Pagsalig sa mga Kasigurohan sa Ginoo
Kita mahimong dili kanunay maluwas gikan sa atong mga pagsulay, apan samtang kita nagtinguha sa mga kasigurohan sa Ginoo, kita masayud nga ang tanan maayo ra bisan sa panahon sa kalisud.
Milingkod ko sa celestial room sa templo, namalandong sa direksyon sa akong kinabuhi—siyempre wala kini mahiuyon sumala sa akong giplano. Sama sa daghang mga young adult, mga kabalaka mipuno sa akong hunahuna: Unsaon nako pagbalanse nga makaangkon og maayong grado ug ang sosyal nga mga kalihokan? Mohunong ba ko sa akong trabaho? modugang pa og lain? Unsaon nako pagtigom og kwarta kon wala koy kwarta? Nganong wala pa man ko maminyo? Ang makapasubo nga lista nagpadayon. Miadto ko sa templo para mangita og kahupayan, nag-ampo para sa kasigurohan nga ang akong kinabuhi anaa sa mga kamot sa Langitnong Amahan. “Mamaayo ra ba kaha ang tanan sa akong kinabuhi?” nakapangutana ko. Ang tubag dali nga miabut ug sigurado diha sa akong hunahuna: “Ang tanan mamaayo ra.”
Nianang higayona, akong nasabtan nga bisan tuod ang akong kinabuhi wala mahitabo sama sa akong giplano, kini nahitabo gihapon sumala sa Iyang plano ug Siya ang nagkontrolar niini. Kanang matam-is nga kasigurohan nga Siya nasayud ug nag-amuma kanako, bisan wala Niya kuhaa sa kanunay ang akong mga pagsulay, miagak nako sa daghang mga kalisud. Samtang kita makasabut, magtinguha, ug magpaabut niining mga kasigurohan, kita masayud nga ang Ginoo nagsuporta kanato diha sa mga palas-anon nga atong nasinati.
Kasigurohan batok Kaluwasan [Deliverance]
Klaro, ang diha-diha nga pagluwas gikan sa atong mga pagsulay dili sa kanunay maoy tubag sa Ginoo sa atong mga pangamuyo. Hinoon, Siya mahimong mopanalangin kanato og bililhon kaayo nga mga higayon sa kasigurohan pinaagi sa personal nga pagdayag—kasigurohan nga Siya naggiya sa atong kinabuhi ug moluwas kanato sa mga pagsulay. Kini nga mga kasigurohan mahimong dili moluwas kanato sa atong mga pagsulay apan tingali mohatag kanato og kalig-on nga atong gikinahanglan aron pagluwas sa atong kaugalingon, bisan kon kana nga pagluwas mao ang paghupay sa Espiritu Santo. Ako nakamatikod og daghang ehemplo diha sa kasulatan kon sa unsang paagi ang Ginoo naghatag og mga kasigurohan sa wala pa ang pagluwas.
Samtang si Helaman nagdumala sa iyang 2,060 ka batan-ong mga sundalo ug sa ubang mga pwersa sa Nephite, sila nakasinati sa kasigurohan sa Ginoo. Human sa daghang bulan nga pagpaabut sa pagkaon ug dugang pwersa, hapit na nila masinati ang grabeng kagutom sa dihang ang pagkaon miabut nga gidala sa gamayng pundok sa mga lalaki. Nahadlok nga dili paigo ang nadugang kanila, sila nangamuyo ngadto sa Ginoo ug “mibu-bu sa [ilang] mga kalag diha sa pag-ampo ngadto sa Dios, nga siya molig-on [kanila] ug moluwas [kanila].” Human sa ilang pag-ampo, si Helaman misaysay, “ang Ginoo nga among Dios miduaw kanamo uban ang mga pasalig nga siya moluwas kanamo; oo, hangtud nga siya misulti og kalinaw sa among mga kalag, ug mihatag ngari kanamo og hilabihan ka hugot nga pagtuo, ug mihimo kanamo nga kami kinahanglan molaum sa among kaluwasan diha kaniya.” (Alma 58:10–11). Kini nga mga kasigurohan mihatag kang Helaman ug sa iyang mga sundalo og kalig-on nga magpadayon ug magmalampuson batok sa ilang mga kaaway.
Si Joseph Smith usab nakadawat og kasigurohan sa Ginoo samtang nabilanggo sa Bilanggoan sa Liberty. Samtang siya kinasingkasing nga nag-ampo, siya gisultian:
“Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon;
“Ug unya, kon ikaw molahutay pag-ayo, ang Dios mobayaw kanimo sa kahitas-an; ikaw magmadaugon ibabaw sa imong tanan nga mga kaaway” (D&P 121:7–8).
