Wala Mabalhin
Ang tagsulat nagpuyo sa Utah, USA.
Mahimong nasayop ang akong presidente sa misyon—unsa pa man ang akong makat-unan kon mas magdugay pa ko niining area?
Imahe sa pultahan pinaagi sa gracethang/iStock/Thinkstock; imahe sa luggage pinaagi sa monticello/iStock/Thinkstock
Mibiya ko sa akong panimalay sa NanTze, Taiwan, aron pagserbisyo og misyon sa amihanang California niadtong 2005. Ang area nga ang akong kompanyon ug ako na-assign gamay kaayo nga sulod sa upat ug tunga sa bulan among natuktok ang tanang pultahan sa matag dalan sa poblasyon. Ang misyonaryo nga buhat lisud, ug kanunay syagitan mi sa mga tawo. Pipila lang ang among mga investigator. Ingon og para nako ang buhat walay kapadulngan. Human sa akong mga upat ka bulan didto, andam na ko nga mobiya. Nakombinser ko nga ako mabalhin.
Dominggo sa gabii nagpaabut ko sa may telepono hangtud mitawag ang akong zone leader. Sa dihang siya mi-report nga magpabilin ko sa mao gihapong area sa sunod unom ka semana, dili ko makatuo sa akong nadungog. Nagtuo ko nga adunay sayop!
Ang misunod nga semana grabe gyud kalisud para nako ug siguro sa akong kompanyon ug sa mga tawo usab nga anaa sa among area. Dili ko motuo nga kini husto nga desisyon. Hinoon, dako gihapon ang akong pahiyom kon kami makakita o makig-istorya sa mga tawo, apan sa tinuoray wala ko malipay. Mapasigarbuhon ko nga padayong nagsulti sa akong kaugalingon nga wala ko sa lugar kon asa angay ko. Naglaum gihapon ko nga tawagan ko sa presidente sa misyon ug sultian ko nga mabalhin ko sa lain nga area.
Sa Unsang Paagi ang Kasiguradoan Miabut
Pagkasunod Dominggo sa buntag samtang wala sa maayong buot nga nag-andam para mosimba, ang telepono mikiring. Ang presidente sa misyon kadto. Iya ko nga gitimbaya sa kasagaran niyang mabination, matinud-anong tingog ug dayon miingon, “Sister Cho, kagahapon sa tingpaniudto naghunahuna ko kanimo ug mibati nga kinahanglang motawag nimo aron pahibaloon ka nga ikaw anaa sa hustong lugar. Anaa ka sa dapit diin ikaw angay nga maanaa.” Nakahilak ko sa dihang nakadungog ko sa iyang mga pulong.
Nagpasalamat ko niya ug gibutang ang telepono. Sa dihang mihilak ko, aduna koy kusog nga klaro kaayo nga pagbati nga aduna pay wala mahuman nga mga buluhaton nga nagpaabut nako sa among area. Nasayud usab ko nga ang akong Langitnong Amahan nasayud sa akong panghunahuna ug kasagmuyo. Siya nakasabut sa akong mga kahuyang, ug Iyang gipadala ang Iyang sulugoon sa pagsiguro nako.
Human niadtong panag-istoryahanay diha sa telepono, misugod ko pagbag-o sa akong kaugalingon. Nag-ampo ko og kalig-on matag adlaw, naghangyo nga mas klarong makakita kon unsaon nako pagbuhat unsay gipaabut sa Ginoo kanako. Sa tibuok lima ka semana nga misunod, ang akong kompanyon ug ako nakasaksi og daghang mga milagro samtang naggamit og igong pagtuo nga magkugi. Usa ka andam na kaayo nga investigator mibalhin sa among area ug nagpabunyag sa wala pa ang sunod nga pagbalhin sa mga misyonaryo.
Kami gidapit usab nga moadto sa panimalay sa mga tawo kinsa sa sinugdanan wala modawat kanamo. Kami nakahimamat og daghang bag-o nga mga tawo kinsa naglisud ug kami napanalanginan nga ipakigbahin ang makapahupay nga mga pulong sa Dios ngadto kanila. Bisan tuod ang uban dili magpabunyag, dili gyud nako makalimtan ang sanag sa ilang panagway o kon sa unsang paagi ang Espiritu ug ang gugma sa Dios nakatandog sa ilang kasingkasing—ug kanako.
Unsay Akong Nakat-unan
Nakakat-on ko nga ang Ginoo sa tinuoray nagpakabana kanatong tanan; dili Siya mopadala og mga misyonaryo sa dapit nga walay rason. Nakakat-on ko nga kon kita na-assign sa usa ka area, gusto sa Ginoo nga kita gamiton isip mga instrumento aron pagtuman sa Iyang buhat. Kon atong itugyan ang atong kaugalingon sa Iyang mga kamot, mahitabo ang mga milagro ug mohumok ang mga kasingkasing, bisan kon dili nato makita nga kini posible.
Ang importante, nakakat-on ko nga ang akong presidente sa misyon, sama sa ubang mga lider sa Simbahan, tinuoray nga gitawag sa Dios aron mahimo Niyang sulugoon. Ang Ginoo mipasarang sa atong mga lider aron makadawat og pagpadayag ug inspirasyon nga atong gikinahanglan para sa kaayohan sa atong mga kalag.
Ako mahangturong mapasalamaton sa mga kasinatian nga miabut isip resulta nga wala mabalhin.