Unsaon Nato “Pagsangyaw [kabahin] kang Kristo” diha sa Atong Panimalay
Ang tagsulat nagpuyo sa Utah, USA.
“Ug kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala” (2 Nephi 25:26).
Makausa atol sa Pasko sa Pagkabanhaw, ang akong asawa misugyot nga among basahon isip pamilya ang asoy diha sa kasulatan sa katapusang semana sa pagkamortal sa Manluluwas. Kada gabii inig dayong katulog, among basahon ang Bag-ong Tugon ug mopatan-aw sa among mga anak og mubo nga video sa hitabo ug hisgutan ang ilang mga pangutana. Nahingangha ko sa mga pangutana sa among mga anak ingon man usab sa Espiritu nga among nabati atol sa among pagbasa ug mga diskusyon.
Sa pagtapos sa semana, mibati ko og dakong pasalamat ug gugma sa Manluluwas, nakapamalandong pag-ayo sa Iyang sakripisyo ug sa mahangturong sangputanan nga miresulta sa tanan Niyang gisinati para kanato. Uban sa akong mga pagbati, nasayud ko nga ang akong asawa nadasig, ug nabati nako ang mas lalum nga pagsabut ug gugma sa akong mga anak para sa Manluluwas ingon man usab ang mas dakong tinguha sa pagpakita og Kristohanong kinaiya sa usag usa.
Sukad niadto among gidiskobre ang ubang mga paagi aron kami mas “[m]aghisgot kang Kristo” ug mas “[m]agsangyaw kang Kristo” sa among panag-istoryahanay ug mga leksyon, nasayud nga pinaagi sa pagtukod sa among pundasyon diha kang Jesukristo, kami gisaaran nga mas makabuntog sa mga kalisdanan sa kinabuhi (tan-awa sa Helaman 5:12).
Himoa ang Manluluwas nga Maoy Sentro sa Inyong Pagtudlo
Usa sa mga butang nga among nadiskobrehan mao nga kon among ilakip ang ehemplo ug mga pagtulun-an sa Manluluwas sa among mga diskusyon ug inter-aksyon sa pamilya, kini mahimong mas epektibo ug mas mapuslanon. Gamiton ang kasusama nga gitudlo Mismo sa Manluluwas, “Ako mao ang tanom nga parras, kamo mao ang mga sanga: Ang magapabilin kanako, kang kinsa magapabilin ako, mao siya ang magapamungag daghan” (Juan 15:5). Kon atong gamiton kining kasusama sa atong pagtudlo, atong itudlo ang mga baruganan sa ebanghelyo nga dili lahi nga mga ideya apan sumpay sa Pag-ula ni Jesukristo, sama sa gideklarar ni propeta Joseph Smith.1 Mao kini ang paagi nga atong masentro ang Manluluwas sa atong instruksyon ug dili lang tinagsa nga mga baruganan sa ebanghelyo nga atong gipili nga sundon.
Kon ato Siyang himoon nga sentro sa atong instruksyon, kita gisaaran nga maamumahan, malig-on, ug molambo, lakip na ang mga panalangin niini—buot ipasabut, nga ang atong mga diskusyon ug leksyon mas epektibong makakabig ug adunay mga resulta nga molungtad og dugay. Usa ka paagi nga among nadiskobrehan sa pagbuhat niini mao ang pagtudlo og usa ka baruganan sa ebanghelyo ug dayon mangutana sa among mga anak og sama niini “Giunsa ni Jesus pagpakita niining baruganan o pagtulun-an?” o “Unsay gisulti o gitudlo sa Ginoo kabahin niining butanga?”
Ehemplo sa Pagtudlo kabahin sa Pag-ampo
Sama pananglit, kamo nagtudlo sa kaimportante sa pag-ampo. Mahimo ninyong gamiton ang Doktrina ug mga Pakigsaad 10:5, diin kita gimandoan sa “pag-ampo kanunay,” o ang tambag ni Nephi nga ang “dautan nga espiritu dili motudlo sa usa ka tawo sa pag-ampo, apan motudlo kaniya nga siya dili gayud kinahanglan mag-ampo” (2 Nephi 32:8). Kini nga mga kasulatan gamhanang nagtudlo sa doktrina sa pag-ampo. Samtang imo kining gitudlo, siguro makapangutana mo og “Sa unsang paagi ang Manluluwas nag-ampo?” o “Unsa kaha ang pag-ampo sa Manluluwas?” Kon kamo adunay mas gagmayng mga anak, siguro kini inyong mapangutana, “Sa inyong hunahuna unsa kaha ang pag-ampo sa Manluluwas?”
Paggahin og panahon sa paghunahuna og unsaon ni ninyo pagtubag sa personal nga paagi pinaagi sa pagkonsiderar sa mga asoy diha sa kasulatan nga inyong mahunahunaan. Makahunahuna ko dayon sa pagbisita sa Manluluwas ngadto sa Amerika, sa dihang “siya nag-ampo ngadto sa Amahan, ug ang mga butang diin siya nag-ampo dili ikasulat. … Ang mata wala pa makatan-aw, ni ang dunggan makadungog, kaniadto, sa mahinungdanon ug kahibulongan nga mga butang diin kami nakakita ug nakadungog ni Jesus nga nakigsulti ngadto sa Amahan” (3 Nephi 17:15–16).
