Pagkinabuhi sa Kalibutannga Paspas ang Kausaban
Ni Presidente Dieter F. Uchtdorf
Ikaduhang Magtatambag sa Unang Kapangulohan
Gikan sa pakigpulong nga gihatag atol sa Oktubre 2010 nga kinatibuk-ang komperensya.
Kon ang kinabuhi ug ang kapaspas sa kausaban ug daghang stress nakapalisud ninyo nga mobati nga malipay, tingali karon mao ang maayong panahon sa pagtutok sa mga butang nga labing mahinungdanon.
Litrato sa eroplano © 06 photo/dollar Photo Club; paghulagway sa litrato pinaagi ni David Stoker
Nasulayan na ba ninyo nga mosakay sa eroplano ug nakasinati og turbulence? Ang komon nga hinungdan sa turbulence mao ang kalit nga pagkausab sa huyop sa hangin hinungdan nga ang eroplano moyango-yango, mokurog, ug motakilid. Samtang ang mga eroplano gihimo aron makabatok sa mas grabe nga turbulence nga inyong masinati panahon sa kasarangan nga biyahe, apan kini makataranta gihapon sa mga pasahero.
Sa inyong hunahuna unsa man kaha ang buhaton sa mga piloto kon makasinati og turbulence? Ang usa ka estudyante nga piloto tingali magtuo nga ang pagpakusog sa lupad maayo nga paagi kay dali nilang malapsan ang turbulence. Apan kana mahimong sayop nga buhaton. Ang propesyonal nga mga piloto nakasabut nga adunay kasarangan nga gipaspason sa paglahutay sa turbulence [optimum turbulence penetration speed] nga mopaminus sa negatibong mga epekto sa turbulence. Ug sa kasagaran nagpasabut kana sa pagpahinay sa inyong gipaspason sa pagpalupad. Sama nga baruganan magamit usab sa pagbutang og bugdo sa dalan aron sa pagpahinay sa sakyanan [speed bumps] diha sa karsada.
Busa, maayo nga tambag ang pagpahinay og gamay, ipirmanente ang pagpalupad, ug motutok sa mga mahinungdanong butang kon makasinati og dili maayong mga kahimtang.
Ang Gipaspason sa Modernong Kinabuhi
Usa sa mga timailhan sa modernong kinabuhi maingon og kita naglihok nga paspas kaayo, bisan pa man sa turbulence o sa mga babag.
Sa pagkatinuod; ingon og sayon ra nga mahimong busy. Kitang tanan makahunahuna og daghang buluhaton nga mopuno sa atong eskedyul. Gani ang uban tingali magtuo nga ang ilang bili sa kaugalingon mag-agad sa kadaghan sa ilang buhatunon.
Ang maalamon mobuntog sa tintasyon nga makasinati og daghan kaayong buluhaton sa matag adlaw nga kinabuhi. Sila nagsunod sa tambag “Adunay mas daghang makahuluganon sa kinabuhi kaysa pagpapadali niini.”1 Buot ipasabut, sila nagtutok sa mga butang nga labing mahinungdanon.
Si Elder Dallin H. Oaks sa Korum sa Napulog Duha ka mga Apostoles mitudlo, “Kinahanglan atong ipalabay ang ubang maayo nga mga butang aron sa pagpili sa uban nga mas maayo o labing maayo tungod kay kini nag-ugmad og hugot nga pagtuo kang Ginoong Jesukristo ug naglig-on sa atong mga pamilya.”2
Ang pagpangita sa pinakamaayong mga butang dili kapugngan nga mogiya ngadto sa sukaranang mga baruganan sa ebanghelyo ni Jesukristo—ang yano ug matahum nga mga kamatuoran nga gipadayag kanato sa usa ka mapinanggaon, mahangturon, ug nahibalo sa tanan nga Amahan sa Langit.
Unsaon Nako Pagkat-on sa Unsay Labing Mahinungdanon?
Nagtuo ko nga kasagaran nato nakasabut na kon unsa ka importante ang mga sukaranan. Usahay mabalda lang ta sa daghan kaayong butang nga maingon og mas makapadani.
