Ang Miulbo Nako nga mga Peaches
Mary Biesinger, Utah, USA
Midagan ko padulong sa kusina ug nakita ang nabuak nga bildo ug nagpilit nga mga peaches nga nagkatag sa kwarto.
Mga paghulagway pinaagi ni Bradley H. Clark
Nagtuo ko nga ako ang perpekto nga ginikanan … hangtud nga duna koy mga anak.
Alang nako, ang pagkaginikanan usa ka kalayo sa magtutunaw. Ang akong mga kahuyang ingon og mogawas kon ako ma-stress, kulang og katulog, nabalaka, o nasuko. Dayag lang, ang mga panalangin sa pagkaginikanan nakatapak niadtong mga higayona, apan akong namatikdan nga dali ko masuko. Makauulaw ang pag-angkon, apan ako mosinggit o molabay sa mga butang aron makuha nako ang atensyon sa akong mga anak.
Magsige ko og saad nga dili na masuko, apan masuko gihapon ko panahon sa kakapoy. Ang Langitnong Amahan nasayud nga nagkinahanglan ko og talagsaong butang sa pagtabang nako.
Usa ka gabii human sa taas nga adlaw sa pagbinotilya sa mga peaches, akong gibutang ang katapusang grupo ug nakahukom nga motagpilaw og kadiyot. Nakasiguro ko nga makamata aron sa pagkuha sa mga botilya gikan sa steamer.
Wala ko makamata.
Ang akong bana, si Quinn, ug ako nakugang sa tingog sa mibuto nga mga garapon. Midagan ko padulong sa kusina ug nakita ang nakagay nga bildo ug nagpilit nga mga peaches nga nagkatag sa kwarto. Ingon og, mihubas ang tubig sa steamer, ang kainit ug pressure nagkakusog, ang tabon sa steamer nalagpot, ug unom sa pito ka mga garapon sa mga peach mibuto.
“Limpyohan ni nako sa buntag,” miingon ko.
Dili maayo nga ideya.
Pagkabuntag ang init nga naglaputayng peach migahi na nga mga bundo nga puno sa mga bildo diha sa tibuok kusina ug kan-anan. Ang mga tipaka sa garapon sa peach miabut gani sa luyo sa mga appliances ug ngadto sa tanang suok, lakip sa luyo sa refrigerator.
Ang pagpanglimpyo milungtad og daghang mga oras. Kinahanglan nakong ihumol ang mga bundo nga dunay mga tipaka sa botilya sa basa nga toalya nga papel ug dayon maningkamot nga matangtang kini nga dili ko masamad.
Samtang nanglimpyo ko, usa ka sinati nga tingog mihung-hung nako: Mary, kon moulbo ang imong kasuko, sama niining mga garapon, dili nimo sayon kini nga maayo. Dili nimo makita asa ug sa unsa nga paagi ang imong kasuko nakapasakit sa imong mga anak ug sa uban. Sama niining nagkatag, kana nga kasakit dali nga mogahi ug masakit.”
Sa kalit lang, ang pagpanglimpyo mihatag og bag-ong kahulugan. Ang leksyon gamhanan kaayo. Sama sa akong kasuko, walay dali nga pagpanglimpyo. Paglabay sa mga semana nakakita gihapon ko og mga piraso sa mibagtok nga peach nga napitlan og mga bildo.
Nag-ampo ko nga sa umaabut ang akong pasensya mahimong kalig-on imbis usa ka kahuyang. Sa pagkakaron, mapasalamaton ko nga ang Pag-ula sa Ginoo nagtabang nako nga mas makakontrol sa akong kadali masuko aron akong kapanalipdan ang akong mga minahal sa bisan unsa pa nga mga pagkakatag tungod sa pag-ulbo sa kasuko.