Masulaki ni Noqu Sala ki Rotuma

John K. Muaror, New South Wales, Ositerelia

(Sa mate o koya e vola.)

“Na Westerland a biubiu ena noa,” a kaya o noqu daku ni tavaki keirau ena Nadi International Airport e Viti.

Au a luluvu ka rarawataka na itukutuku. Na MV Westerland sa ikoya na waqa ka dodonu me kauti keirau me laki sotavi tuakaqu ena Yanuyanu o Rotuma. O Rotuma e viavia 375 na maile (600km) ki na ra-ni-vualiku kei Viti Levu, na yanuyanu levu duadua e Viti. Kevaka o calata na waqa, o na rairai wawa tale me vica na siga se macawa saraga ki na kena e tarava.

Ena yabaki yani eliu au a gole ki Rotuma meu laki vukei tuakaqu ena vakavoutaki ni vale nei bui keirau, kau a biuti koya me baleta e dua na veicalati ni ka vakacakacaka. Ia oqo au sa via sotavi koya saraga e matana votu ka kere veivosoti vua.

Ena macawa eliu, o au kei Akata na watiqu, keirau a vuka ki Viti mai Ositerelia, ka tukuna vei au na vugoqu ni na gole tiko na Westerland ki Rotuma ni vo e dua na siga me keirau yaco mai kina. Au a qirita kusarawa na vale ni volavola ni waqa ka vakamasuti ratou me tauri vakawawa toka na soko me rua na siga.

“Sega, keitou sega ni rawata, veitalia ke keitou na vinakata,” a saumi lesu mai. “Na Matabose ni Yanuyanu ko Rotuma e sa vakarautaka tu e dua na magiti ni veikidavaki, ka sa dodonu me seredali na waqa me vaka na kena ituvatuva.”

A mani yaco vei au e dua na vakasama, kau sa nanuma meu lolo ka masu.

“Kemuni na Tamaqu Vakalomalagi,” au sa masu, “au na vinakata saraga meu na vodoka na waqa oya ki Rotuma. Au kila ni ra sa sega ni taura vakawawa rawa na itosotoso me dua se rua tale na siga, ia sa tu vei Kemuni na kaukauwa mo ni cakava vakakina. Yalovinaka ke rawa ni ko Ni vagalalataka mada ga e dua na bolt mai na vanua cavaga ena waqa me na toka vakawawa kina na soko me rawa niu vodo? Au sa gadreva na lako ki Rotuma ka laki veivakaduavatataki kei na tuakaqu.”

Ni oti na neitou rogoca na itukutuku veivakayalolailaitaki, keitou a gole yani ki na ikelekele ni waqa ena yasana kadua ni yanuyanu. Ekea, keitou qai kila kina ni a sotava na waqa eso na leqa vakaidini ka se bera ni biubiu. A sauma na Tamada Vakalomalagi na noqu masu! E kena irairai, na idini taucoko—sega ni dua ga na bolt—a vagalalataki me ripeataki kina e dua na turu levu ni waiwai.

Ni sa qai mai biubiu rawa na waqa ni oti e dua na macawa, au sa vodo koto. Niu yaco yani ki Rotuma, au a mokoti tuakaqu ka kere veivosoti, ka keirau vakataucokotaka tale na neirau veiwekani. E a dua dina na siga marautaki.

Au na dau vakavinavinakataka tu ga na ka totoka vakayalo a sotavi oqo ka vakakina na kosipeli vakalesui mai i Jisu Karisito. E sa ivakadinadina ni cakamana e se yaco tikoga edaidai, ni bula tiko na Tamada Vakalomalagi ka dau sauma na noda masu yalomalumu, ni rau salavata na masumasu kei na lolo, ka ni sa dina na kosipeli—vakakina ena dua na koro lailai ena yanuyanu somidi ko Rotuma.