Fautuaga mo Filifiliga Faigata

Sa ta’ua e Peresitene Henry B. Eyring, Fesoasoani Muamua i le Au Peresitene Sili, e uiga i se taimi na ia mulimuli ai i fautuaga faaperofeta. A’o faagasolo se tasi o konafesi aoao, sa uunaia ai e Peresitene Ezra Taft Benson (1899–1994) tagata o le au paia ia o ese mai le aitalafu—ae maise lava o aitalafu e faamaonia i fale [mokesi].

Sa saunoa Peresitene Eyring: “Sa ou faliu atu i lo’u toalua ina ua maea le sauniga ma fesili atu, ‘E te manatu e i ai se auala e mafai ona ta faia ai lena mea?’ I le taimi muamua sa ma lē iloa se auala.” Ae i lena afiafi sa ia mafaufau ai i se la fanua na tausagā e le’i faamanuiaina lava a la’ua taumafaiga e faatau ese atu. “Sa ma faalagolago i le Atua ma le … savali a Lana auauna, [o lea] na ma faia ai se telefoni. … Sa ou faalogoina se tali lea e oo mai i le asō o faamalosia ai pea lo’u faatuatua i le Atua ma Ana auauna.” O le aso lava lena na tuu ai e se tamalii sana ofo i le fanua a le au Eyrings mo se aofaiga sa na o sina mea lava na tele ai nai lo le la mokesi. Sa le’i umi ae saoloto le au Eyrings mai aitalafu (tagai i le “Faalagolago i le Atua, Ona Alu Lea ma Faia, Liahona, Nov. 2010, 72–73).

Atonu e le o i ai sau mokesi e totogi, ae o le fautuaga faaperofeta e mafai ona taialaina ai oe iinei ma le taimi nei i ni faaiuga faigata e faatatau i le galuega, aoga, o se misiona, ma tafaoga faamasani. Ia talanoaina ma lou aiga po o lau tupulaga, e uiga i auala e mafai ona e mulimuli ai i le perofeta pe afai tou te faia ni faaiuga.