Pagpakigbahin sa Ebanghelyo Sama ni Juan Bautista
Kamo makatabang sa pagpangandam sa mga tawo para sa Ikaduhang Pag-anhi sa Manluluwas, sama sa gibuhat ni Juan Bautista sa unang pag-anhi sa Manluluwas.
Si Juan Bautista Nagsangyaw diha sa Kamingawan, ni Robert T. Barrett
Dili sama ni Juan Bautista, dili mo magserbisyo og misyon sa “awaaw sa Judea” (Mateo 3:1). Ang inyong sinina dili hinimo sa “balhibo sa kamelyo” (Mateo 3:4). Dili mo mokaon og “dulon ug dugos sa kagulangan” (Mateo 3:4). Apan ang inyong tuyo sa pagpakigbahin sa ebanghelyo sama sa kang Juan Bautista: kamo nag-andam sa mga katawhan para sa pag-anhi ni Jesus pinaagi sa pagdeklarar, “Paghinulsol kamo: kay ang gingharian sa langit haduol na” (Mateo 3:2).
Ang misyon ni Juan Bautista klaro: “moabut sa dili pa moabut ang Mesiyas, sa pag-andam sa agianan sa Ginoo” (1 Nephi 10:7). Apan ang iyang misyon dili sayon. Ang katapusang propeta sa wala pa siya mao si Malaquias, sobra 400 ka tuig na ang milabay. “Walay propeta, ang mga tawo sa yuta nagsugod og pagkabahin ngadto sa mga partido ug mga grupo, ang matag usa nangangkon nga may katungod sa paghubad sa kasulatan ug mogiya sa mga tawo. Ang tinuod nga kahulugan kabahin ni Jehova nawala niining mga grupoha.”1
Bisan pa sa mga hagit sa panahon ni Juan, daghang pundok sa mga tawo moadto sa kawanangan aron maminaw niya nga mosangyaw, ug daghan siya og nabunyagan. Duha sa umaabut nga mga Apostoles, si Juan ang Hinigugma ug si Andres, nakaila ni Jesus pinaagi ni Juan (tan-awa sa Juan 1:40).
Ang pagpakigbahin sa ebanghelyo karon sama gihapon kamahagiton. Ang modernong kinabuhi daghan og makalinga. Kalibutanong mga pilosopiya nakapawala sa mga tawo. Nagkadaghan ang mga tawo nga napakyas sa pagsunod sa taas nga moral nga mga sumbanan. Ang uban wala magkinahanglan og relihiyon.
Niining mga sirkumstanya, unsaon ninyo nga magmalampuson sa pagpakigbahin sa ebanghelyo, sama sa gibuhat ni Juan Bautista? Ania ang pipila ka mga leksyon sa iyang kinabuhi nga makatabang.
Si Juan nasayud kon unsa ang iyang misyon. Siya nasayud nga siya gitawag sa pagtabang sa mga katawhan sa pagduol ngadto kang Kristo (tan-awa sa Lucas 1:16). Sa dihang siya nakakita sa Manluluwas, si Juan mipamatuod, “Tan-awa mao kana ang Kordero sa Dios, nga magakuha sa sala sa kalibutan” (Juan 1:29). Imbis moawhag sa mga tawo sa pagsunod kaniya, gitabangan sila ni Juan nga mahimong mga disipulo ni Jesukristo. Namulong kabahin sa Manluluwas, si Juan miingon, “Siya kinahanglan magatubo, samtang ako kinahanglan magakunhod” (Juan 3:30).
Si Juan mitudlo sa unang mga baruganan sa ebanghelyo ni Jesukristo. Siya mitudlo sa mga tawo kabahin sa kaangayan, kalooy, kamatinuoron, moralidad, puasa, pag-ampo, paghinulsol ug pagkumpisal sa mga sala, bunyag pinaagi sa pagpaunlod, pagkabanhaw, ug Paghukom (tan-awa sa Mateo 3; Lucas 3). Ang iyang pagtulun-an mahulagway nga sama sa Manluluwas: “Nahibulong sila sa iyang pagpanudlo: kay kanila nagpanudlo man siya ingon nga may kagahum” (Marcos 1:22).
Dili kalibutanon ang pagkinabuhi ni Juan. Si Jesus mipakita sa kalainan ni Juan kompara sa kalibutanong magtutudlo: Si Juan dili “tawo nga nagsul-ob og luho nga mga bisti … nanggilak sa katahum … sa mga palasyo sa hari” (Lucas 7:25). Siya “dili [magainom] og bino ni sa ilimnong maisug” (Lucas 1:15). Si Juan “ang tingog sa magasinggit diha sa mga awaaw, Andama ninyo ang dalan alang sa Ginoo” (Marcos 1:3). Tungod kay siya mitudlo uban sa gahum sa Dios, ang mga tawo mibati sa Espiritu ug nakabig.
Si Juan mapahinunguron. Usa ka eskolar mi-summarize sa mga kinaiya ni Juan: “Ang pagtutok sa iyang katuyoan, iyang hingpit nga pagpahinungod sa iyang espesyal nga calling, ug iyang hingpit nga pagkamaunungon sa Anak sa Dios. Kini nga mga kinaiya, inubanan sa iyang balaan nga katungod sa priesthood, dili mahadlok nga disposisyon, ug personal nga pagkamatarung, nakapahimo kaniya nga usa sa bantugang mga tawo diha sa kasulatan.”2
Samtang kamo magtuon sa kinabuhi ni Juan Bautista, inyong makita nga siya sobra pa sa tawo nga nakadawat sa talagsaong panalangin sa pagbunyag ni Jesukristo. Inyong makita nga ang iyang kinabuhi ug misyon kabahin sa pagpangandam sa mga tawo sa pag-abut sa Manluluwas, sama sa inyong kinabuhi ug misyon.