Pagpaningkamot nga Maluwas
Ang tagsulat nagpuyo sa Utah, USA.
Sama sa 33 ka lalaki nga wala makalingkawas sa pagkahugno sa usa ka minahan sa Chile, kita tingali mobati nga dili makalingkawas tungod sa atong mga pagsulay ug kahuyang; apan, pinaagi sa plano sa kaluwasan kita makakaplag og paglaum nga maluwas.
Paghulagway sa litrato gikan sa iStockphoto/Thinkstock
Niadtong Agosto 5, 2010, 33 ka mga minero sa Chile wala makalingkawas sa grabeng pagkahugno dihang ang bato sulod sa minahan natumpag. Sila napundo sa gamayng luwas nga dapit ug diha sa lungag sa minahan nga anaa sa ubos sa nahugno nga dapit, 2,300 ka pye (700 m) kalawom diha sa yuta.
Ang sitwasyon morag wala nay paglaum. Sila nabulag sa ilang panimalay ug pamilya sa hapit tunga sa milya nga dili matarug nga bato ibabaw kanila, ug sila adunay gamay lang nga suplay sa pagkaon ug tubig. Bisan tuod aduna silay mga himan ug kahibalo, tungod kay dili na lig-on ang minahan dili nila maluwas ang ilang kaugalingon. Ang bugtong purohan mao ang makit-an ug maluwas.
Bisan pa niini, sila mipili nga molaum. Ilang giorganisar ang ilang kaugalingon, gibahin-bahin ang ilang pagkaon ug tubig, ug nagpaabut. Sila hugot nga nagtuo nga kadtong anaa sa ibabaw nagbuhat sa angay nilang buhaton aron pagluwas kanila. Bisan pa man, mahimong lisud sa paghupot nianang paglaum samtang nagpaabut sila sa kangitngit. Milabay ang mga adlaw, ug dayon mga semana. Ang ilang gitarung og bahin-bahin nga pagkaon nahurot na.
Ako nakasinati og grabeng pagkahugno sa akong kaugalingong kinabuhi. Samtang nagtan-aw kaniya, ang akong gwapo, makalingaw, baskog nga otso anyos nga anak nga lalaki namatay kay aksidenting nabanggaan sa sakyanan. Akong gikuptan ang iyang lawas samtang ang iyang dugo mibanaw sa dalan ug ang iyang espiritu mibiya ug mibalik sa iyang langitnong panimalay. Nangamuyo ko sa Langitnong Amaham nga buhion lang siya, apan dili kadto kabahin sa plano sa kinabuhi sa akong anak.
Naanaa ko sa kawalay paglaum, nasanapan sa grabeng kasubo. Naluya ko, dili makapahulay, samtang ang problema sa mortalidad nakapig-ot sa akong panabut. Akong nasayran nga ang mapainubsanon nga kasingkasing usa ka tinuod nga pisikal nga pagbati. Sa una ako adunay kasingkasing, karon kahaw-ang na lamang nga grabe gyud kasakit.
Nagtuo ko nga kinahanglang magmaisugon lang ko aron sa pagbuntog niini. Daghang mga tawo ang mas nag-antus. Apan sama sa mga minero, dili makalingkawas tungod sa dili matarug nga bato nga nakapapriso nila, dili nako madala ang ka sakit sa akong kasubo.
Sa daghang pamaagi kita mobati nga dili makalingkawas. Ang pipila mibati nga dili makalingkawas sa personal nga mga pagsulay, kahuyang, o sa kalisud sa mga kahimtang sa kinabuhi. Bisan pa niini, adunay kahupay sa pagkasayud nga ang mortal nga kinabuhi mao ang panahon nga kita mas malig-on samtang atong atubangon ang atong kasubo. Kita makakaplag og paglaum diha kang Jesukristo.
Usa ka Silaw sa Paglaum
Sa ika-17 nga adlaw sa ilang pagsulay, nabag-o ang paglaum sa mga minero sa dihang ang usa ka gamay nga lungag nahimo pinaagi sa pagbarina nga milapos sa bato nga nakapapriso nila.
