Mga Pangutana ug mga Tubag
“Usa sa akong mga higala gustong mosulay og butang nga dili maayo bisan og kausa aron siya dunay mahibaloan kon ang mga tawo maghisgot niini. Unsaon nako sa pagtabang niya nga makasabut nga kana dili maayong ideya?”
Usa sa labing maayo nga mga butang nga imong mahimo mao ang pagtabang sa imong higala nga mahinumdom nganong kita dunay mga sugo. Ang Langitnong Amahan mihatag nato og mga sugo tungod kay Siya nahigugma nato ug nasayud nga kini makalipay nato ug makatabang nato nga mahimong sama Kaniya.
Sa Bag-ong Tugon, ang Manluluwas miingon, “Kon nahigugma kamo kanako, inyong pagatumanon ang akong mga sugo” (Juan 14:15). Tabangi ang imong higala nga makaamgo nga ang pagpili sa matarung nagpakita og gugma alang sa Langitnong Amahan ug ni Jesukristo ug pasalamat alang sa Iyang Pag-ula ug ebanghelyo.
Mahimo usab nga imo siyang pahinumduman nga ang pagbuhat sa dautan nga mga butang mosangpot sa dili maayo nga mga sangputanan, bisan og kausa ra kini. Dili kita makasinati og sala ug makalikay sa mga epekto niini. Ang tinuyo nga pagsupak sa mga sugo sama ra nga mipahilayo gikan sa Langitnong Amahan ug nagsulti Kaniya nga dili Siya sama kaimportante sa atong mga higala o sa ubang mga tawo.
Ang Langitnong Amahan nahigugma nato, ug Siya mopanalangin kanato sa giya sa Iyang Espiritu kon kita mosunod sa Iyang mga sugo. Kon kita magmasulundon, ang Espiritu motudlo nato og mas labaw kaysa atong makat-unan pinaagi sa pag-eksperimento sa sala.
Dili Kita Kinahanglang Mag-eksperimento
Akong tudloan ang imong higala nga “bisan unsa nga maayo nagagikan sa Dios, ug bisan unsa nga dautan nagagikan sa yawa.” (Alma 5:40). Ipasabut usab nako nga ang matag buhat dunay mga sangputanan ug nga kita kinahanglang dili mobuhat og bisan unsa nga makadaut kanato. Dili kinahanglan nga makasinati kita og dautan. Daghan na kaayo ang dautan nga naglibut kanato, ug sayon kaayo makita nga daghang mga tawo ang nagpuyo sa kaalaot tungod kay sila wala magsunod sa mga sugo.
Vinicius S., 17 anyos, São Paulo, Brazil
Isulti Giunsa Nimo Pagbuntog ang Tintasyon
Sultihi ang imong higala nga unsay importante mao ang iyang kahimtang sa atubangan sa Ginoo. Kinahanglang dili nato itugyan ang atong mahangturong kaluwasan nga ilis alang sa temporal nga kasinatian. Usab, mas dako ka pa og ikatabang sa imong higala kon ikaw mosulti kaniya giunsa nimo sa pagbuntog ang tintasyon.
Emily G., 19 anyos, Puerto Rico
Kita Adunay Balaan nga Potensyal
Mabination nimong mapasabut ang imong higala nga samtang ang usa ka dili maayo nga pagpili ingon og dili makadaot, mosangpot kini ngadto sa mas seryoso nga mga sala. Mahimo usab nga imong ipakigbahin kini nga kasulatan: “Kay Ako ang Ginoo dili makatan-aw diha sa sala uban sa labing gamay nga matang sa pagtugot” (D&P 1:31). Pahinumdumi ang imong higala nga bisan ang usa ka kasinatian sa sala makapabungol nato sa tingog sa Espiritu. Labaw sa tanan, pahibaloa siya nga imo siyang gimahal ug nga ang paghimo og matarung nga mga pagpili kabahin sa iyang balaan nga potensyal isip usa ka anak nga babaye sa Dios.
Adriana F., 17 anyos, Arizona, USA
Bisan Kausa Ra Makadaot
Ang tanang dili maayo nga mga butang, bisan og kausa ra nimo kini buhata, makapapahawa sa Espiritu. Kon ang Espiritu mobiya, mas sayon alang ni Satanas sa pagtintal nimo sa pagbuhat pa og dugang dili maayo nga mga butang. Usab, kinahanglan hinulsulan nimo ang imong tanang mga sala bisan kapila ka pa nakabuhat niini, ug ang paghinulsol og seryoso nga mga sala mahimong taas ug sakit nga proseso.
Emily L., 14 anyos, Utah, USA
Basin og Ikaw Dili Makahimo sa Paghunong
Akong sultihan ang akong higala nga dili gani maghunahuna mahitungod niini. Dili maayong ideya sa pagbuhat bisan kausa lang sa dili maayo nga butang tungod kay basin dili na ikaw makahunong kon makasugod ka na. Ang Langitnong Amahan naghatag kanato og mga sugo sa pagtabang kanato nga mahimong luwas ug malipayon.
Douglas B., 13 anyos, California, USA
Pagpabilin nga Lig-on
Isulti kaniya pag-usab nga ikaw nagmahal kaniya ug gusto nga motabang niya sa pagpili og matarung. Nasayud ko gikan sa personal nga kasinatian nga dili kinahanglang maghimo kita og sama nga mga pagpili sama sa uban aron mailhan uban nianang tawhana.” Samtang magpuyo kita sa ebanghelyo, ang Espiritu makatabang nato nga masayud unsaon sa pagpakigsandurot ngadto sa mga tawo. Pahinumdumi ang imong higala nga kinahanglan siyang magpabilin nga lig-on aron siya makatabang sa uban nga mosunod sa mga sugo. Pag-ampo nga ikaw makahimo sa pagtabang ug pagserbisyo kaniya.
Vanina P., 19 anyos, Buenos Aires, Argentina
Nagsugod Kini sa Gamay
Si Elder Jeffrey R. Holland kausa miingon nga “ang pagbiyahe og usa ka libo ka milya magsugod sa usa ka lakang, busa bantayi ang imong lakang” (“Walay Luna alang sa Kaaway sa Akong Kalag,” Liahona, Mayo 2010, 45). Akong tabangan ang akong higala nga makasabut nga si Satanas mogamit og ginagmay nga mga tintasyon aron kita makasugod og agi sa dautan nga dalan. Kon mosulay kamo og butang nga dili maayo bisan kausa, nagtugot kamo ni Satanas ug sa iyang mga sumusunod sa pagsugod sa pagtintal kaninyo sa pagbuhat niini pag-usab ug pag-usab.
Similoni F., 18 anyos, Utah, USA