Marautaki ni Lotu Vakamatavuvale
Ena 1915, era a vakasalataki keda na parofita edaidai meda vakatikitikitaka e dua na yakavi ena loma ni macawa me noda na matavuvale. A vakatokai taumada oqo me “bogi vakamatavuvale”—me gauna ni vulici na kosipeli ka marau vata, ka vaqaqacotaki na keda isema vakayago ka tawamudu.
Ni oti e dua na drau na yabaki, sa vukei keda tikoga mai na lotu vakamatavuvale meda tara cake noda matavuvale ki na veigauna tawamudu. Era yalataka na parofita ni caka oqo, ena yaco me cecere noda vakabauta ka da qaqaco vakayalo na yaloda, ka da taqomaki vakalevu, ka yaco na tiko vakacegu e vale.
Eda sa lewe taucoko ni dua na matavuvale ena vuravura oqo ka da sa tiki ni matavuvale nei Tamada mai Lomalagi. Se vanua cava ga eda tiko kina e vuravura se cava na ituvaki ni noda bula, sa rawa meda marautaka ka vakaitavi ena noda lotu vakamatavuvale.
iMawi: E ratou se qai toki vou ga na matavuvale na Moua ki Thailand, ka ratou mai vulica kina na kosipeli ka papitaiso sara. Ena nodratou lotu vakamatavuvale e ratou vulica kina na iVola i Momani ena nodratou vosa ni vanua vaka-Hmong, kei na vaka-Thai, na vosa ni nodratou itikotiko vou.
E ra: Na veimarautaki kei na qito ena lotu vakamatavuvale sa dua na sala e ratou cakava na matavuvale na Santos mai Potukali me ratou veitokani vakavoleka kina.
iMatau: Na matavuvale e sega ni baleta ga na tina, tama, kei ira na gone ena matanitu o Democratic Republic e Congo. Ni sa sokomuni iratou mai na nona matavuvale o Baraca Suekameno ki na lotu vakamatavuvale, era sureti vakakina e vuqa na lewe ni koro mera tiko kina.
E Cake: E vakayagataka o Sista Gercan mai Filipaini na nodra sere na Lalai kei na sere ni vanua me vakavulici iratou kina na luvena ena rekitaki ni kosipeli.
E Cake: E ratou marautaka tiko oqo na matavuvale na Anderson na buli keke kamica ena loma ni nodratou valenikuro mai Georgia, e Amerika. Eso na gauna e ratou dau vakayagataka me tiki ni lesoni se me ratou vakalomavinakataki ga kina.
E Cake: E rau saga o Baraca kei Sista Reynolds mai Washington, Amerika, na sala me rau vakavulica ga vakarawarawa na kosipeli me rawa vei iratou na luvedrau lalai mera vulica ka kila vinaka kina.
iMatau, mai cake: E ratou okata na matavuvale na Espinoza mai Bolivia na budratou dokai ena lotu vakamatavuvale ni ratou lagasere ka vulica na kosipeli.
Ia vei iratou na matavuvale na Jin mai Georgia, Amerika, sa nodratou isakisaki ni lotu vakamatavuvale na tuvakawa. E rau taleitaka na vakavulici ira na luvedrau ena iyaubula ni vanua o Korea.
Eso na gauna e ratou dau gade na matavuvale na Ligertwood mai Ositerelia me tiki ni nodratou lotu vakamatavuvale, ka laki sarava na veitiki totoka ni nodratou taoni levu.