Ang wala makalingkawas nga mga lalaki, gusto nga ipahibalo sa mga tigluwas [rescuers] diha sa ibabaw nga sila buhi pa, mipukpok sa lansang sa barina ug mibutang og mubong sulat sa tumoy niini gamit ang pula nga tinta. Kini mabasa, “Estamos bien en el refugio, los 33” (“Kami maayo ra dinhi sa may luwas nga dapit, ang 33”). Nabalik ang paglaum. Sila nakit-an.
Pinaagi sa gamay nga lungag, ang gidak-on niini sama sa buongon, naestablisar ang komunikasyon ngadto sa mga tawo nga anaa sa ibabaw. Pagkaon, tubig, medisina, ug mga mubong sulat gikan sa mga minahal gipadala diha sa lungag ngadto sa mga minero.
Siguradong nagsagol ang mga pagbati sa mga minero nga nakaamgo sa ilang sitwasyon. Bisan tuod sila napuno kaayo sa kalipay ug kahupay nga sila nakit-an, ang ilang sitwasyon kuyaw ra gihapon. Bisan tuod kadtong anaa sa ibabaw nasayud kon asa sila, nagkinahanglan gihapon og panahon sa paghan-ay og plano sa pagluwas, ug sila maglaum nga unta kini mosalir.
Ang mga tigluwas nagduha-duha nga mipahibalo sa mga minero nga molungtad pa og daghang bulan sa dili pa sila makagawas. Sila naglaum nga makauban na sa mga minero ang ilang pamilya panahon sa Pasko, buot ipasabut nga ang mga minero matanggong pa og dugang upat ka bulan. Hinoon, karon sila nagpaabut nga may paglaum.
Kita usab adunay kahayag sa paglaum. Sa wala pa malalang kining kalibutan, usa ka plano ang gihan-ay sa pagluwas kanato. Ang Langitnong Amahan nag-andam og Manluluwas para kanato, kinsa moluwas nato gikan sa pagkamortal, sala, kahuyang, ug sa tanan natong pagaantuson niining kinabuhia. Siya ang tighatag og paglaum ug kinabuhi. Siya ang nag-andam og paagi aron kita makabalik sa atong Langitnong Amahan ug makauban pag-usab ang atong mga minahal kinsa wala na dinhi sa kalibutan. Siya anaa sa atong kiliran aron pag-alsa sa mga palas-anon nga atong gipas-an, sa pagpahid sa atong mga luha, ug sa paghatag kanato og kalinaw. Siya mianhi aron kita makauli, kon sundon nato ang plano nga Iyang gihan-ay.
Ang Pagluwas
Bisan tuod daghang paningkamot ang gibuhat sa pagluwas sa mga minero, usa lang ka barina ang misubay sa tul-id nga agianan, pinaagi sa usa sa gagmay nga mga lungag nga una nang gibarina aron pagpangita sa mga minero.
Ang mga minero milihok usab aron sila maluwas. Samtang nagsige og barina aron sila maluwas, may mga bato nga mahulog agi sa gamay nga lungag ug magpundok ngadto sa nahimutangan sa napriso nga mga minero. Ilang balhinon ang bato kon kini matagak, andamon ang agianan para sa mas dakong barina.
Ang mga tigluwas naghimo og kapsula nga maoy ipaubos ngadto sa pig-ot nga lungag gamit ang mga kable. Ang kapsula para sa pagluwas mopaigo lang gyud og usa ka tawo sa sulod. Ang kapsula upat lang ka pulgada (10 cm) nga mas pig-ot kaysa lungag nga gihimo lapos sa 2,300 ka pye (700 m) nga gahi nga bato.
Sa dihang miabut na ang panahon nga ang mga minero luwason, ang kada usa nila kinahanglang mopili. Usa lang ka tawo mosulod sa kapsula; mosaka siya nga mag-inusara. Samtang kada usa kanila misalig sa plano, siya kinahanglang mosalig nga ang kapsula mabira pataas diha sa pig-ot nga lungag sa eksakto ug tul-id nga pagsaka ug dili mawala sa balanse ug maungot. Ang plano kinahanglang mosalir, o mawala ang tanang paglaum. Ang kada minero misulod sa kapsula ug mitugyan sa iyang kabubut-on ngadto sa plano ug sa mga tigluwas.
