Kalinaw diha sa Pagpanggukod
Beka F., Montana, USA
Mga paghulagway pinaagi ni Ben Simonsen
Nakatarung kog lingkod sa dihang nakadungog ko sa hilisgutan sa misunod nga mamumulong: ngano nga ang Mormon nga Simbahan sayop ug ngano nga ang mga Mormon masilagon nga hipokrito. Atol sa pagpamulong, gibati nako nga namula ang akong nawong, ug nakugang ug nasakitan. Ngano ang mismo nakong mga higala, nga nasayud nga ako usa ka Santos sa Ulahing mga Adlaw, mipili sa pagsulti og bakak nga mga sulti atubangan sa akong tibuok klase sa English?
Human makabagting, giduol ko sa mamumulong ug pipila sa akong ubang mga higala. Uban sa Espiritu nga akong gibati, giingnan nako sila nga unsay gisulti sayop ug nga ang Simbahan dili masilag sa mga tawo nga wala magsunod sa among mga pagtuo. Agig balus, mihimo sila og bakak nga mga pamahayag ug mga pag-akusar. Gibati nako nga nag-inusara. Naghunahuna ko, “Makiangayon ba nga ako nagsunod unsay akong nahibaloan nga tinuod, dayon ako kinahanglang lutuson?”
Sa dihang mipauli ko gikan sa eskwelahan nianang adlawa, nakita nako ang email gikan sa akong lola. Diha niini miingon siya nako sa pagtan-aw sa Mateo 5:11–14. Nagluha ang akong mga mata, akong gibasa: “Bulahan kamo sa diha nga panamastamasan kamo sa mga tawo, ug pagalutuson kamo, ug pagabutangbutangan kamo sa tanang matang sa kadautan batok kaninyo tungod kanako. Kinahanglan managmaya ug managlipay kamo, kay dako ang inyong balus didto sa langit, kaysa ingon man niini gilutos sa mga tawo ang mga propeta nga nahiuna kaninyo. … Kamo mao ang kahayag alang sa kalibutan. Ang siyudad nga mahimutang sa ibabaw sa bungtod dili gayud mahisalipdan.”
Gibati nako ang Espiritu Santo samtang nagbasa ko niadto nga mga pulong. Nasayud ko nga ang pagpanglutos makapalig-on sa atong mga pagpamatuod, ug nasayud ko nga ang mga panalangin sa langit takus sa kasakit nga atong maagian dinhi sa yuta. Gihimong posible sa Manluluwas alang nato nga makakita og kalinaw kon kita gigukod tungod sa pagsunod sa ebanghelyo, ug niana ako tinud-anay nga mapasalamaton.