Ang Mahimayaong Adlaw sa Pagpahiuli sa Priesthood

Ni Elder L. Tom Perry

Sa Korum sa Napulog Duha ka mga Apostoles

Dako atong pasalamat nga gipahiuli sa Ginoo ang Iyang Simbahan ug Iyang priesthood dinhi sa yuta.

Detalye gikan sa Ang Pagpahiuli sa Aaronic Priesthood, ni Del Parson

Sa dihang ang Manluluwas nga si Jesukristo mianhi sa yuta, usa sa unang mga butang nga Iyang gihimo mao ang pag-organisar sa Iyang Simbahan. Ang Bag-ong Tugon nagsulti nato nga Siya “miadto sa kabungturan aron sa pag-ampo, ug sa tibuok gabii siya nagpadayon sa pag-ampo ngadto sa Dios.” Ug sa pagkaadlaw na, gitawag Niya ang Iyang mga tinun-an. “Ug gikan kanila iyang gipili ang Napulog Duha nga iyang ginganlan nga mga apostoles” (Lucas 6:12–13).

Unya gidala Niya sila si Pedro, ug si Santiago, ug si Juan ngadto sa hataas nga bukid, ug didto si Pedro nakadawat sa mga yawe sa priesthood (tan-awa sa Mateo 17:1–9; tan-awa usab sa 16:18–19). Si Pedro maoy nahimong responsable sa paghupot sa tanang mga yawe dinhi sa yuta sa paggiya sa Simbahan human mobiya ang Manluluwas.

Sa pagsunod sa sugo sa Manluluwas (tan-awa sa Marcos 16:15), ang mga Apostoles misangyaw sa ebanghelyo ug miorganisar og mga branch sa Simbahan. Sa daghang mga higayon, kausa ra sila makabisita sa mga branch, nga nakahatag nila og gamay nga oportunidad sa pagtudlo ug pagbansay. Ang ideya sa paganismo sa wala madugay misulod, ug lahi nga mga aspeto sa doktrina sa Manluluwas nausab o giusab (tan-awa sa Isaias 24:5). Sa pagkatap na sa apostasiya, gikinahanglan na nga kuhaon sa Ginoo ang priesthood gikan sa yuta. Isip resulta, ang yuta wala nay panalangin sa priesthood sulod sa dugay-dugay nga panahon.

Sa pag-establisar pag-usab sa Iyang gingharian dinhi sa yuta uban sa gahum sa priesthood, ang Ginoo mipahiuli sa ebanghelyo.

Hinumdumi ang Pagpahiuli

Samtang si Joseph naghubad sa Basahon ni Mormon ug si Oliver Cowdery mao ang iyang tigsulat, ilang nabasahan ang istorya sa 3 Nephi sa nabanhaw nga Manluluwas nga nagbisita sa Kasadpang Bahin sa Kalibutan. Sa ilang pagkakat-on sa Iyang pagtulun-an mahitungod sa bunyag (tan-awa sa 3 Nephi 11:23–28), naghunahuna sila sa daghang mga paagi sa bunyag nga gigamit sa ilang panahon ug mahitungod sa kinsay adunay awtoridad sa pagbunyag.

Si Joseph ug Oliver nakahukom nga mangutana sa Ginoo, nag-ampo didto sa kakahoyan duol sa panimalay ni Joseph ug Emma. Didto, ang importante nga pagpadayag nahitabo diin si Juan Bautista nagpakita, mipandong sa iyang mga kamot sa ilang mga ulo ug miingon: “Diha kaninyo nga akong kauban nga mga sulugoon, sa ngalan sa Mesiyas, ako motugyan sa Pagkapari ni Aaron, nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala; ug kini dili na pagakuhaon pag-usab gikan sa yuta, hangtud nga ang mga anak ni Levi maghalad pag-usab og halad ngadto sa Ginoo diha sa pagkamatarung” (D&P 13:1).

Usa kadto ka mahimayaon nga panghitabo. Manghinaut ko nga ang tanang naghupot sa priesthood mahinumdom sa Mayo 15, 1829 isip sagrado nga hitabo sa kasaysayan sa Simbahan ug isip usa ka espesyal nga hitabo sa kasaysayan sa kalibutan.

Ang mga Artikulo sa Hugot nga Pagtuo nagsulti nato “nga ang usa ka tawo kinahanglan gayud pagatawgon sa Dios, pinaagi sa pagpanagna, ug pinaagi sa pagpandong sa mga kamot niadto kinsa adunay pagtugot sa pagsangyaw sa Ebanghelyo ug sa pagpangalagad sa mga ordinansa niini” (Mga Artikulo sa Hugot nga Pagtuo 1:5).