Kini nga kasigurohan naghatag ni Joseph og kaisug ug kalig-on nga magpadayon bisan sa mga kalisdanan nga hapit mosanap kaniya.
Niini ug sa uban pang mga ehemplo (tan-awa, sama pananglit, Mosiah 24:8–16), ang Ginoo wala moluwas diha-diha dayon sa mga matinud-anon sa ilang mga pagsulay. Hinoon, Siya mibisita kanila uban sa kasigurohan nga Siya moluwas kanila sumala sa Iyang panahon. Kini nga mga kasigurohan, sa paggamit sa mga pulong ni Elder Richard G. Scott sa Korum sa Napulog Duha ka mga Apostoles, sama sa “gagmay nga espirituhanong kahayag sa adlaw” nga gibutang sa Langitnong Amahan diha sa atong dalan “sa pagdan-ag sa [atong] agianan.”1 Usahay kana nga kasigurohan mao ang atong gikinahanglan aron makalahutay sa mga pagsulay, nasayud nga sa katapusan adunay kaluwasan.
Pagtinguha sa mga Kasigurohan
Ang kinabuhi lisud. Adunay mga panahon nga kita mangutana, kon kita kulang og pagsalig sa atong kaugalingon ug sa atong abilidad sa pagbuntog sa mga kalisdanan, kon kita mawad-an og paglaum. Kanunay kini mabati nga daw ang atong mga pagsulay walay katapusan. Ug bisan tuod pipila sa mga kasigurohan moabut nga walay kahago sa atong bahin, kasagaran kita magtinguha niadtong mga kasigurohan nga naghisgot nga may kahupayan sa atong mga pagsulay.
Ang mga kasigurohan sa Ginoo kasagaran moabut pinaagi sa tingog sa Iyang mga sulugoon: lokal nga mga lider, mga magtutudlo sa institute ug Sunday School, ug ilabi na sa Iyang mga propeta ug apostoles. Si Carol F. McConkie, unang magtatambag sa kinatibuk-ang kapangulohan sa Young Women, mipahinumdom kanato nga “sa ilang mga pulong atong madungog ang tingog sa Ginoo ug atong mabati ang gugma sa Manluluwas.”2
Kini nga mga kasigurohan moabut usab pinaagi sa tingog sa Espiritu samtang kita mangamuyo ngadto sa Langitnong Amahan pinaagi sa kinasingkasing nga pag-ampo, samtang kita nagbasa ug namalandong sa mga kasulatan, samtang kita nagtambong sa templo ug sa mga miting sa Simbahan, samtang kita nagserbisyo sa uban ug naningkamot sa pagbuhat unsay husto. Sa laktod nga pagkasulti, ang mga kasigurohan sa Ginoo moabut kon “pangitaon [nato] siya sa bug-os [natong] kasingkasing ug sa bug-os [natong] kalag” (Deuteronomio 4:29) ug mosunod sa Iyang mga sugo.
Si Helaman ug ang iyang mga sundalo nakadawat og kasigurohan human sa daghang kinasingkasing nga mga pag-ampo; si Joseph Smith nakadawat og kasigurohan human sa pag-ampo ug pagpamalandong. Niining duha ka sitwasyon, ang Ginoo misulay sa ilang pailub ug pagtuo sa wala pa hatagi og kasigurohan—maayo nga pahinumdom nga panahon sa mga pagsulay kita kinahanglang magpadayon sa atong pagtuo ug magpailub.
