Au Sega ni Kila na Vuna Au Tiko Kina Ekea

Amber Cheney, Alabama, Amerika

Droini mai vei Kathleen Petersen

Au se qai vakacavara vata ga kei tinaqu na neirau masumasu vabogi. Keirau a veimokomoko ka kaya, “Au lomani iko.” Au qai gole ki na noqu rumu ni moce. Niu vakarau tara yani na idola ni noqu katuba, e dua na nanuma kaukauwa a curuma na noqu vakasama ni na siga e tarava sa na mate kina o tinaqu.

Au tovolea meu valuta mai na noqu mona kei na utoqu na vakasama oqo. E sega sara ga ni dua na sala me na yaco rawa kina e dua na ka vei tinaqu. Ena daumaka na veika kece e baleti koya.

Niu sa tiko rawa ena noqu rumu, au a tekiduru ena masu ka tukuna vua na Tamada Vakalomalagi ni nanuma me baleti tinaqu e sega ni rawa ni dina. Au a kerei Koya me kauta laivi na vakanananu, ia a sega ni yali. Au a lesu ki na nodrau rumu na noqu itubutubu ka tukuna vei tinaqu niu vinakata e dua tale na veimoko kei na iregu ni bera niu moce. Keirau a tukuna tale, “Au lomani iko,” kau lesu ki na noqu rumu. A taura toka e dua na gauna meu moce kina ena bogi oya.

Niu yadra cake ena mataka ka tarava, au a ririko voli. Vinaka ga, ni a tiko o tinaqu, marau tu ka bula vinaka. Ia ena daku ni noqu vakasama, e se tiko ga vei au na nanuma veivakasosataki oya ni dua na ka e sega ni dodonu tiko. Ena soqoni ni lolo kei na vakadinadina ena siga oya, a tucake o Na ka tukuna e dua na ivakadinadina totoka.

Ni oti na sakaramede a gole o koya me vakatavulica na kalasi ni Lalai, kau gole ki na Matawilivola ni Sigatabu. Au vakila tale vakamatata, ena gauna oqo meu duri ka biuta na Matawilivola ni Sigatabu. Au a sega ni via vakavu malele kivei au, ia a dreti au tani mai na noqu idabedabe e dua na ka ka vakauti au ki tautuba. Ena loma ni vica na miniti, au a dabe voli ena kalasi ni Lalai nei tinaqu ka vakarogoci koya ni vakatavuvuli. Au sega ni kila na vuna au tiko kina ekea, ia au kila ni oya na vanua au sa gadreva meu tiko kina.

Ena yakavi oya ena itikotiko nei ganequ, a wadrava vakadodonu na mataqu o tinaqu ena iotioti ni gauna ni sa bale sobu ka ciba sara mai na tao ni dra ki na uto. Me baleta na Nona inaki kei na Nona loloma veivueti, a tala mai na Yalo Tabu na Tamada Vakalomalagi me vakarautaki au. Na veivakauqeti oya a solia vei au e so tale na gauna vata kei tinaqu kau na sega ni na rekitaka soti kevaka au a vakanadakuya na domo rogo malumu lailai.

A sega mada ni se vakadeitaki na loloma ni Tamaqu Vakalomalagi kivei au me yacova na veika a vakayacori me baleta na leqa nei tinaqu. Eda sa kalougata dina ni tiko e dua na Tamada mai Lomalagi e lomani keda sara me solia vei keda na isolisoli matalia ni Yalo Tabu.