Apan Unsa Kaha Kon … ? Mga Pangutana kabahin sa Pagserbisyo og Misyon
Samtang nagkaduol na ang panahon sa pagserbisyo og misyon, tingali makapangutana mo sa imong kaugalingon, “Mahimo ba gyud nako kini?” Oo, mahimo gyud nimo kini! Mahimong dili kini sayon, apan dili nimo kini mahayan.
Ang pag-andam sa pagserbisyo og misyon mahimong makahadlok. Adunay daghang mga butang nga mahimo nimong kabalak-an—kwarta, kahibalo, pagkamaulawon—apan bisan unsa pa ang kabalaka, makakaplag ka og kasiguroan ug kaisug nga imong gikinahanglan. Ania ang pipila sa komon nga mga pangutana ug tubag aron pagtabang nimo sa pagbuntog sa kahadlok ug makakaplag og hugot nga pagtuo nga magpadayon.
Unsa kaha kon dili igo ang akong nasayran kabahin sa kasulatan o sa ebanghelyo?
Sigurado ang pagpangandam sa misyon naglakip sa pagkat-on sa ebanghelyo, apan dili nimo kinahanglan nga masayran ang tanan sa dili pa molarga. Sama pananglit, isip batan-on, si Elder Neil L. Andersen sa Korum sa Napulog Duha ka mga Apostoles nabalaka kay siya dili pa andam nga mag-misyon. Siya miingon, “Akong nahinumduman nga nag-ampo nga, ‘Langitnong Amahan, unsaon man nako sa pagserbisyo sa misyon nga ang akong nahibaloan gamay ra man kaayo?’ Ako mituo sa Simbahan, apan akong gibati nga ang akong espirituhanong kahibalo limitado kaayo. Samtang ako nag-ampo, ang pagbati miabut, “Ikaw wala masayud sa tanan, apan ikaw igo nga nasayud!’”1
Ang kahibalo sa ebanghelyo moabut samtang matinud-anon ka nga nagkat-on sa mga baruganan sa ebanghelyo ug nagtuon sa mga kasulatan, ug wala ka mag-inusara. Ang Espiritu Santo mogiya kanimo, ug ikaw makabaton og mga kompanyon, mga lider sa misyon, ug presidente sa misyon aron motabang kanimo sa imong paningkamot. Hinumdumi ang gitudlo ni Elder Jeffrey R. Holland sa Korum sa Napulog Duha ka mga Apostoles: “Ang gidak-on sa inyong pagtuo o sa inyong kahibalo dili mao ang importante—kondili ang kaligdong nga inyong gipakita ngadto sa inyong pagtuo ug sa kamatuoran nga inyong nahibaloan.”2
Unsa kaha kon ako dili sigurado nga ako adunay pagpamatuod?
Ang pagbaton og pagpamatuod mahinungdanon nga bahin sa imong pagpangandam sa misyon. Mahimong mobati ka nga huyang ang imong pagpamatuod, apan kini molambo samtang ikaw matinud-anong magkugi sa pagpalambo niini. Hinumdumi lang:
-
Pangita og hilom nga mga higayon sa pagtuon ug pag-ampo. Ikaw nagkinahanglan og panahon aron imong mabati ang pagdasig sa Espiritu.
-
Pagsunod sa ebanghelyo. Tan-awa sa Juan 7:17 aron masayud kon sa unsang paagi kini makatabang sa pagpalambo sa imong pagpamatuod.
