Vakasaqarai ni Veivuke
O koya e vola e vakaitikotiko mai Utah, Amerika.
Sa oti na 12 ena bogilevu, ia e kila tu o Tate ni sa kena gauna donu ni veivosaki.
“Tamaqu mai Lomalagi, au masu oqo mo ni tuberi au ka taqomaki au ena veisiga” (iVolanisere ni Lalai, 19).
Yadra tu ga o Tate ena nona idavodavo ni buto, ka qai sausauriva tu ena drodro ni wainimatana. O koya e a masulaka na veivuke, ia e kena irairai ni vaka me dua na o loaloa levu e vakalatilati tiko ka sega ni rawa vua me veitaratara kei na Yalo.
“Vakacava kevaka meu na sega vakadua ni guilecava na iyaloyalo ca oya ena retio yaloyalo?” e a leqataka o koya.
Ena vica na siga yani ki liu e a vakaotia totolo na nona vuli lesoni ka dolava sara na retio yaloyalo. Ia, e a sega ni namaka me na raica na veika vakarerevaki me vaka e a raica ena sikirini. E a rika ca o Tate ka guilecava mada ga me bokoca laivi na TV me vaka e a dodonu me cakava.
O ya e ka vakacala-ka. E a sega ni namaka me na raica e dua na ka vakarerevaki vaka o ya, ia oqo sa sega ni na guilecava rawa. Ena so na gauna e vakasauri na kena sa basika ena nona vakasama mai koronivuli, e vale ena teveli ni kana—vakakina mai valenilotu. Ena vaugauna vakaoqori, e marau ni rau sega ni rawa ni wilika o nona itubutubu se na cava e vakananuma tiko. Erau vakavulica na itubutubu nei Tate vua me kakua ni dau saravi ira na tamata era luvaiwale tu. E kila talega ni rau sega ni vinakati koya me sarava na iyaloyalo vakarerevaki, iyaloyalo ca kei na qito vidio.
“Oqo, au sa qai kila na vuna,” e a vosavosa iyalona voli o Tate.
E a siro mai ra ena imocemoce ka tekiduru tale me masu. Na cava ena rawa ni cakava?
“Tamaqu Vakalomalagi,” e a vakasolokakanataka yani o Tate. “Ni yalovinaka sara ka vukei au meu kakua ni nanuma tiko na veika au a raica o ya.” E a quata laivi na wainimata sa sobi tu e matana ka mai vakarorogo tu yani. Sa tekivu me totolo na vadugu ni nona uto. E nanuma ni vakila ni sa uqeti koya na Yalo Tabu me vakauqeti koya, ia e sega ni o koya ya na ka e gadreva.
Ena ganita me laki tukuna vei rau na nona itubutubu.
Cava na vuna. E a vakanananu voli ga o Tate. O koya ena vaka e dua na gonelailai me laki raici rau na nona itubutubu ena lomaloma ni bogi. Me sa na laki tukuna vei rau? Tuburi koya mai e dua na madua ka vakamalumalumutaki talega.
Sa qai galala mai na nona vakasama: E vinakata na Tamada Vakalomalagi me bula marau. Ena vinakata na Tamada Vakalomalagi me vakila tale na Yalotabu, me vakananuma na veika vinaka, ka me dina vei ratou na nona matavuvale. E vinakata ga vei Tate me buladodonu me rawa ni na ciqoma na Matabete i Eroni ena gauna sa yabaki 12 kina ena vica na vula mai oqo. Sa qai vakila o Tate ni kevaka me na maroroya voli ga na ka sa raica ena sega ni bula marau rawa.
Kila tu o Tate ni gadreva na veivuke—ka se qai tukuna ga vua na Yalotabu na vanua me na rawata mai kina.
Raica yani o Tate na kaloko ena nona drowa e yasa ni nona imocemoce. Sa voleka na 1:00 kaloko ena mataka. Tucake mai ka vakadodonu yani ena sala buto kina nodrau rumu na nona itubutubu. Tilotiloma nona weli ena nona sa tukituki ena katuba.
“Na? Ta?”
“Tate, o iko beka qori?” taroga mai ena domo ni moce o tinana.
“Vakaevei, dua beka na leqa?” Taroga o Tamana.
“Io,” sauma yani o Tate. “E rawa beka ni datou veivosaki? E rawa talega niu bau masulaki?”
Waqara na cina ena yasa ni nona imocemoce o tamana ka sureti koya me curu yani. Ena imatai ni gauna ni sa oti e vica vata na siga, vakila o Tate na vakacegu, na nuidei, kei na veivakararamataki.
Droini mai vei Mark Robison.