Bula Voli ena Nanuma Donu
Mai na dua na lotu cokovata e vuravura raraba me baleti ira na itabagone qase cake, “Living with Purpose: The Importance of Real Intent,” ka cauraki e Brigham Young University–ldaho ena 11 ni Janueri, 2015. Me baleta na vosa taucoko, gole ki na devotionals.lds.org.
Na nanuma donu sa ikoya na tutaki ni ka dina me baleta na inaki dina.
iTaba mai vei Jupiterimages/Stockbyte/Thinkstock
Au vulica na bibi ni nanuma donu niu a se gonevuli gone voli ni semineri. A bolei keimami na neimami qasenivuli me keimami wilika na iVola i Momani. Ni toqai tiko na neimami toso vinaka, a cakava o koya e dua na jati vata na yacai keimami ena dua na yasana ka takosova na kena e cake na veivola ena iVola i Momani. Ena gauna yadua keimami wilika e dua na ivola, e biuta o koya e dua na kalokalo ena yasa ni yacai keimami.
E liu au sega sara ni qacoya soti na wiliwili, ka sega ni dede na noqu vakila niu sa yawa kalia tikoga emuri. Ni yavalati mai na vakasama ni lomaleqa kei na noqu yalo bolebole matau, au sa tekivu wiliwili. Na veigauna au rawata kina e dua na kalokalo, au a lomavinaka. Na levu ga ni kalokalo au rawata, na levu ni noqu yaloqaqa ni wiliwili—ena maliwa ni veikalasi, oti na vuli, ka donuya na gauna galala kecega.
Oqo ena dua na italanoa levu ke rawa niu tukuna vei iko ni mai na vatuka ni noqu sasaga kece au a matai ena kalasi—ia au sega. Ka sa na koya tiko oya ke rawa niu tukuna vei iko niu a rawata e dua na ka e vinaka cake mai na matai ni tutu—e dua na ivakadinadina me baleta na iVola i Momani. Ia oya a sega ni yaco talega vakakina. Au a sega ni rawata e dua na ivakadinadina. Na ka ga au rawata na kalokalo eso. Au rawata na kalokalo eso baleta oya na vuna au a wiliwili tiko kina. Me vakayagataki na veivosa nei Moronai, oya sa noqu “nanuma donu.”
A matata tu o Moronai ena nona vakamacalataka na iwalewale me kilai kina ke sa dina na iVola i Momani: “Ia ni dou sa wilika na itukutuku oqo, mo dou kerea vua na Kalou, na Tamada Tawamudu, ena yaca i Karisito, me vakatakila vei kemudou se dina se sega; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina” (Moronai 10:4; vakamatatataki).
Na Vei-iNaki Dina
Ni raici lesu, au rawa ni raica na Turaga ni sa dodonu vakaoti vei au. Cava na vuna meu a namaka kina ni kunea e dua na ka ka duatani mai na ka au a vakasaqara voli? Na nanuma donu sa ikoya na tutaki ni ka dina me baleta na inaki dina; Au a wilika tiko na ivola donu me baleta na inaki cala.
A taura toka e vica na yabaki emuri meu qai mai wilika kina ena nanuma donu na iVola i Momani. Au sa qai kila oqo ni iVola i Momani e vakataucokotaka na kena inaki vakalou ena vakadinadinataki ni bula kei na ilesilesi i Jisu Karisito baleta niu sa wilika ena nanuma donu.
Na lesoni au vulica me baleta na nanuma donu kei na iVola i Momani e sa baleti keda taucoko ena ituvaki kece ni noda bula. Dau vakavuqa na noda vakamuria voli na ituvatuva kei na ivakarau matau eso ka se taurivaki mai na vica na yabaki—eda sa lako curuma ga na itosotoso ka sega ni vakasamataka vakamaqosa evei sa ra kauti keda tiko kina na itosotoso oya. Bula voli ena nanuma donu e vakuria na raiyawa kei na vakaibalebale ni noda bula ka sa rawa ni vakavu veisau saraga. Bula voli ena nanuma donu sa kena ibalebale na kilai vakamatata ni “cava na vuna”—na nakinaki ena taudaku ni noda cakacaka. A kaya o Socrates, “Na bula tawadikevi sa sega ni yaga me bulataki.”1 Vakasamataka sara vagumatua na nomu vakayagataki gauna, ka tarogi iko wasoma, “Cava na vuna?” Oqo ena vukei iko ni taracake na sasaga mo raibaleta kina na gauna donui. E vinaka cake sara mo rai ki liu ka tarogi iko, “Cava na vuna meu cakava kina oya?” mai na nomu rai lesu ka kaya, “Cava na vuna, sobo, cava na vuna au cakava kina oya?”
