Noqu Vakasaqara na Dina
Na dauvolaivola e vakaitikotiko e Kalifonia, Amerika
Au sa dau vakavulici ni sega na Kalou, ia au sa vakasamataka meu sa na saga meu kila vakataki au
Droini mai vei Dan Burr
Niu susugi cake ena dua na vanua e veisisivi ka sega ni lotu mai Esia, au dau gadreva tu meu na dua na tamata rawa-ka, ia e sega tu na noqu ivakavuvuli tawamudu se dina me tuberi au. Mai noqu vanua, na “rawa-ka” e kena ibalebale na vutuniyau ka kaukauwa.
Rau dau vakavulici au na noqu itubutubu ni sega ni dua na Kalou Vei rau na lotu sa dua na ka vakalialai ka baleti ira ga na tamata malumalumu Ena dua na gauna balavu au sa dau vakatokai au me dua e sega ni vakabauta na Kalou. Erau vakavulici au meu kakua ni vakararavi vua e dua, me o au ga vakaiau? Mai na gauna niu se gone au sa dau vakayagataka tu mai na noqu sasaga cecere meu bolea kina na vuli ka cakacaka vakaukauwa.
Sa tiko sara e cake na nodrau nanamaki vei au na noqu itubutubu. Erau vinakata me tiko ga e cake na noqu itagede ena veigauna kece. Au yalorarawa niu raica ni rau sega ni dau marau kau rogoca nodrau veivala ena gauna e sega kina ni vinaka na noqu itagede ni vuli. Me ikuri ni noqu ka ni vuli au dau cakava tale e sona ka ni vuli mai vale ena mua ni macawa me rawa ni vinaka cake na noqu rawa-ka.
Ni sa dau oti ka rawata vinaka na veika au a navunavuci mai kina au se vakila tikoga ni se tikoga e dua na ka vinaka sara ka waraka tu mai na noqu bula. Mai na vu ni yaloqu au kila ni tiko e so na ka ka rawa ni vakalevutaka tale.
Dua na siga au sa qai vakadeitaka meu sa na vakasaqara mada vakaiau se dua dina tiko li na Kalou. Kevaka me bula dina tiko o Koya, au na via kila se cava ena vinakata vei au se na lotu e dua ga na ka vakalialia ka ra tauyavutaka e so na tamata ena nodra vakasama. Au sega ni rerevaka na ciqoma na isaunitaro e rua oqori. Au vinakata ga na dina.
Ena gauna vata oqori, keirau mai veivolekati sara kei Taylor, e dua na lewe ni noqu timi ni qito basiketbol. Dua na mataka au kerei koya meu vodo mada yani ki koronivuli. Vakadonuya o koya, ka qai kaya meu na yadra vakatotolo ena dua na auwa me rawa niu na lako vata kei koya ki semineri. Au a vakadonuya vakavoraki niu sega ni kila na ka e tukuna tiko mai. Au taleitaka na semineri, baleta vakalevu ga na ka au a vakila mai na ka au vulica.
Vakalailai ga o ya sa sureti au sara o Taylor meu sa lako vata kei koya i lotu. Ni se qai tekivu au nanuma ni vakaoti gauna ka duatani tu na lotu, ia e qai yaco niu a yavalati ena yalo vakacegu a lutuki au ena gauna e yaco tiko kina na lotu.
Ia, au se bera tikoga ni vakadeitaka ni veika vinaka au sa tekivu vakila tiko e lako mai vua na Kalou. Meu na kila li vakacava ni sega ni lako ga mai vei au? Meu na kila li vakacava niu a sega ni cakava ga vakaiau meu vakila na veika oqori.
Ni oti e vica na veidresuqanibulu e lomaqu, au sa qai lako vei tinai Taylor meu vaqaqara isaunitaro. Tukuna o koya vei au niu rawa ni ciqoma na isau ni noqu taro niu wilika na ivolanikalou ka masulaka na isaunitaro au vakasaqara tiko. Au sa qai masu ka sega ga niu ciqoma e dua na kena isau ka sasaga vakaukauwa meu talairawarawa kina ivakasala kei na ivakaro kau sa qai vulica tiko. Levu na gauna au sa vakacauoca. Au a namaka me vaka na cakamana na basika ni Kalou se me dua na ka e veivakurabuitaki me vakadinadinataka ni bula dina tiko na Kalou. Na ka ga au vinakata me dua vakasauri na ivakadinadina sega ni yavalati rawa. Na ka dina ga, ni levu ga ni noqu masu, na kena sa matata tikoga mai vei au na veika au vakila. Na levu ni noqu talairawarawa kina ivunau, na levu cake ni noqu marau. Na levu ni noqu wilika na noqu ivolanikalou, na levu ni ivakatakila au ciqoma. Vakamalua sara, sa qai tubucake na noqu ivakadinadina me vaka ni cabe cake mai na matanisiga ena mataka.
E a tauri au e rua na yabaki meu qai papitaiso meu lewena na Lotu i Jisu Karisito ni Yalododonu Edaidai. Dina ga niu a bulataka tu e levu sara na ivakatagedegede vinaka sara ni bera o ya, sa na rawa meu kaya edaidai niu sa kunea na veika dina e tiki ni bula ni Kalou. Jisu na Karisito, na noda iVakabula ka noda Dauveivueti. Sa tadola na lomalagi. Sa tiko oqo e vuravura ni kua e dua na parofita ni Kalou. Na Veisorovaki nei Jisu Karisito e ka dina. Na Kalou e dau vosoti ira na ivalavala ca era sa veivutuni dina. Au na sega beka ni vakalougatataki se vakasulumi ena isolisoli e so, ia na veika au sa mai kila oqo sa bau cecere sara ga.