Ang Puzzlesa Pagtuon sa Kasulatan
Ang tagsulat nagpuyo sa Utah, USA.
Sama sa pagporma og puzzle, matag higayon nga magtuon kamo sa mga kasulatan, magkadako ug magkadako ang inyong panan-aw sa mga kamatuoran sa Dios.
Mga piraso sa puzzle pinaagi sa iStockphoto/Thinkstock; mga paghulagway pinaagi ni Taia Morley
Niadtong Septyembre 2011, ang mga estudyante sa unibersidad sa Vietnam mihimo og bag-ong rekord sa kalibutan pinaagi sa pagporma sa pinakadako nga jigsaw puzzle sa kalibutan. Miabut og 17 ka oras ang 1,600 ka estudyante sa pagporma sa tanang 551,232 ka mga piraso.
Nakahimo sila og 48 por 76 ka pye (15 por 23 ka metros) nga puzzle nga nagpakita sa buwak sa lotus nga dunay unom ka mga dahon nga nagrepresentar sa mga tawo, hiyograpiya, kasaysayan, kultura, edukasyon, ug ekonomiya. Hunahunaa kini—sobra sa tunga ka milyon ka gagmayng piraso nga nagsumpay-sumpay aron maporma ang usa ka higanteng litrato. Ang matag piraso sa puzzle tingali dili importante ug dili makapaikag, apan ang puzzle dili makompleto kon bisan usa lang ka piraso ang mawala.
Ang mga kasulatan sama sa jigsaw puzzle: kon mas daghang mga piraso ang maporma, mas makakita kamo sa mga kamatuoran sa plano sa Dios. Kon magkadako ang inyong panan-aw niana nga plano, inyong makita nga ang mga kasulatan makapaikag ug importante sa inyong kinabuhi.
Aniay pipila ka mga sugyot sa pagtuon sa kasulatan sa pagtabang ninyo nga makakita sa dako nga litrato—ug sa gagmay nga mga detalye. Kon inyong sumpay-sumpayon kini nga mga piraso, inyong makita ang talagsaong mga kamatuoran nga naghulat ninyo diha sa mga kasulatan.
Doktrina: Dagko nga mga Piraso Nga Nagtudlo og Mahangturong mga Kamatuoran
Ang mga kasulatan nagtudlo sa mga doktrina ug mga baruganan sa ebanghelyo “Ang tibuok kasulatan gituga sa Dios ug may kapuslanan alang sa pagpanudlo,” (2 Timoteo 3:16). Tungod kay maluwas lamang kita pinaagi ni Jesukristo (tan-awa sa Juan 14:6), kinahanglan kitang makat-on mahitungod Kaniya ug sa Iyang doktrina. Mao nga ang Ginoo misugo nato sa “[pag]susi sa mga kasulatan, kay … kini mao ang nagapanghimatuod mahitungod kanako” (Juan 5:39).
Mga Tawo: Mabulukon nga mga Piraso Nga Nagtudlo og mga Leksyon
Adunay gatusan ka mga tawo nga mabasa sa mga kasulatan. Hain niini ang inyong gidayeg pag-ayo? Tingali modayeg mo ni Ammon sa iyang maisugong pagsunod sa atubangan sa kakuyaw. O tingali maghunahuna mo ni Job ug sa iyang dili matarug nga pagtuo ug kaligdong.
Nakabasa ba mo sa asno nga nakigsulti sa iyang agalon (tan-awa sa Numeros 22)? o sa dautan nga hari kinsa andam nga mobiya sa iyang gingharian aron lang mapasaylo (tan-awa sa Alma 22)? o sa babaye nga nailhan sa tibuok siyudad isip usa ka mahiyason nga tawo (tan-awa sa Ruth 1–4)?
Dunay mga tawo sa mga kasulatan kinsa dili kaayo dalaygon. Unsay inyong makat-unan gikan nila ug sa dili maayo nga mga pagpili nga ilang gihimo?
Hatagig pagtagad ang mga tawo nga inyong mabasahan diha sa mga kasulatan, ug pangutan-a ang inyong mga kaugalingon unsaon ninyo pagsunod ang ilang maayong mga ehemplo ug paglikay sa ilang mga sayop. Ang mga piraso sa puzzle sa ilang mga kinabuhi mao ang pipila sa labing makapaikag ug mabulukon nga mga piraso sa tanan. Ang ilang mga kasinatian mao ang halandumon nga paagi sa pagkat-on ug paghinumdom sa mga baruganan sa ebanghelyo.
Simbolismo: Pagdiskobre sa Natago nga mga Piraso
Usahay ang mga kasulatan mogamit og mga simbolo sa pagtudlo sa mga baruganan sa ebanghelyo. Mawala ang ubang mga piraso sa puzzle kon dili ninyo makita ang simbolismo. Dugang sa mga klase sa Simbahan ug seminary, mga tabang sa pagtuon sama sa Giya ngadto sa mga Kasulatan o mga manwal sa seminary ug institute makatabang ninyo nga makita ang nawala nga mga piraso.
Sama pananglit, ang istorya ni Abraham ug Isaac (tan-awa sa Genesis 22) makapadasig, apan kini dunay mas lawom nga kahulugan kon inyong madiskobrehan nga simbolo kini sa sakripisyo sa atong Langitnong Amahan ug sa maulaong sakripisyo sa Manluluwas alang nato (tan-awa sa Jacob 4:5).
Ang Espiritu Santo: Pagpangita sa mga Piraso Nga Nagkonektar
Ang pipila ka piraso sa puzzle mora og mohaum, apan dili diay. Ang Espiritu makatabang ninyo nga makakita sa mga piraso nga mohaum. Sa inyong pagpangayo sa Iyang tabang pinaagi sa pag-ampo ug pagpamalandong, ang Espiritu makatabang ninyo nga makakita kon sa unsa nga paagi nga ang mga bersikulo nga inyong gitun-an kaniadto mokonektar sa inyong gitun-an karon ingon man usab sa unsa nga paagi kadto nga mga pagtulun-an mokonektar sa inyong kinabuhi. Sa kasagaran, makadawat kamo og inspirasyon gikan sa mga pulong sa mga kasulatan apan gikan usab sa Espiritu samtang kamo mamalandong sa mga butang nga inyong gibasa.
Kagamitan: Pagporma sa mga Piraso
Dili ninyo makita unsa nga litrato ang maporma sa puzzle kon dili ninyo pormahon ang mga piraso. Sa samang paagi, ang mga doktrina, mga baruganan, ug mga sugo nga inyong nakat-unan gikan sa mga kasulatan dili makatabang ninyo gawas kon inyong gamiton unsay inyong nakat-unan (tan-awa sa Juan 7:17). Samtang kamo maningkamot matag adlaw sa pagsunod sa mga baruganan sa ebanghelyo nga gitudlo diha sa mga kasulatan, ang inyong pagtuo ug pagpamatuod magkalig-on, ug ang pagtuon sa kasulatan mahimong usa ka importante nga bahin sa inyong kinabuhi.