Mga Pamilya Mahimong Manag-uban sa Hangtud

Ni Presidente Henry B. Eyring

Unang Magtatambag sa Unang Kapangulohan

Ang gahum sa priesthood sa pagbugkos sa mga pamilya sa kahangturan usa sa labing mahinungdanong gasa sa Dios. Ang matag tawo nga nakasabut sa plano sa kaluwasan naghandom nianang mahangturong panalangin. Sa mga seremonya sa pagbugkos lamang nga gipahigayon sa gipahinungod nga mga templo sa Ang Simbahan ni Jesukristo sa mga Santos sa Ulahing mga Adlaw nga gitanyag sa Dios ang saad nga ang mga pamilya mahimong mabugkos sa kahangturan.

Ang mga yawe sa priesthood nga nakaposible niini gipahiuli nganhi sa yuta pinaagi ni propeta Elijah ngadto ni Joseph Smith sa Templo sa Kirtland. Kadtong mga yawe sa priesthood gipasa sa wala maputol nga linya pinaagi sa buhi nga mga propeta sa Ang Simbahan ni Jesukristo sa mga Santos sa Ulahing mga Adlaw hangtud karon.

Ang Manluluwas sa Iyang mortal nga pangalagad namulong sa gahum sa pagbugkos sa mga pamilya sa mga pulong ngadto ni Pedro, ang Iyang labaw nga Apostol, sa dihang Siya miingon, “Hatagan ko ikaw sa mga yawe sa gingharian sa langit, ug bisan unsay imong pagabugkuson dinhi sa yuta, didto sa langit pagailhon kini nga binugkos; ug bisan unsay imong pagaluagan dinhi sa yuta, didto sa langit pagailhon kini nga linuagan” (Mateo 16:19).

Sa celestial nga gingharian lamang nga kita makapuyo isip mga pamilya sa kahangturan. Didto kita magpundok isip mga pamilya sa presensya sa atong Langitnong Amahan ug sa Manluluwas. Si Propeta Joseph Smith mihulagway nianang talagsaong kasinatian niining paagiha sa Doktrina ug mga Pakigsaad:

Sa panahon nga ang Manluluwas mopakita kita makakita kaniya ingon nga siya mao. Kita makakita nga siya usa ka tawo sama sa atong kaugalingon.

Ug kana nga panag-uban nga ania kanato dinhi maanaa kanato didto, lamang kini pagaubanan sa walay katapusan nga himaya, nga ang mao nga himaya kita wala karon makatagamtam” (D&P 130:1–2).

Kini nga kasulatan nagsugyot nga kita makahimo uban sa pagsalig sa pagtinguha alang sa langitnong sumbanan sa atong mga relasyon uban sa atong mga pamilya. Maatiman nato pag-ayo ang atong mga sakop sa pamilya, buhi ug patay, sa pagbuhat sa tanan nga atong mahimo sa pagtanyag kanila sa mga ordinansa sa priesthood nga mobugkos nato didto sa langit.

Daghan kaninyo, batan-on ug hamtong, naghimo niana. Nangita kamo sa mga pangalan sa mga katigulangan kinsa wala pa makadawat sa mga ordinansa nga makabugkos kaninyo.

Hapit kamong tanan adunay buhi nga mga kabanay nga wala pa mabugkos isip pamilya pinaagi sa gahum sa priesthood. Kadaghanan adunay buhi nga mga kabanay kinsa nakadawat sa mga ordinansa sa priesthood apan wala magtuman sa mga pakigsaad nga ilang gihimo uban sa Dios. Ang Dios mopanalangin ninyo nga kamo makahimo sa pagtabang niadtong tanan ninyong mga kabanay sa pagtuo. Kamo adunay saad nga gihimo sa Ginoo ngadto sa Iyang mga disipulo kinsa modala sa uban ngadto Kaniya:

“Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).

Gikan sa bintana sa akong opisina akong makita ang mga pangasaw-unon ug pamanhunon kada adlaw nga nagpalitrato diha sa matahum nga mga bulak ug sa nagsirit nga mga fountain. Ang pamanhunon sa kasagaran mosapwang sa iyang pangasaw-unon, sa pipila ka lisud ka mga lakang, samtang ang litratista mokuha og litrato sa kasal. Matag higayon nga makita ko kana, maghunahuna ko sa mga magtiayon nga akong nailhan kinsa—usahay sa bag-o pa lang mahuman ang adlaw sa ilang kasal—mosapwang sa usag usa sa laing mga paagi kon mahimo nang lisud ang kinabuhi. Mahimong mawad-an sa trabaho. Mga anak matawo nga dunay dakong mga hagit. Ang sakit moabut. Ug dayon, ang mga kinaiya sa pagbuhat ngadto sa uban kon unsay gusto nato nga buhaton nila ngari kanato—sa sayon pa kining buhaton—makapahimo nato nga daw mga bayani atol sa mahagitong mga panahon diin ang maayong pagtratar sa uban nagkinahanglan og kalig-on nga sobra pa sa unsay anaa kanato.

Angay natong ihatag sa atong mga pamilya ang matang sa relasyon nga atong madala ngadto sa presensya sa Dios. Maningkamot kita nga dili makapasilo o masilo. Makahukom kita nga mopasaylo dayon ug hingpit. Makapaningkamot kita sa pagtinguha sa kalipay sa uban labaw sa atong kalipay. Mahimo kitang magmabination sa atong sinultihan. Samtang maningkamot kita sa pagbuhat niining mga butanga, atong gidapit ang Espiritu Santo sa atong mga pamilya ug sa atong mga kinabuhi.

Ang akong kasiguroan nganha ninyo mao nga, uban sa tabang sa Ginoo ug uban sa mahinulsulon nga mga kasingkasing, atong makita sa daklit niining kinabuhia ang matang sa kinabuhi nga atong gusto sa kahangturan. Ang Langitnong Amahan nahigugma kanato. Gusto Siya nga mahibalik kita ngadto Kaniya. Ang Manluluwas, pinaagi sa gahum sa Iyang Pag-ula, nakapahimo nga posible sa kausaban sa atong mga kasingkasing nga kinahanglan natong buhaton aron makasulod sa balaan nga mga templo, makahimo og mga pakigsaad nga atong matuman, ug magpuyo isip mga pamilya sa kahangturan sa celestial nga himaya—nakapauli pag-usab.

Pagtudlo gikan Niini nga Mensahe

Sa inyong pagpakigbahin sa doktrina sa mahangturong pamilya, ikonsiderar unsay gisulti ni Elder Richard G. Scott sa Korum sa Napulog Duha ka mga Apostoles: “Kanunay tinguhaa ang paglig-on sa mga pamilya. Pagtudlo uban ang panan-awon sa kaimportante sa mga pamilya nga ma-sealed sa templo. … Kon kamo adunay mahangturong panglantaw nga naglakip sa mga ordinansa sa sealing diha sa templo, kamo makatabang sa pagtukod sa gingharian sa Dios dinhi sa yuta” (“Usa ka Paning-ingnan Akong Gihatag Kaninyo,” Liahona, Mayo 2014, 34). Unsaon ninyo pagtabang niadtong inyong gitudloan nga makapalambo og panan-awon sa kaimportante nga mabugkos diha sa templo? Dapita kadtong wala pa mabugkos sa paghisgot sa mga lakang nga ilang mahimo padulong niana nga ordinansa. Dapita kadtong nabugkos na sa paghisgot sa unsa nga paagi nga sila makatuman sa panan-awon sa ilang mahangturong pamilya ug maningkamot sa pagpalambo sa ilang relasyon sa usag usa.

Litrato sa San Diego California Temple