Dili sulagma ang pagtawag sa mga lalaki; gitawag sila pinaagi sa inspirasyon ug panagna. Adunay direkta nga linya sa inspirasyon gikan sa Ginoo ngadto niadtong gitawag sa paggamit sa priesthood. Mao kana ang paagi sa Ginoo sa pagdumala sa Iyang Simbahan, ug nga mao ang paagi sa Iyang pagtawag ni Propeta Joseph Smith.

Pagpuyo nga Takus sa Priesthood

Ang pagdawat sa priesthood dili katungod nga awtomatik nga moabut sumala sa edad. Kinahanglan kitang mahimong takus ug “matinud-anon ngadto sa pagbaton niining duha ka mga pagkapari” (D&P 84:33). Basahon nato pag-ayo ang panumpa ug pakigsaad sa Melchizedek Priesthood, nga piho nga nagtudlo sa mga kondisyon nga kinahanglan natong masabtan ug uyunan aron sa pagdawat sa priesthood.

“Busa, kadtong tanan kinsa modawat sa pagkapari, makadawat niini nga panumpa ug pakigsaad sa akong Amahan, diin siya dili makalapas, ni mahimo kini nga mausab.

“Apan kinsa ang molapas niini nga pakigsaad human siya makadawat niini, ug sa hingpit mobiya gikan niini, walay kapasayloan sa mga sala dinhi niini nga kalibutan ni sa kalibutan nga moabut” (D&P 84:40–41).

Seryoso kaayo kana. Tingali magtuo kamo nga ang mga lalaki maninguha sa paglikay gikan sa Aaronic ug Melchizedek Priesthood, apan ang sunod nga bersikulo nag-ingon, “alaot ngadto sa tanan kadto kinsa dili modawat niini nga pagkapari” (D&P 84:42; emphasis gidugang).

Kon kita modawat sa priesthood ug magpuyo nga takus niini, kita makadawat sa mga panalangin sa Ginoo. Apan kon kita makalapas sa atong pakigsaad ug mopalayo gikan sa atong priesthood, dili kita makadawat sa mga panalangin sa Ginoo o mahimong “pinili sa Dios” (D&P 84:34).

Ang Aaronic Priesthood, nga madawat pinaagi sa pakigsaad, makatabang sa batan-ong mga lalaki sa pagdawat sa Melchizedek Priesthood, nga mao ang mas labaw nga priesthood nga nadawat pinaagi sa panumpa ug pakigsaad.

Tabang pinaagi sa Pagserbisyo

Ang priesthood usa ka mahinungdanong panag-inigsoonay—tingali ang labing mahinungdanong panag-inigsoonay sa kalibutan. Ang mga relasyon sa atong mga kaigsoonan sa priesthood kinahanglang mas labaw kaysa bisan unsang ubang mga relasyon gawas alang niadtong anaa sa atong indibidwal nga mga pamilya. Dugang sa panag-inigsoonay, ang priesthood usa ka organisasyon sa pagserbisyo diin atong ihatag ang atong kaugalingon sa pagtabang sa uban ug paghimo sa mga butang nga maayo.

Gikan sa panahon nga ang usa ka batan-ong lalaki modawat sa Aaronic Priesthood ug giordinahan nga usa ka deacon o usa ka teacher o usa ka priest, nahisakop siya sa usa ka korum. Kanang panag-inigsoonay sa korum magpadayon kon siya modawat na sa Melchizedek Priesthood ug maordinahan nga usa ka elder. Ang mga korum sa priesthood importante.

Karong bag-o usa ka batan-ong lalaki nga momisyon namulong sa miting sa sakrament. Sa iyang pakigpulong iyang gipasabut nga siya ug ang iyang upat ka mga higala nagsugod sa panag-uban sa korum sa mga deacon. Miingon siya nga ang panaghigalaay ug suporta nga ilang gihatag sa usag usa sa ilang pag-atubang sa mga hagit ug pagpadayon sa pag-abante sa Aaronic Priesthood nakatabang nila sa pagkab-ot sa ilang tumong sa pagserbisyo og full-time nga mga misyon.

Nahisakop ako sa usa ka korum. Espesyal kaayo kini nga korum. Grupo kini sa mga lalaki nga gikan sa tanang matang sa panarbaho ug mga propesyon. Apan kon kami maglihok isip usa ka korum, nagkahiusa kami sa katuyoan.