Ang inimprinta nga mga materyal, ang mga nagkatap nga tinubdan sa media, mga gamit ug himan nga elektronik—makatabang kon tukma ang pagkagamit—mahimo nga makadaut o makapugong sa atong maayo nga pakigrelasyon sa uban.
Bisan pa taliwala sa nagkadaiyang mga tingog ug mga kapilian, ang mapainubsanong Tawo sa Galilea nagbarug nga andam, nagpaabut. Ang Iyang yano nga mensahe: “Sumunod kanako” (Lucas 18:22). Ug dili Siya mamulong gamit og megaphone apan pinaagi sa hinay, hinagawhaw nga tingog (tan-awa sa 1 Mga Hari 19:12). Sayon ra kaayong mawala ang sukaranang mensahe sa ebanghelyo taliwala sa bul-og sa impormasyon nga anaa kanato bisan asa.
Ang balaang mga kasulatan ug ang pulong nga gipamulong sa buhing mga propeta nagpasabut gayud sa sukaranang mga baruganan ug mga doktrina sa ebanghelyo. Ang rason nganong mibalik kita niining sukaranang mga baruganan, sa putli nga mga doktrina, tungod kay mao kini ang ganghaan ngadto sa mga kamatuoran nga may lawom nga kahulugan.
Mga Sukaranan: Upat ka Mahinungdanon nga Relasyon
Samtang kita modangop sa atong Langitnong Amahan ug magtinguha sa Iyang kaalam kabahin sa mga butang nga labing mahinungdanon, balik-balik natong makat-unan ang kaimportante sa upat ka mahinungdanong mga relasyon: ngadto sa atong Dios, sa atong pamilya, sa atong isigkatawo, ug sa atong kaugalingon. Samtang kita magtimbang-timbang sa atong kaugalingon nga kinabuhi uban sa andam nga hunahuna, atong makita kon asa kita nalayo sa pinakamaayong paagi. Ang mga mata sa atong panabut mabuksan, ug atong mahibaloan unsay angayang buhaton sa pagpaputli sa atong kasingkasing ug sa pag-usab sa atong gitutokan sa kinabuhi.
Una, ang atong relasyon uban sa Dios sagrado kaayo ug labing mahinungdanon. Kita Iyang espiritu nga mga anak. Siya ang atong Amahan. Tinguha Niya ang atong kalipay. Samtang kita nagtinguha Kaniya, samtang nagkat-on kita mahitungod sa Iyang Anak, si Jesukristo, samtang atong ablihan ang atong mga kasingkasing ngadto sa impluwensya sa Espiritu Santo, ang atong kinabuhi mahimong mas lig-on ug sigurado. Masinati nato ang mas dako nga kalinaw, kalipay, ug katumanan samtang ihatag nato ang atong pinakamaayo sa pagpuyo sumala sa mahangturon nga plano sa Dios ug sa pagsunod sa Iyang mga sugo.
Atong mapalambo ang atong relasyon ngadto sa Langitnong Amahan pinaagi sa pagkat-on mahitungod Kaniya, sa pagpangamuyo Kaniya, sa paghinulsol sa atong mga sala, ug sa aktibo nga pagsunod kang Jesukristo; kay “walay bisan kinsa nga makaadto sa Amahan, gawas kon pinaagi ni [Kristo]” (Juan 14:6). Sa paglig-on sa atong relasyon ngadto sa Dios, kita nagkinahanglan og makahuluganon nga panahon nga mag-inusara uban Kaniya. Ang hilom nga pag-focus sa inadlaw nga personal nga pag-ampo ug pagtuon sa kasulatan, kanunay nagtinguha nga mahimong takus sa magamit nga rekomend sa templo—kini ang pipila sa maalamong mga puhunan sa atong panahon ug paningkamot nga mas maduol sa atong Langitnong Amahan. Atong patalinghugan ang imbitasyon diha sa Salmo: “Humilom kamo, ug ilhon ninyo nga ako mao ang Dios” (Salmo 46:10).
