Ang Akong Plano nga Molikay pinaagi sa Musika

Alixa B., Netherlands

Mga paghulagway pinaagi ni Ben Simonsen

Samtang nagsakay sa bus sa usa ka field trip sa eskwelahan, naglingkod ko sa atubangan sa usa ka babaye nga nagsige og himo og binastos nga mga komentaryo ug mga komedya nga wala makapakomportable nako. Ang akong mga magtutudlo ug ubang mga estudyante misulti na niya sa paghunong, apan nagpadayon siya. Wala na ako masayud kon unsay buhaton, maong gikuha nako ang akong MP3 player ug naminaw sa akong pipila ka paborito nga musika.

Akong gi-shuffle ug usa sa unang mga kanta nga mitukar mao ang kanta gikan sa youth.lds.org/music. Laktawan na unta nako sa dihang dunay misulti nako nga maminaw lang ko sa musika. Nagpadayon ko sa pagpaminaw sa makadasig nga musika sulod sa 20 ka minuto. Ang mga kanta nag-awhag nako sa pagpadayon, ug kini nakapahinumdom nako nga ako minahal nga anak nga babaye sa Langitnong Amahan.

Sa ulahing bahin nianang semanaha ang akong eskwelahan nagpasiugda og sayaw. Bisan og gigamit nila ang limpyo nga bersyon sa inila nga mga kanta sa sayaw, daghang mga tawo nga akong ka grado nagsugod sa pagsinggit sa gikuha nga pulong sa usa ka kanta.

Sa makausa pa wala ko makomportable. Ang mga magtutudlo naglingkod sa duol ug ingon og wala makamatikod. Akong gitan-aw ang akong pulso. Akong nakita ang akong pulseras gikan sa komperensya sa kabatan-onan nga nag-ingon, “Barug kamo sa balaan nga mga dapit, ug ayaw pagbalhin (D&P 87:8).”

Nasayud ko nga ang akong gibarugan dili balaan nga lugar, mao nga mibiya ko hangtud gipatukar ang bag-ong kanta.

Nasayud ko nga ang musika dunay dakong epekto sa atong mga kinabuhi. Nasayud ko nga ang pagpaminaw sa makadasig nga musika sa akong MP3 player duha ka adlaw na ang milabay nakatabang sa paghatag nako og kaisug nga akong gikinahanglan sa pagbiya sa sayaw. Kini nga mga kasinatian nakatabang nako nga mas mahiduol sa Langitnong Amahan.