Kon ang mga sakop sa korum magkauyon sa usa ka dalan nga subayon ug magtinabangay ubos sa impluwensya sa Espiritu Santo, mobuhat sila subay sa kabubut-on sa Ginoo. Gawas kon kamo adunay hingpit nga panag-uyon sa mga sakop sa korum, dili kamo mopadayon. Hunahunaa kon sa unsang paagi kana makapanalipod sa inyong tibuok kinabuhi.

Ang matag lider sa korum kinahanglang dunay listahan sa mga sakop sa korum, ug siya kinahanglang makahibalo niadtong adunay mga problema kon unsaon nila sa pagpakabuhi. Kon dunay daghang ingon nga mga batan-ong lalaki sa iyang korum, ang lider kinahanglang mohimo og prayoridad sa iyang listahan, maghatag og pagtagad niadtong mas labing nagkinahanglan sa pag-amuma. Dayon siya ug ang ubang mga sakop sa korum magsugod sa pagbisita kanila, mohimo kanila nga mga higala ug mga kauban sa korum sa paagi nga makapabalik nila ngadto sa pagpakigdait.

Ang korum sa priesthood adunay katungdanan ug responsibilidad nga “magpasidaan, magpatin-aw, mag-awhag, ug magtudlo, ug magdapit sa tanan sa pagduol ngadto kang Kristo” (D&P 20:59). Ang pagserbisyo diha sa korum sa priesthood importante sa atong kalamboan dinhi sa yuta. Busa, ang tanang mga sakop sa korum kinahanglang mokonsiderar niini nga mga katungdanan isip kabahin sa ilang obligasyon sa pagserbisyo sa gingharian sa atong Amahan sa Langit.

Nasayud kitang tanan nga nag-atubang kita og mga hagit sa atong mortal nga pagsulay. Gawas kon kita dunay suporta sa pagtabang nato samtang magpadayon sa kinabuhi, atong makaplagan ang atong mga kaugalingon nga walay sakto nga plano, usa ka sakto nga direksyon, o usa ka sakto nga mapa sa paggiya nato. Ang sakto nga naglihok nga korum makatabang nato sa paghimo og plano ug mapa nga mogiya nato balik ngadto sa presensya sa atong Amahan sa Langit.

Pagmapasalamaton

Ang mga bishop naghupot sa mga yawe sa pagdumala sa ilang ward, lakip sa batan-ong mga lalaki sa Aaronic Priesthood. Ang bishop, gani, mao ang presidente sa korum sa mga priest sa iyang ward. Tabangan niya ang batan-ong mga lalaki nga mahimong takus nga modawat ug molambo diha sa Aaronic Priesthood ug mangandam nga modawat sa Melchizedek Priesthood. Tabangan niya sila nga makasabut sa mga obligasyon ug mga panalangin nga moabut ngadto sa mga tighupot sa priesthood. Tabangan niya sila nga makakat-on sa pagpalambo sa priesthood pinaagi sa paghatag kanila og mga buluhaton nga makatabang kanila nga moserbisyo ug mangalagad ngadto sa uban.

Ang mga yawe nga iya sa Aaronic Priesthood magpahinumdom nato nga kita kinahanglang magmapasalamaton kanunay sa gipahiuli nga priesthood, uban sa gahum, awtoridad, ug mga responsibilidad niini: “Ang gahum ug pagtugot sa ubos, o sa Aaronic nga Pagkapari, mao ang paghupot sa mga yawe sa pagpangalagad sa mga anghel, ug sa pagpangalagad diha sa dayag nga mga ordinansa, ang sulat sa ebanghelyo, ang bunyag sa paghinulsol alang sa kapasayloan sa mga sala, nga nahiuyon sa mga pakigsaad ug mga sugo” (D&P 107:20).

Akong hagiton ang batan-ong mga lalaki sa pagtahud sa priesthood nga ilang gihuptan ug sa pagpangandam sa paglambo diha sa matag katungdanan sa Aaronic Priesthood samtang sila mangandam alang sa dugang nga panalangin sa pagdawat sa Melchizedek Priesthood, magserbisyo sa Ginoo isip full-time nga mga misyonaryo ug sa katapusan maminyo diha sa Iyang balaan nga templo.

Mopamatuod ko nga walay mortal nga tawo nga mogiya niini nga Simbahan. Kini ang Simbahan sa Manluluwas, ug gigiyahan Niya kini pinaagi sa priesthood, nga Iyang gitugyan ngadto sa mga lalaki sa kalibutan aron sila makalihok isip Iyang mga tinugyanan sa paggiya sa Iyang Simbahan ug pagpahigayon sa sagrado nga mga ordinansa. Mapasalamaton kita nga gipahiuli sa Ginoo ang Iyang Simbahan ug ang Iyang priesthood dinhi sa kalibutan.