-
Pagkat-on sa hinay-hinay. “Ang [imong] espirituhanong panaw mao ang proseso sa tibuok kinabuhi. Kita wala masayud sa tanang mga butang sa sinugdanan o bisan diha sa giagian. Ang atong pagkakabig miabut sa hinay-hinay.”3
Usab hinumdumi nga ang imong pagpamatuod mahimong mas lig-on kaysa imong gihunahuna. Si Elder Holland mipakigbahin niini nga istorya: “Usa ka 14 anyos nga batan-on miingon nako nga medyo nagduha-duha, ‘Brother Holland, dili pa ko makasulti nga ako nasayud nga ang Simbahan tinuod, apan mituo ko nga kini tinuod.’ Gigakos nako og hugot kaayo ang maong batan-on. Giingnan nako siya … nga ang pagtuo usa ka bililhon nga pulong, gani mas bililhon nga buhat, ug dili kinahanglan nga siya mangayog pasaylo tungod kay ‘mituo lamang.’ Siya akong giingnan nga si Kristo Mismo miingon, ‘Ayaw kahadlok, sumalig ka lamang.’ … Giingnan nako kining batan-on nga ang pagtuo mao ang unang lakang ngadto sa konbiksyon. … Giingnan nako siya nga mapasigarbuhon kaayo ko niya sa katinuod sa iyang paningkamot.”4
Unsa kaha kon mibati ko nga dili takus?
Kon ikaw may nahimong sayop sa imong kinabuhi, imo kining masulbad. Ang inyong bishop o presidente sa branch motabang nimo kon unsay angay nimong buhaton aron malimpyo pinaagi sa Pag-ula ni Jesukristo. Si Elder Richard G. Scott sa Korum sa Napulog Duha ka mga Apostoles miingon, “Ako kang giawhag sa dili pag-ampo aron masayud kon ikaw kinahanglan bang moadto [sa misyon]; kondili, mohangyo sa Ginoo sa paggiya kanimo sa bisan unsang paagi nga gikinahanglan aron mahimong takus, hinatagan og gahum nga full-time nga misyonaryo.”5
Si Rebekah S. gikan sa Russia mipakigbahin sa iyang kasinatian: “Bisan tuod naghinulsol na ko, ang kahasol sa konsensya ug kasakit nakapahunahuna nako nga dili na ko maka-misyon tungod kay grabe ang akong nahimong sayop. Apan, ang akong bishop ug presidente sa stake mitabang nako nga makaamgo sa makaayo nga gahum sa Pag-ula sa akong kinabuhi. Mapasalamaton kaayo ko sa paghinulsol. Ang pagkahimong takus mahinungdanon kaayo sa misyon. Dili ka makatudlo pinaagi sa Espiritu kon dili ka takus niini (tan-awa sa D&P 42:14). Kinahanglan nga adunay kalinaw sa imong kasingkasing aron hingpit nga kinasingkasing nga makaserbisyo. Kini makahimo sa tanang kalainan.”
Unsaon nako pagbiya sa akong pamilya ug mga higala?
Lisud ang pagbiya sa mga minahal, ilabi na nga masayud nga malahi na ang mga butang inig-uli nimo—para sa imong mga higala, imong pamilya, ug ilabi na nimo. Tingali nabalaka mo kon unsaon sa imong pamilya pagdumala ang kakulang sa kwarta kon wala mo o unsay ilang reaksyon kabahin sa imong pag-misyon. Apan ang Ginoo dili mopasagad sa imong mga minahal ug mopanalangin kanila tungod sa imong pagserbisyo (tan-awa sa D&P 100:1). Bisan tuod mingawon ka kanila, ang Ginoo nagkinahanglan kanimo sa pagtabang sa ubang pamilya nga makakaplag og kalipay sa ebanghelyo. Tuohi nga ang gusto sa Langitnong Amahan mao ang pinakamaayo para kanimo ug sa imong pamilya, ug hinumdumi, “Ang hugot nga pagtuo nagsalig nga ang Dios adunay talagsaon nga mga butang nga giandam alang sa matag usa kanato.”6 Ang Ginoo adunay nindot kaayong mga panalangin nga giandam para kanimo ug sa imong pamilya samtang imong makaplagan ang pagtuo nga mopadayon.
Unsa kaha kon ako dili makabayad niini?
