Vahehongofulú mo e Ngaahi Foakí

ʻI hono totongi e vahehongofulú mo e ngaahi foakí ʻe lava ke ako e fānaú, ʻoku tauhi ʻe he ʻEikí ʻEne ngaahi talaʻofá.

ʻI ha fakamatala ʻi he peesi 60–61 ʻo e makasini ko ʻení, ʻoku talanoa ai ʻa ʻEletā ʻAnitoni D. Pēkini ʻo e Kau Fitungofulú kau ki hono akoʻi ia ʻe hono tomuʻa totongi ʻo e vahehongofulú kimuʻa pea fai ha fakamolé ke fakafaikehekeheʻi e holí mei he fie maʻú.

Naʻe pehē ʻe ʻEletā Pēkini, ʻi heʻene tauhi e fekau ko ʻení, “ʻoku mālohi ange ʻeku tuí pehē ki heʻeku holi ke tauhi e ngaahi fekau kehe [ʻa e ʻEikí].” Naʻá ne ʻahiʻahi fakahoko ha tefitoʻi moʻoni ʻoku akoʻi ʻi he Ki hono Fakamālohia ʻo e Toʻu Tupú: “ʻOku mahuʻinga hoʻo tōʻonga fakakaukaú ʻi he totongi vahehongofulú. … Totongi loto fiemālie ia ʻi he loto fakafetaʻi” ([2011], 38).

Ngaahi Fokotuʻu ki hono Akoʻi ʻo e Toʻu Tupú

ʻE lava ke faʻa ako ʻa e toʻu tupú mei he ngaahi sīpinga ʻa e niʻihi kehé. Vakai, “Ko e Ngaahi Tāpuaki ʻo e Vahehongofulú” (Liahona, Māʻasi 2013, 26) ke lau fekauʻaki mo hono tāpuekina ha toko nima fakafoʻituitui koeʻuhí ne nau totongi vahehongofulu. Aleaʻi e founga kuo faitāpuekina ai ʻe he vahehongofulú ho fāmilí. Mahalo te ke fie talanoa kau ki he founga ʻoku tāpuekina ai ʻe he vahehongofulú mo e ngaahi foakí e kāingalotu kotoa ʻo e Siasí.
Fakakaukau ke lau fakataha ʻa e konga kau ki he vahehongofulú mo e ngaahi foakí ʻi he Ki hono Fakamālohia ʻo e Toʻu Tupú (peesi 38–39). Mahalo te ke aleaʻi e founga ʻoku fekauʻaki ai e ʻaukaí mo e foaki ʻaukaí mo e founga totongi foaki ʻaukai ho fāmilí.

Ngaahi Fokotuʻu ki hono Akoʻi ʻo e Fānaú

Fakakaukau ke fakaʻaongaʻi e fakatātā ko ʻení: Hili ha ngaahi sēniti maka ʻe 10 ʻi ha tēpile. Fehuʻi ki he kau mēmipa ʻo e fāmilí pe te nau ongoʻi fēfē kapau te ke talaange te ke ʻoange e sēniti maka ʻe hiva peá ke tauhi pē e taha ke tokoni ki hono langa e puleʻanga ʻo e ʻEikí. Te nau loto fiemālie nai ke tali ha foaki pehē? Te ke lava ʻo fakamatalaʻi leva e faitatau ʻi he tuʻunga ko ʻení mo e fono ʻo e vahehongofulú.
Te ke lava ʻo fakaʻaongaʻi ʻa e konga ko e “Maʻá e Fānau Īkí” ʻi he Liahona ʻo ʻAokosi 2011 (peesi 70–72), ʻoku ʻi ai ha talanoa moʻoni ki ha aʻusia ʻa ha kiʻi tamasiʻi ʻo ne ʻilo ko ha fili lelei ʻa e totongi vahehongofulú—tatau ai pē kapau ko ha koini pē ʻe taha. Te ke lava foki ʻo fakakakato mo hoʻo fānaú e ngaahi ʻekitivitī fekauʻakí.

Tā fakatātā ʻa Taia Morley