Panahon sa Kasulatan

Ang Maayong Magbalantay

Ni Erin Sanderson

Ang tagsulat nagpuyo sa Utah, USA.

Pagkat-on og dungan mahitungod sa Bag-ong Tugon niining tuiga!

Si Jesus misugilon og istorya (o sambingay) mahitungod sa usa ka magbalantay sa karnero kinsa nahigugma pag-ayo sa iyang mga karnero nga iya gani nga ihatag ang iyang kinabuhi sa pagpanalipod kanila. Sama kita sa karnero niana nga istorya. Ug ang magbalantay sama sa atong Manluluwas, nga si Jesukristo. Usahay tawagon Siya ang Maayong Magbalantay.

Gipakita ni Jesus ang Iyang gugma sa dihang ang pipila ka mga ginikanan midala sa ilang mga anak aron makakita Kaniya. Si Jesukristo miingon: “Paduola kanako ang mga bata, ug ayaw ninyo sila pagpugngi: kay ang gingharian sa Dios ila sa mga sama kanila” (Lucas 18:16). Dayon Siya mikugos ug mipanalangin kanila.

Ipiyong ang inyong mga mata ug hunahunaa ang Manluluwas nga nagkugos kaninyo ug mihatag ninyo og panalangin. Mabati ninyo ang Iyang gugma kon kamo magkat-on o maghunahuna Kaniya. Ang Espiritu Santo makatabang ninyo nga mobati sa gugma sa Maayong Magbalantay, nga si Jesukristo.

Pagkat-on pa og Dugang

paduola—tuguti

ayaw ninyo sila pagpugngi—ayaw sila pugngi

Panag-istoryahanay sa Pamilya

Basaha ang Juan 10:1–5, 11–16. Dayon paglista og mga paagi nga si Jesus sama sa magbalantay ug pagsulti og panahon nga inyong gibati ang gugma sa Manluluwas.

Kanta: “Samtang Nagbasa Anang Sugilanong Matahum” (Songbook sa mga Bata, 35)

Mga Kasulatan: Lucas 18:15–17; Juan 10:1–5, 11–16

Mga Video: “Suffer the Little Children to Come Unto Me” ug “Jesus Teaches that We Must Become as Little Children” (Biblevideos.org)

Ang Atong Maayong Magbalantay

Tangtanga kini nga litrato. Pil-a kini sama sa paypay subay sa puti nga mga linya. Dayon ablihi kini ug tan-awa gikan sa tuo ug gikan sa wala. Sa unsa nga paagi ninyo nabati ang gugma sa atong Maayong Magbalantay?

Tip sa Kasulatan

Tan-awa sa “Mga Ebanghelyo” diha sa Giya ngadto sa mga Kasulatan ang tsart nga nagsulti unsa nga basahon ang naghisgot mahitungod sa matag hitabo o pagtulun-an. Ang basahon lang ni Juan ang naghisgot mahitungod sa Maayong Magbalantay. Tulo ka mga basahon—Mateo, Marcos ug Lucas—naghisgot mahitungod sa pagpanalangin ni Jesus sa mga bata.

Mga Paghulagway pinaagi ni Phyllis Luch (wala) ug Paul Mann (tuo)