Ang galastuhan sa pag-misyon ingon og dako nga sakripisyo, apan ang Ginoo nasayud kon unsay Iyang ipabuhat kanimo. Si Presidente Boyd K. Packer, Presidente sa Korum sa Napulog Duha ka mga Apostoles, miingon, “Mamulong ko nianang batan-ong lalaki kinsa walay ideya kon unsaon pagbayad sa galastuhan sa iyang misyon. Wala usab ko kahibalo. Apan ako nasayud niini: kon ikaw adunay hugot nga pagtuo ug determinado nga moserbisyo mo, adunay paagi.”7
Si Loran C. gikan sa England nakasinati niini: “Nagsugod pa lang ko sa pag-asikaso sa akong papeles para misyon sa dihang ang bangko miingon nako nga dako ko og utang sa credit card. Ang akong bishop ug ako naghan-ay og plano sa budget kon unsaon nako pagbayad ang akong utang, misyon, ikanapulo, ug uban pang mga galastuhon. Nagkinahanglan kini og dakong sakripisyo, ug abi nako dili na nako makab-ut ang akong tumong. Apan, matinud-anon nakong gibayaran ang akong ikapulo ug ang Ginoo mitabang. Usa ka gasa gikan sa tawo nga wala magpaila mihatag nako og kwarta igo sa pagbayad sa akong utang ug matuman ang akong tumong nga maka-misyon.”
Unsa kaha kon maulawon ko sa pagpakig-istorya sa mga tawo?
Ang ideya sa paggahin sa tibuok adlaw, kada adlaw nga makig-istorya sa tawo nga dili nimo kaila mahimong lisud. Si Sam L. gikan sa California, USA, mihinumdom: “Sama nako nga dili gani ganahan moabli og pultahan, ang ideya nga manuktok sa pultahan sa dili kaila aron maghisgot kabahin sa ebanghelyo ingon og imposible kaayo.
“Sa usa ka youth conference sa stake, kami gipakuyog sa mga misyonaryo ug nagtudlo ebanghelyo. Mokuyog uban sa tinuod nga mga misyonaryo? Ngadto sa tinuod nga mga tawo? Nakulbaan ko, apan nakahinumdom ko og kasulatan: ‘Kay Ako, ang Ginoo nga imong Dios mokupot sa imong kamot nga tuo, nga magaingon kanimo, Ayaw kahadlok; Ako magatabang kanimo’ (Isaias 41:13). Nag-ampo ko para nianang panabang, ug bisan tuod naulaw ko, mibati ko nga gihatagan og gahum pinaagi sa Espiritu Santo ug gani nakahatag og duha ka kopya sa Basahon ni Mormon.”
Unsa kaha kon kini makaguba sa akong pag-eskwela o sa pagpanarbaho?
Tingali naghunahuna ka nga ang paghunong aron mag-misyon kon ikaw nag-andam para sa kolehiyo o trabaho makapameligro sa imong umaabut, apan ang tinuod mao ang bali niini. Ang Ginoo gusto nga molambo ka, ug Siya motabang kanimo. Walay butang nga imong gisakripisyo nga adunay kaparehas og bili sa pagserbisyo og misyon.
Daghang mga batan-on ang mihimo sa samang desisyon. Si William H. gikan sa Australia miundang sa nindot nga rugby career, wala masayud kon siya adunay sama nga oportunidadsa pagduwa inig-uli niya (tan-awa sa “Time-Out para sa Pagmisyon,” Liahona, Hunyo 2012, 50–52). Si Joseph B. gikan sa Philippines misulod sa opisina sa sekretarya sa kolehiyo, andam nga isakripisyo ang kausa ra sa kinabuhi nga oportunidad sa pag-eskwela (tan-awa sa “Alang sa Halad nga Sinunog,” Liahona, Sept. 2007, 40–42). Matuman o dili matuman ang imong gilauman human sa imong misyon, walay oportunidad nga mas dako og bili kaysa imong pagserbisyo isip misyonaryo.
Walay mga Pagmahay
Ang Langitnong Amahan gusto nga kitang tanan magmalipayon, ug Siya dili mosugo kanato sa pagbuhat og usa ka butang nga dili makapanalangin ug makatabang kanato. Kon ikaw matinud-anon nga mobuhat unsay gisugo sa Ginoo kanimo, bisan kon kini lisud, imong makaplagan ang mga panalangin nga moabut nga mas bililhon kaysa bisan unsang butang nga maitanyag sa kalibutan. Dili gyud ka magmahay sa pagserbisyo og misyon.