iTukutuku ni Mataveiliutaki Taumada
Vakacavara ni se Waqa Tikoga na Nomu Cina
iTaba mai vei Comstock/Stockbyte/Thinkstock
Ena vanua makawa o Kirisi, era dau veitau cici kina na dauqito e vakatokai na lapadedromia.1 Ena veitau oqo, era na qumia tiko na daucici e dua na cina ka vakadewataka yani vei daucici e tarava me yacovi otioti ni daucici ena timi me takosova yani na icavacava ni laini.
A sega ni soli na icocovi ki na timi a totolo duadua—ia a soli ki na imatai ni timi a takosova na laini ka se waqa tikoga na nodratou cina.
Oqo e dua na ivakavuvuli bibi sara, e dua era vakavulica na parofita ni gauna makawa kei ira ena gauna oqo: e dina ga ni bibi na tekivutaki ni cici, ia e bibi cake sara meda na vakacavara ka se waqa tikoga na noda cina.
A Tekivu ena Qaqa o Solomoni
E a ivakaraitaki na Tui cecere o Solomoni ni dua ka tekivu ena qaqa. Ni se cauravou, a “lomani Jiova, ka sa muria tiko na vunau i Tevita na tamana” (1 Tui 3:3). Sa taleitaki koya vakalevu na Kalou ka kaya kina, “Mo kerea mada na ka meu solia vei iko” (1 Tui 3:5).
A sega kina ni kerea me vutuniyau se me bula balavu, a kerea ga o Solomoni “na yalo sa vuku, meu lewai ira kina na nomuni tamata, meu kila na ka vinaka kei na ka ca” (1 Tui 3:9).
Ena ka oqo sa lomavinaka vakalevu kina na Turaga ka sa vakalougatataki Solomoni kina, sega walega ena vuku ia ena vutuniyau cecere sara kei na bula balavu.
E dina ga ni sa vuku sara o Solomoni ka cakava e vuqa na veika cecere, a sega ni vakacavara ena qaqa. E ka ni rarawa, ena nona bula e muri, a “cakava na ka ca ko Solomoni ena mata i Jiova, ka sega ni muri Jiova sara” (1 Tui 11:6).
Vakacavara na Noda Dui Cici
Sa vakavica beka noda tekivuna e dua na ka qai sega ni da vakacavara? iVakarau ni noda kana? Parokaramu ni vakaukauwa yago? Yalayala ni na wiliki na ivolanikalou ena veisiga? Vakatulewa meda tisaipeli vinaka cake i Jisu Karisito?
Sa vakavica beka noda lalawa vou ena Janueri ka saga ena kena yalo qaqa taucoko ena imatai ni vica na siga, vica na macawa, vica sara na vula ka me qai yaco mai na Okotova, sa batabata sara vakadravusa na cina ni noda yalodina.
Dua na siga au a raica e dua na iyaloyalo lasa ni dua na koli e davo tikiva toka e dua na pepa a katikatilaka o koya. E volai toka kina, “Setivikiti ni Vuli Talairawarawa ni Koli.”
Eda vakatu o ya ena so na gauna.
E totoka na noda gagadre; eda tekivu ena qaqa; ka da vinakata meda uasivi sara. Ia e kena itinitini ga na noda vakacacana, biuta laivi, ka guilecava na veika eda lalawataka.
Sa itovo ni tamata me lutu, druka, ka so na gauna e vinakata me lako tani mai na veitau. Ia ni da sa tisaipeli i Jisu Karisito, eda sa vakadeitaka ni da sega walega ni tekivuna na veitau ia eda na vakacavara vakakina—ka vakacavara ni se waqa ramase tikoga na noda cina. A yalataka na iVakabula vei iratou na Nona tisaipeli, “Ia ko koya ena vosota me yacova na ivakataotioti, ena vakabulai ko koya” (Maciu 24:13).
Meu ukutaka mada na yalayala ni Turaga vei keda ena noda gauna oqo: Kevaka eda na muria na Nona ivakaro ka vakacavara ka se waqa tikoga na noda cina, eda na bula tawamudu, na isolisoli cecere duadua ni Kalou (raica na V&V 14:7; raica talega na 2 Nifai 31:20).
Na Rarama sa Sega ni Boko Rawa
Eso na gauna ni noda lutu, druka, se soro, eda sa yalolailai ka vakadinata ni sa boko na noda rarama ka yali mai na veitau. Ia au vakadinadinataka ni Rarama i Karisito e sega ni rawa ni boko. Ena waqa ena bogi butobuto duadua ka na vakacaudreva vou na yaloda ena gauna ga eda solia kina na yaloda Vua (raica na 1 Tui 8:58).
Se cava sara na levu kei na titobu ni gauna eda lutu kina, sa dau caudre kaukauwa tu ga na Rarama i Karisito. Ena gauna butobuto mada ga ni bogi, keda kalawa yani Vua, ena vakaotia na butobuto o ya na Nona rarama ka na vakacaudreva vou na yaloda.
Na veitau ni cakacaka vakatisaipeli oqo e sega ni cici totolo; e cici balavu. Ka lailai wale sara na yaga ni noda cici vakatotolo. E dina sara, ni sala ga eda na druka kina ena veitau o ya ni da sa soro se lako tani mai kina.
Ni da lamata cake mai ka toso yani ki liu vua na iVakabula, eda na qaqa ena veitau ka ramase vinaka tikoga na noda cina.
Na cina sa sega ni baleti keda se cava eda cakava.
Sa baleta na iVakabula kei vuravura.
Sa ikoya qori na Rarama sa sega ni rawa me vakalailaitaki sobu. Oqo na rarama sa tiloma na butobuto, sa mavotaka na noda mavoa, ka caudre vakaukauwa ena gauna mada ga ni rarawa titobu kei na butobuto sega ni vakarautaki rawa.
Oqo na Rarama sa sega ni kilai rawa.
Meda sa qai vakacavara na sala eda a dui tekivuna. Ia ena veivuke nei noda iVakabula ka Dauveivueti, o Jisu Karisito, eda na vakacavara ena reki ka waqa tikoga na noda cina.