Ang atong ikaduha nga mahinungdanon nga relasyon mao ang uban sa atong pamilya. Tungod kay “walay laing kalampusan ang ikahulip sa kapakyas”3 kinahanglan gayud nga hatagan nato og dakong prayoridad ang atong pamilya. Magtukod kita og lig-on ug mahigugmaong relasyon sa pamilya pinaagi sa pagtinabangay og himo og yano nga mga butang, sama sa dungan nga pagpanihapon ug family home evening ug mag-uban nga maglingaw-lingaw lang. Sa mga relasyon sa pamilya ang gugma sa tinuoray gi-espelling nga o-r-a-s, oras. Ang paggahin og oras sa usag usa mahinungdanon sa panag-uyon diha sa panimalay. Mag-istoryahay kita, kaysa lain nga butang, sa usag usa. Magkat-on kita gikan sa usag usa, ug magdayeg sa atong mga kalainan ingon man sa atong mga pagkasusama. Nag-establisar kita og balaan nga pagkasuod sa usag usa samtang kita moduol sa Dios pinaagi sa pamilya nga pag-ampo, pagtuon sa kasulatan, ug pagsimba sa adlaw nga Dominggo.
Ang ikatulo nga mahinungdanon sa relasyon mao ang sa atong isigkatawo. Mapalambo nato kini nga pakigrelasyon ngadto sa usa ka tawo sa kada higayon—pinaagi sa pagkasensitibo sa panginahanglan sa uban, pagserbisyo kanila, ug paghatag sa atong panahon ug mga talento. Nakadayeg gyud ko sa usa ka sister kinsa nabug-atan sa mga hagit sa pangedaron ug sa sakit apan nakahukom nga bisan dili na siya makahimo og daghan, mahimo siya nga maminaw. Busa matag semana mangita siya og mga tawo nga daw nahasol o nawad-an sa kadasig, ug migahin siya og panahon ngadto kanila, sa pagpaminaw. Dako siya nga panalangin sa kinabuhi sa daghang mga tawo.
Ang ikaupat nga mahinungdanong sa relasyon mao ang sa atong kaugalingon. Daw lain hunahunaon ang pagbaton og relasyon sa atong kaugalingon, apan ato kining gibuhat. Ang uban dili makasabut sa ilang kaugalingon Ilang gisaway ug gipakaubos ang ilang kaugalingon tibuok adlaw hangtud nga magsugod sila og kasuko sa ilang kaugalingon. Akong isugyot nga inyong minusan ang inyong pagdali-dali ug mogahin og gamayng panahon nga mas maila-ila ang inyong kaugalingon. Pagsuroy-suroy diha sa kinaiyahan, tan-awa ang pagsubang sa adlaw, tagamtama ang gilalang sa Dios, pamalandunga ang mga kamatuoran sa gipahiuli nga ebanghelyo, ug kaplagi sa personal nga paagi kon unsay kahulugan niini diha kaninyo. Pagkat-on sa paglantaw sa inyong kaugalingon sama sa paglantaw kaninyo sa Langitnong Amahan—isip Iyang talagsaon nga anak nga babaye o lalaki uban sa balaanong potensyal.
Kalig-on diha sa Pagkayano
Ang kalig-on dili moabut gikan sa dinali-dali nga kalihokan apan gikan sa pinahimutang nga lig-ong pundasyon sa kamatuoran ug kahayag. Moabut kini sa pagpahimutang sa atong atensyon ug mga paningkamot sa mga sukaranan sa gipahiuli nga ebanghelyo ni Jesukristo. Moabut kini gikan sa paghatag og pagtagad sa balaanong mga butang nga labing mahinungdanon.
Atong ipayano og gamay ang atong kinabuhi. Atong buhaton ang mga kausaban nga gikinahanglan aron mausab atong pagtutok sa kinabuhi ngadto sa mahinungdanon nga katahum sa kayano, dalan sa mapainubsanong Kristiyano nga pagkadisipulo—ang dalan nga padulong kanunay ngadto sa kinabuhi nga may kahulugan, kalipay, ug kalinaw.