Ko ʻEku Fakamatala ʻi he Maka Fakamanatú

Meliʻeni Sepalini Setelō, Kalefōnia, USA

Lolotonga e faʻahitaʻu māfana ʻo e 2003, ne u ʻi Misikeni, USA, ko ʻeku fekumi ki heʻeku faʻētangata ko Lōpeti Holo. ʻI he fakaʻosinga ʻeku fonongá, ne u toe ʻaʻahi ki ha faʻitoka ne u ʻi ai he taʻu ʻe 20 kimuʻá.

ʻI heʻeku ʻaʻahi ki he faʻitoká kimuʻá, ne u fakatokangaʻi ha ngaahi matalaʻi ʻakau ʻi he taha ʻo e ngaahi maka fakamanatú ʻoku fakaiku Holo. ʻI he taimi ko ʻení, ne u hiki ha kiʻi fakamatala, tohi e ʻahó pea fakamilemila ia ke maluʻi mei he ʻeá. Ne u tuku leva e kiʻi fakamatalá ʻi he faʻa lotu he maka fakamanatú, mo ʻamanaki ʻe ʻilo ia ʻe ha taha ʻe lava tokoni mai, ke u ʻilo lahi ange kia Lōpeti Holo. Ne u foki ki Kalefōnia mo e ʻamanaki kae veiveiua ʻe maʻu ha meʻa mei he kiʻi fakamatalá ni.

Ne u tuku leva e kiʻi fakamatalá ʻi he faʻa lotu he maka fakamanatú, mo ʻamanaki ʻe ʻilo ia ha taha ʻe lava tokoni mai.

Hili ha uike ʻe taha, ne u maʻu ha tohi mei ha kāinga mamaʻo ko Tiki Peniteli.

Naʻá ne pehē, “Ne ʻi ai ha meʻa ngali kehe ne hoko ʻaneafi.” “ʻI he 3:00 p.m. ne u ʻalu ke fakatau ha situloapeli peá u pehē ke tuʻu ʻi he Faʻitoka Peleni Loutí ke vakaʻi e ngaahi faʻitoka ʻeku ngaahi kuí. Ne teʻeki ke u toe ʻahia ia ʻi ha ngaahi taʻu lahi. Ne ʻi he vaʻe faʻitoká hoʻo pousikātí.”

Ne ʻalu ʻa Tiki ki he faʻitoká ʻi he ʻaho tatau ne u tuku ai ai e kiʻi fakamatalá. Ne u tā leva ki ai. Lolotonga ʻema talanoá naʻá ku ʻilo naʻá ne nofo ʻi Hilisitele ʻi ha maile ʻe 50 (kilomita ʻe 80) mei he faʻitoká.

Hili ha ngaahi māhina ne u foki loto vēkeveke ki Misikeni ke ʻaʻahi kia Tiki. Naʻá ne talamai ʻoku tanu hano kāinga ʻi he faʻitoka he kauhala ʻe taha mei honau ʻapi, peá ne fehuʻi mai pe ʻoku ou fie ʻalu ki ai. Naʻá ne talamai ʻoku ʻi ai ha maka fakamanatu ʻe fā ʻi he faʻitoka ʻo e kau Holó, naʻe ʻikai ke ne ʻilo ha meʻa ki ha toko ua ai.

Naʻe fakahinohino mai ʻe Tiki e ngaahi maka fakamanatu he faʻitoká. Ko e ua ne ʻikai ʻilo ki aí ko Mātiu mo ʻAna Holo. Naʻe ʻikai ke u ʻomi ʻeku ngaahi lekōtí, ka naʻá ku manatuʻi lelei pē ʻeku fekumi ki ha Mātini Holo.

Ne ma fakatovave atu ki he fale fakamaauʻangá ʻi ha houa ʻe taha kimuʻa pea toki tāpuní, mo e ʻamanaki ki ha lekooti ʻo e pekiá ke ʻilo e mātuʻa ʻa Mātení. Naʻe hoko ia! Ko e tamai ʻa Mātiní ko Lōpeti Holo! Ne fakapapauʻi mai kiate au ʻe he Laumālie Māʻoniʻoní kuo ʻosi ʻeku ngaahi fekumí lōloá.

Naʻe pehē ʻe Tiki ʻoku ʻikai ko ha mēmipa ʻo e Siasí ne hangē ʻoku “meimei fakalaumālié” hono maʻu ʻo Lōpeti Holó. Ne u malimali ʻi hono ʻilo ne tataki au ʻe he Laumālié.

Naʻe pehē ʻe Tiki, “Mahalo naʻá ke mei loto mamahi ko e ʻikai ke ke tuku ho kiʻi fakamatalá he taʻu ʻe 20 kuo hilí, ka ko hono moʻoní ne u toki hiki pē ki Hilisitila he taʻu ʻe tolu kuo hilí!”

Ko ha ako e aʻusia ko ʻení kiate au ko e hisitōlia fakafāmilí ko e konga moʻoni e ngāue ʻa e ʻOtuá pea ʻokú ne tataki kitautolu ʻi heʻetau ngaahi ngāue māʻoniʻoní.