Puli-puli ang mga minero nakahimo sa nag-inusarang panaw pataas gikan sa kangitngit ngadto sa kahayag. Sila gisugat sa ilang mga minahal samtang ang tibuok kalibutan mitan-aw ug miabiba.
Ang plano sa pagluwas nagmalampuson; walay tawo nga nawala. Sila naluwas niadtong Oktubre 13, 2010—69 ka adlaw human mihugno ang minahan ug 52 ka adlaw human sila nakit-ang buhi.
Salig sa Pag-ula ni Jesukristo
Kita kinahanglang mopili nga itugyan ang atong kabubut-on nga mosalig sa atong Manluluwas nga si Jesukristo. Para kanato, adunay usa lang ka plano sa pagluwas; kini anaa ug pinaagi sa Iyang maulaong sakripisyo. Siya nagpakaubos sa tanang butang aron pagluwas kanato.
Si Kristo sa Getsemani, ni Harry Anderson
Sama sa mga minero, ang atong pagluwas indibidwal nga pagluwas. Bisan tuod ang kaluwasan anaa para sa tanan, ang atong relasyon uban sa Manluluwas personal gyud kaayo. Kita kinahanglang mopili nga itugyan ang atong kabubut-on nga mosalig sa atong Manluluwas nga si Jesukristo.
Tungod sa mahangturong kabalaan sa kabubut-on sa tawo diin kining mortal nga kinabuhi natukod, dili ihikaw kanato sa Manluluwas ang atong kabubut-on. Kita gawasnong mopili. Ang Manluluwas anaa sa atong kiliran nagpaabut nga ayuhon ang atong mga samad ug tabangan kita para sa mahangturong kaluwasan, apan mabuhat lamang Niya kana kon ato Siyang dapiton. Kita kinahanglang mopili Kaniya. Para kanato, adunay usa lang ka plano sa pagluwas; kini anaa ug pinaagi sa Iyang maulaong sakripisyo. Siya nagpakaubos sa tanang butang aron pagluwas kanato.
Ako naluwas sa dihang miluhod ko tungod sa grabeng kasagmuyo sa pagkamatay sa akong anak. Sama sa mga minero nga misulod sa kapsula, ako anaa sa punto sa pagdesisyon: maningkamot ba ko sa pagbuntog sa akong mga hagit gamit ang akong kaugalingong kalig-on ug kahibalo, o moduol ko sa akong Langitnong Amahan ug mangayo og tabang?
Nabug-atan tungod sa grabeng kasubo, mihukom ko nga modangop sa Dios. Samtang nangamuyo ko sa Langitnong Amahan, gisulti nako Kaniya ang akong grabe nga kaguol ug mihangyo kaniya sa pagpagaan sa akong kasubo. Sa wala pa ko mobarug, napagaan ang akong mga kasubo gikan sa akong mga abaga. Manlimbasug pa gihapon ko sa kasakit ug kawala, apan ang dili maagwanta nga kasakit nawala.
Didto akong nasayran nga ang Manluluwas anaa sa atong kiliran, nagpaabut sa pagtabang, nagpaabut nga kita mosangpit Kaniya, nagpaabut nga atong itugyan ang atong mga palas-anon ngadto sa Iyang abaga, nagpaabut nga atong idunol ang atong kamot ngadto Kaniya aron Siya makaluwas kanato.
Kita—sama sa mga minero, kinsa misira sa pultahan sa kapsula ug misalig sa ilang mga tigluwas—kinahanglang motugyan sa atong kabubut-on ngadto sa Manluluwas ug mosalig sa Iyang plano sa pagluwas para kanato.
Ako naglaum nga kon ako mopanaw nga mag-inusara niining kinabuhi ngadto sa pikas, adunay hingpit nga kalipay samtang akong makauban pag-usab kadtong nag-una og panaw kay kanako! Sa pagkakaron ako nasayud nga ang akong Manluluwas buhi ug nahigugma nako ug anaa sa akong kiliran.