Nagpaabut sa mga Kasigurohan
Sama sa ubang pagsulay sa pailub, ang mga kasigurohan sa Ginoo mahimong dili mahitabo sama sa paagi ug panahon nga atong gidahuman. Kita kinahanglang mag-ampo aron makabaton og “mga mata sa pagtan-aw” (Ezequiel 12:2) sa kamot sa Ginoo ug sa Iyang mga kasigurohan sa atong kinabuhi. Si Elder David A. Bednar sa Korum sa Napulog Duha ka mga Apostoles namulong kon sa unsang paagi ang malumong kalooy sa Ginoo naglangkob niining mga kasigurohan ug miingon nga kini “dili moabut nga sulagma lang o kay nahiatol lang. Ang pagkamatinud-anon ug pagkamasulundon makapahimo kanato nga makadawat niining importante nga mga gasa ug, sa kanunay, ang pagpahigayon sa Ginoo motabang kanato sa pag-ila niini.”3
Kasagaran, ang pagpaabut nga maluwas o mahatagan og kasigurohan nga maluwas nagkinahanglan og pailub nga sobra pa kaysa atong gihunahuna nga anaa kanato. Kita mahimong mag-atubang og lisud nga mga pagsulay sa dili pa makadawat og bisan unsang matang sa kasigurohan. Sama sa gipasabut ni Elder Scott, ang “gagmay nga espirituhanong kahayag sa adlaw” nga giandam sa Ginoo “kanunay moabut kon grabe na kaayo ang pagsulay, isip ebidensya sa kalooy ug gugma sa Amahan kinsa nasayud sa tanang butang. Kini motudlo sa dalan ngadto sa mas dakong kalipay, dugang pagsabut, ug molig-on sa [atong] determinasyon sa pagdawat ug pagsunod sa Iyang kabubut-on.”4 Samtang kita magpabiling matinud-anon ug masulundon bisan pa sa atong mga pagsulay, ang mga kasigurohan sa Ginoo moabut aron sa pagtabang kanato nga makapadayon.
Ang Atong Labing Dako nga Kasigurohan
Sa katapusan, bisan unsa pa kadaghan ang mga kasigurohan nga atong madawat nga ang Langitnong Amahan nagpakabana kanato ug sa atong sitwasyon, dili kini paigo sa pagtabang kanato sa paglahutay sa katapusan kon kita walay pagtuo ug paglaum kang Jesukristo. Pinaagi sa Iyang Pag-ula, kita makabaton og hingpit nga paglaum nga moabut ang adlaw nga kita maluwas sa tanan natong mga pagsulay. Kita usab masayud nga ang atong Manluluwas anaa aron hingpit nga makasabut kanato, kay Siya “nakasinati sa tanan nga mga butang, niana siya nakatugkad sa tanan nga mga butang,” (D&P 88:6). Siya nakasabut sa atong mga pagsulay ug kasubo kay Siya “[mi]antus sa mga sakit ug mga kasakit ug mga pagtintal sa matag matang … nga siya mahimo nga masayud … unsaon pagtabang ang iyang mga katawhan sumala sa ilang mga kahuyang” (Alma 7:11–12).
Si Elder Jeffrey R. Holland sa Korum sa Napulog Duha ka mga Apostoles miingon: “Ang labing sigurado sa plano sa Dios mao nga may usa ka Manluluwas nga gisaad, usa ka Manunubos, nga pinaagi sa atong pagtuo ngadto Kaniya kita malampusong makabuntog niining mga pagsulay. … Ang pagdayeg lang niining balaanong gugma ang makapahimo sa atong dili kaayo bug-at nga pag-antus nga madala ra sa sinugdanan, dayon masabtan, ug sa katapusan makaluwas.”5 Ang pagkat-on kabahin Niya ug sa Iyang Pag-ula usa na mismo ka kasigurohan.
Maayo ra ang Tanan
Samtang kita mosabut, motinguha, ug mopaabut sa mga kasigurohan gikan sa Ginoo, kini siguradong moabut. Kinahanglan natong hinumduman kadtong bililhon nga mga higayon, isulat kini, ug kanunay maghunahuna niini. Pinakaimportante, kita kinahanglang mosalig niini ug motuo, sama sa pagtuo ni Helaman ug sa iyang katawhan ug ni Propeta Joseph, nga ang Ginoo motuman sa Iyang mga saad ngari kanato. Siya nagpahinumdom kanato niining mga saad pinaagi sa Iyang mga kasigurohan, ug bisan tuod dili Niya wad-on ang atong mga pagsulay, kita masayud nga ang Langitnong Amahan anaa aron sa pagsuporta ug pagpaluyo kanato sa tanang butang.
Human sa akong pag-adto sa templo nianang adlawa, wala maminusan ang akong mga pagsulay. Ako walay dagko nga mga grado o daghang kwarta o daghang date diha-diha dayon. Apan ang akong nabati mao ang kalma nga kasigurohan nga bisan pa sa akong mga pagsulay, ako ma-OK ra tungod kay ang Ginoo nagtinguha nga Iyang tumanon ang Iyang mga saad ngari kanako. Uban niana nga kasigurohan nasayud ko nga ang tanan mamaayo ra.
Ang “gagmay nga espirituhanong kahayag sa adlaw … kanunay moabut kon grabe na kaayo ang pagsulay, isip ebidensya sa kalooy ug gugma sa Amahan kinsa nasayud sa tanang butang. Kini mogiya sa paagi aron mas malipay.”