi. Fai ʻi Ketisemani, Touʻanga he kolosi.” ʻOku tokoni mai ʻa hono manatuʻi ʻo e ngaahi lea ʻo e himi sākalamēnití lolotonga e ouau toputapu ko ʻení ke u ongoʻi e nonga mo fakatupulaki ʻeku houngaʻia ki he Fakalelei ʻa Sīsū Kalaisí.
ʻOsitini B., taʻu 15, ʻAlapeta, Kānata
Fakamālō ko e Ngaahi Tāpuakí
ʻOku totonu ke tau fakakaukau lolotonga e sākalamēnití ki he maʻongoʻonga e feilaulau ne fai ʻe hotau Fakamoʻuí maʻatautolú pea fakafonu hotau lotó ʻi he houngaʻia. ʻI heʻeku maʻu ʻa e sākalamēnití, ʻoku ou fie fakamālō ki he Tamai Hēvaní mo Hono ʻAlo ʻOfaʻanga ko Sīsū Kalaisí ki he ngaahi tāpuaki kuó u maʻú.
ʻĒleni S., taʻu 16, Palaipa, Palāsila
Manatuʻi pea Fakatokangaʻi
Ko e taumuʻa ʻo e sākalamēnití ke fakafoʻou ʻetau ngaahi fuakava mo ʻetau Tamai Hēvaní pea ke fufulu ʻo maʻa mei he ngaahi angahala kuo tau fakatomala mei aí. Lolotonga e sākalamēnití, ʻoku tau manatuʻi e feilaulau ʻa Kalaisi maʻatautolú pea fakalaulauloto ki he founga ʻoku moʻui ʻaki ʻi heʻetau moʻuí. ʻOku ou feinga ke fakakaukau ki he meʻa ne u fakahoko lolotonga e uike kuo ʻosí mo e tuʻunga lelei ʻoku ʻi ai ʻeku tauhi e ngaahi fuakava mo e Tamaí. ʻOku ou fakatokangaʻi e ngaahi angahala ne u faí pea nofo taha ʻi he founga te u lava ʻo fakaʻaongaʻi ʻa e Fakaleleí ke ikunaʻi kinautolú. ʻI heʻeku fai iá, ʻoku hoko leva ʻa e sākalamēnití ko ha aʻusia langaki moʻui mo ha mālohi fakalaumālie.
ʻApikale P., taʻu 14, ʻAlesona, USA
Tauhi Hoʻo Fakakaukaú mei he Heé
ʻOku ʻi ai haʻaku kiʻi kaati ʻoku mono ʻi heʻeku folofolá ʻoku ou sio ki ai he Sāpate kotoa lolotonga e sākalamēnití. ʻOkú ne fakaʻilongaʻi e Mosaia vahe 18, ʻi hono ʻomai ʻe ʻAlamā e fuakava ʻo e papitaisó. ʻOku ʻi ai ha fanga kiʻi fakamatala iiki ʻi he kātí, hangē ko e “Houngaʻia ko e Fakaleleí,” ʻoku tohi ai ke tokoni mai ke u manatuʻi e taumuʻa mo e māʻoniʻoni ʻo e sākalamēnití ʻOku tokoni mai ʻa hono vakaiʻi e ngaahi fakamatalá ke u tokanga taha ki he taumuʻa mo e māʻoniʻoni ʻo e sākalamēnití.
ʻAlisa M., taʻu 19, Tekisisi, USA
Manatuʻi ʻa e ʻOhomohe Fakaʻosí
ʻOku totonu ke tau fakakaukau ki he feilaulau fakalelei ʻa Sīsū Kalaisí pea mo e mahuʻinga ʻo hono maʻu moʻui taau e fakataipe ʻo Hono sinó mo Hono taʻataʻá. Te tau lava foki ʻo fakakaukau ki he taimi naʻá Ne tāpuakiʻi ai ʻa e maá mo uainé mo ʻEne Kau ʻAposetolo ʻe Toko Hongofulu Mā Uá.
Sōnasi A., taʻu 18, Molēlosi, Mekisikou
Fakakaukau ki Hoʻo Ngaahi Fuakavá
ʻI heʻeku kei siʻí, ko e meʻa pē ʻe taha ne u fakakaukau ki ai lolotonga e sākalamēnití ko e founga ke u fakalongolongo ai. ʻOku ou maʻu ʻeni ʻa e lakanga fakataulaʻeikí, ʻoku mahino kiate au e fie maʻu ke u fakakaukau ki he sākalamēnití lolotonga hono fakahokó ke ʻuhingamālie pea tokoni ke u tupulaki fakalaumālie. ʻOku ou fakakaukau ki he Fakalelei ʻa e Fakamoʻuí mo e founga fakahaaʻi ʻo ʻEne ʻofa kiate kitautolú. ʻOku ou fakakaukau foki ki he founga ʻoku hoko ai ʻa hono maʻu ʻo e sākalamēnití ke fakamālohia ʻeku tuí mo e holi ke fakakakato ʻeku fuakava ʻi he papitaisó.
Levi F., taʻu 19, ʻApaia, Naisīlia