Cauravou kei na Goneyalewa Veivakurabuitaki ena iVolanikalou
O koya e vola ka dau qasenivuli tu ni semineri, e vakaitikotiko mai Jamani, ka sa mai takali na nona bula ena 2012.
Sa na rawa ni ko vakamuria na nodra ivakaraitaki na itabagone buladodonu ka sa maroroi tu na kedra italanoa ena ivolanikalou.
iVakaraitaki mai vei Andrew Bosley
E lomani ira na itabagone ena Lotu na Turaga. E tu Vua na Nona dau vakararavi vei kemuni. Ena veitabayabaki, sa dau vakauqeta na Turaga na cauravou kei na goneyalewa gugumatua mera liutaka ka vakalougatataki ira na Nona tamata. E gadreva o Koya na nodra daubulibuli, nodra gugumatua, kei na nodra dau tekitekivu vou. Sa dau vakatu o ya mai liu; ka sa na vakatu oqo, ena veigauna kece.
Na levu ni ivakaraitaki ni tamata qaqa gone e vaka e dua na wa ni culacula koula ni bini ka sauru tu ena ivolanikalou. Dina ga ni ra a bula ena dua na gauna makawa sara, ena rawa ni ko ni muria na nodra ivakaraitaki ka vakamuria na itovo ni nodra bula. Tu na leqa ena nodra matavuvale, era bula vata kei ira na tamata ca, era sotavi “Koliaci,” ia na nodra tamata qaqa, talairawarawa, kei na vakabauti Jisu Karisito, era lako curuma rawa kina na nodra dui bolebole—me vaka sara ga na ituvaki vaka oqo ko ni na rawata talega vakakina.
Eparaama
Na yalodei, kaukauwa kei na yalodina me tucake o Eparaama ka vunautaka na veivutuni mai na ivalavala ca sa veivakurabuitaki sara ga, e veivakurabuitaki ni o tamana sara mada ga e qarava tiko na kalou matakau. Ni a se gone e a doudou me tucake baleta na buladodonu ka voleka sara ni a vakamatei me cabori kina me isorokama. (Raica na Eparaama 1:2–7.)
Josefa e Ijipita
Eratou a volitaki koya na tuakana vei ira na dauveivakabobulataki ni se qai yabaki 17, ia ni vakalougatataki koya tiko na Turaga e a rawata kina o Josefa me kauti koya laivi mai na ituvaki dredre sa laki tu kina. E a sega ni vakadrukai baleta ni a sega ni soro. E a tasoro tu ga na nona vakararavi vua na Turaga. Na ituvaki qaqa ni bula nei Josefa e loma e a vakaraitaki ena nona rawa ni veivosoti ena veivakacacani e a caka vua. (Raica na Vakatekivu 37:45.)
Tevita
Ni a se cauravou lailai o Tevita e a dau vakatawa sipi, ka a veivala kei na dua na pera kei na dua na laione me taqomaka kina na sipi nei tamana. Na nona yalodei e sega ni lako mai na nona itutu vaka dauvakatawa sipi: e lako mai na nona vakabauta na Tamada Vakalomalagi me vaka e a kune ena nona veivala vata kei Koliaci. (Raica na 1 Samuela 17:32–54.)
Esiteri
E a tu vua na yalodei me laiva na nona bula me veitaliataki me rawa ni vakabulai ira na nona tamata. E sega ni laveti cake o Esiteri baleta na nona yalewa totoka ia e baleta sara ga na ituvaki ni nona bula vakayalo. (Raica na Esiteri 4–5.)
Taniela
iVakaraitaki mai vei Andrew Bosley
E a talairawarawa o koya ena lawa ni Turaga baleta na tiko savasava ka veitalia ga o ira na bula vakavolivoliti koya tiko. O koya e dau masu, dina ga ni a tabu na masu vua na Tamada Vakalomalagi me vaka na ivakaro ni tui. Me vaka ni a bula dodonu tu o koya ka dau vosa vakadodonu ena veivakauqeti ni Yalotabu, e a vakalougatataki o Taniela mai vua na Turaga ena isolisoli me kila na ivakadewa ni tadra kei na raivotu. E a soli vua na kaukauwa kei na vuku mai vei Tamada Vakalomalagi me yacova sara na gauna e dau sotava kina na tikoleqa sa tu sara ga vua na kaukauwa mai lomalagi me vakayagataka. (Raica na Taniela 1; 6.)
Nifai
E a dua na ivakaraitaki wararasa o Nifa ena nona a kaya, “Au na lako ka kitaka na ka sa vakarota na Turaga.” (1 Nifai 3:7). E tu vua na yaloqaqa me cakava na ka sa tukuni vua me cakava. A bula li o koya ena dua na vuvale vinaka sara? Sega, o koya e a bula voli ena loma ni lekutu ena vica vata na yabaki E a taucoko li na ivakarau ni bula e a sotava? Sega, o ratou na tuakana eratou dau cudruvi koya vakalevu ka so na gauna eratou tovolea me ratou vakamatei koya. Ena veika e dau yaco oqori, e dina tu ga ena ivakaro ni Turaga.
Rua na Udolu na Cauravou ni Amonaiti
Era a susugi cake na itaba cauravou oqo mai vei ira na itubutubu vakabauta, kei na nodra vakabauta na ivakasala nei tinadra e vukei ira vakalevu. Era vulica mera vakarorogo ka talairawarawa ena ka sara ga era talai kina, kei na gauna ni nodra sa valu era sega vakadua ni lomalomarutaka ni Tamada Vakalomalagi ena taqomaki ira. (Raica na Alama 56:45–48.)
Momani
Ni se qai yabaki 15 sa sikovi koya mai na Turaga baleta ni o koya e yalomalua, bulasavasava, ka taucoko sara tu ga dina ga ni ra dukadukali o ira e bula veimaliwai kei ira. Ni se qai yabaki 15 talega sa vakaturi me sa iliuliu ni mataivalu. E muri sa qai soli vua me maroroya na ivolanikalou. (Raica na Momani 1–2.)
Josefa Simici
Ni yabaki 14 sa tekivu wilika na ivolanikalou ka masulaka me kila se na lotu cava me lewena. Sa qai kacivi koya na Turaga me vakalesuya mai na kosipeli kei na Lotu i Jisu Karisito. E a vakatabakiduataka na nona bula o Josefa me vakavotukanataka na icolacola sa soli oqo vua, ka dina ga ni levu sara na voravora kei na dredre e a sotava. Ni yabaki 17 e a sikovi koya mai na agilosi o Moronai ka vakaraitaka vua na peleti koula. Ena gauna sara ga ni se gone tu vaka ko ya, e a dua toka na qasenivuli warumisa o Josefa ka ivakaraitaki vinaka sara ga vei ira e bula vata tu kei ira. (Raica na Josefa Simici—Ai Tukutuku 1.)
Nomu Gauna
Sa mai oti beka li na nodra gauna veivakurabuitaki na cauravou kei na goneyalewa? Sega! Tukuna o Moronai vei Josefa Simici ni sa voleka sara me vakavotukana na parofisai nei Joeli.
“Koi au [na Turaga] kau na sovaraka na yaloqu vei ira na tamata kecega ka ra na parofisai kina na nomudou gonetagane kei ira na nomudou goneyalewa ko ira na nomudou qase era na tatadrataka e so na tadra ko ira na nomudou cauravou era na raica e so na raivotu:
“Vei ira talega na tamata kei ira na vada kau na sovaraka na yaloqu ena gauna ko ya” (Joeli 2:28–29; raica na Josefa Simici—Ai Tukutuku 1:41).