Sa wala madugay diha sa asoy atong madiskobrehan nga ang mga tawo naningkamot nga gihimong sumbanan ang Iyang pag-ampo ug ang resulta “wala mobalik-balik sa daghan nga mga pulong, kay kini gihatag ngadto kanila unsa ang kinahanglan nga ilang i-ampo, ug sila napuno sa tinguha” (3 Nephi 19:24; emphasis gidugang). Niining puntuha, mahimo ninyong dapiton ang inyong mga anak sa pagpakigbahin og higayon diin sila napuno sa tinguha sa pag-ampo, o kamo mopakigbahin og higayon diin kamo nadasig sa mga pulong nga inyong isulti samtang nag-ampo. Dayon kamo mopamatuod kon unsay kalainan sa pag-ampo kon kini buhaton niining paagiha, sama sa gitudlo sa Manluluwas.
Hunahunaa ang kalainan nga masinati sa inyong mga anak kon sila mobuhat sumala niining mga baruganan sa pag-ampo nga makita niining mga bersikulo ug sa imo ug ilang pagpamatuod nga gipakigbahin. Hunahunaa kon sa unsang paagi kini makapalambo sa ilang abilidad sa pagbati ug pag-ila sa Espiritu, pagpalambo sa ilang mga calling, paghatag og mga panalangin sa priesthood, ug sa dili madugay pag-amuma og ilang kaugalingong pamilya, nga gigiyahan sa samang Espiritu nga “magtudlo sa usa ka tawo sa pag-ampo” (2 Nephi 32:8).
Kon ang ehemplo o pagtulun-an sa Manluluwas dili malakip niining instruksyon, kita mahimo gihapon nga adunay maayo nga diskusyon kabahin sa pag-ampo, apan ang paglakip sa Iyang ehemplo ug pagtulun-an makadugang sa giladmon ug gahum.
Artwork nga Nasentro sa Ebanghelyo
Laing paagi nga among gibuhat aron makaestablisar og panimalay nga mas nasentro kang Kristo mao ang pagbutang og mga litrato ni Kristo, sa templo, ug ubang mga butang nga may kalabutan sa ebanghelyo sa dapit nga dali makita ug diin ang among mga anak masayud kon unsay tinuoray nga importante kanamo.
Mga pipila ka tuig na ang milabay, samtang naglingkod uban sa among mga anak panahon sa tithing settlement, ang among bishop midapit sa among 10 anyos nga anak nga lalaki sa pagkuha sa gamayng litrato sa Manluluwas ug sa pagpili asa kini ibutang sa among panimalay, diin kini mahimong pahinumdom sa kanunay sa pasalig sa among pamilya sa pagsunod Kaniya. Sa among pag-abut sa balay, iya kining gibutang sa atubangang pultahan, diin, ang among anak miingon, “makita natong tanan kanunay.” Kini nahimong dakong panalangin ug kanunay nga pahinumdom kanamong tanan sa gamay apan gamhanang paagi sa among mga saad sa pagsunod ni Jesukristo.
Bisan asa pa ibutang ang mga litrato sa inyong panimalay, angay lang nga hatagan og gibug-aton ang mga litrato diha sa bong-bong ug sa mga mensahe nga gipaabut niini sa inyong mga anak. Ang art ba nga anaa sa inyong panimalay nagpakita sa mensahe nga kamo mapasaligon sa pagsunod kang Kristo?
Ubang mga Pamaagi sa Pagtudlo kabahin ni Kristo
Moangkon ko nga sobra kausa mikatawa ko sa dihang ang akong mga anak nangutana kon si Jesus mas kusgan pa kay ni bisan kinsang cartoon superhero, apan akong nakaplagan nga ang pangutana sa akong anak kanunay makamugna og maayong diskusyon kon unsay nakapahimo sa Manluluwas nga mas labaw kaysa superhero. Uban sa matag adlaw nga panag-istoryahanay sama niini, ania ang pipila ka ideya nga mahimo ninyong ikonsiderar aron ang inyong panimalay mahimong mas nakasentro kang Kristo:
-
Gamita ang Basahon ni Mormon sa pagtudlo sa inyong mga anak kabahin sa Pag-ula ni Jesukristo. Ang pulong nga Pag-ula o ula mabasa 39 ka higayon diha sa Basahon ni Mormon.
-
Gamita ang Mormon Messages videos, Bible videos, ug uban pang mga media sa Simbahan nga nagtudlo kabahin ni Jesukristo aron pagpalambo sa inyong mga leksyon sa family home evening ug pagtuon sa kasulatan.
-
Dungan nga magkat-on ug magkanta sa mga himno ug maghisgot sa mga pagtulun-an ug kahulugan niini.
-
Mangita og mga paagi sa paghatag og gibug-aton nga ang mga propeta gamhanang mga saksi ni Jesukristo.
-
Magtinguha kanunay sa pagpalambo sa inyong relasyon sa Manluluwas.
Pinaagi sa pagtuon og maayo ug kinasingkasing nga pag-ampo akong nasayran nga si Jesukristo buhi ug ang Iyang talagsaon nga gasa sa Pag-ula tinuod ug naghatag sa atong mga kinabuhi, ug sa mga kinabuhi sa atong minahal, og kahulugan ug katuyoan, uban sa dako ug mahimayaong paglaum nga ang atong mga pamilya makauban kanato sa kahangturan. Unta kitang tanan makaamgo sa dakong kaimportante sa pag-establisar og panimalay nga nasentro kang Kristo, nag-ila nga “walay lain nga paagi o mga pamaagi diin ang tawo maluwas, diha lamang ug pinaagi ni Kristo” (Alma 38:9).
Background nga imahe gikan sa Hemera/Thinkstock