Droini mai vei Sergey Nivens/iStock/Thinkstock
Na Cava e Vinakata vei Iko na Turaga mo Cakava?
Niu se cauravou voli, au sa navuca meu kakua ni lako ki na kaulotu. Ni oti e dua na yabaki ena koronivuli torocake ka dua na yabaki ena mataivalu, a dua na noqu cakacaka vinaka ena valenibula vakaitaukei vaka dua na dauqaravi ilovi ni yago. E vaka me toso vinaka tu na bula, ka sega ni vaka me veiganiti sara na kaulotu.
Dua na siga, a sureti au ki na vakasigalevu o Dr. James Pingree, e dua na dauveisele ena valenibula. Ena neirau veivosaki voli, a dikeva o koya niu a sega ni nakinaki voli meu veiqaravi vakaulotu, ka taroga na vuna. Au tukuna vua niu sa qase vakalailai ka sa na rairai bera toka. A tukuna vei au o koya ni oya e sega ni vuna vinaka sara, ena nona kaya ni a lako vakaulotu o koya ni oti na nona vakacavara na vuli vuniwai. A qai wasea o koya na ivakadinadina me baleta na bibi ni nona kaulotu.
Na nona ivakadinadina a vakavure vakasama saraga vei au. A vakavuna meu masu me vaka au se sega mada ni masu eliu—ena nanuma donu. Sa rawa niu vakasamataka e levu na vuna meu kakua ni lako kina vakaulotu: Au a madua. Sa tiko vei au e dua na cakacaka au taleitaka. Sa tiko vei au na kena rawa ni rawati e dua na sikolasivi ka na sega ni rawati ni oti na kaulotu. Ka bibi sara, sa tiko vei au e dua na itokani yalewa ka waraki au voli niu a tiko ena mataivalu, kau kila ni na sega ni wawa tale o koya me rua na yabaki! Au a masu meu rawata na veivakadeitaki ni ra sa donu na noqu inaki kau sa dina.
Ki na noqu lomavakatani, au sega ni taura rawa na isau rawarawa ni io-se sega au a nuitaka voli. A qai basika mai vei au na vakanananu: “Na cava e vinakata vei iko na Turaga mo cakava?” Sa dodonu ga meu vakatakila ni sa vinakati au o Koya meu qarava na kaulotu, ka sa yaco oqo me dua na gauna lokuci ki na noqu bula. Meu sa na cakava li na ka e sa lomaqu, se meu sa na cakava na loma ni Turaga? Oya na taro sa dodonu meda na dau tarogi keda kina vakawasoma.
Ena vakavinavinaka, au a digitaka na veiqaravi vakaulotu ka mani lesi meu vakaitavi ena Tabana ni Kaulotu ena Vualiku kei Mexico
Na Vatuka Tawamudu
Ni oti e tolusagavulu kalima na yabaki, a vakayaloqaqataki au na luvequ tagane me keirau talevi Mexico. Keirau a vakanuinui ni kunea e so na tamata au a vakatavulica. Keirau a tiko ena soqoni ni sakaramede ena tauni lailai au a tekivuna kina na noqu kaulotu, ia au sega ni kila rawa e dua na tamata. Ni oti na soqoni, keirau a vosa vua e dua na lewenilotu ka taroga ke kila e dua ena noqu lisi ni tamata au a vakatavulica ena vuqa sara na yabaki eliu. Keitou a lako curuma na lisi ka sega ni kunea e dua, me yacova ni keitou raica na iotioti ni yaca: Leonor Lopez de Enriquez.
“O, io,” a kaya na turaga. “Na matavuvale oqo e tiko ena dua tale na tabanalevu, ia eratou dau lotu ena vale oqo. Na nodra soqoni ni sakaramede e sa tarava.”
E sega ni keirau wawa soti vakadede ena nona sa basika mai o Leonor ki valenilotu. Dina ga ni sa yacova tu o koya na loma ni vitusagavulu na yabaki, au a kilai koya kusarawa, ka kilai au o koya. Keirau a mai veimoko vakabalavu tu ena yaloluluvu.
“Keitou a masu voli ena 35 na yabaki ni ko na lesu tale mai me rawa ni keitou vakavinavinakataki iko ena kauti mai ni kosipeli ki na neitou matavuvale,” a kaya o koya.
Ni ra curuma tale yani na valenilotu na vo ni lewe ni matavuvale, keimami a veimoko ena yaloluluvu. Keirau a dikeva sara ni sa bisopi ni tabanalevu oqo e dua vei ira na luvei Leonor tagane, na daunisere e dua na makubuna yalewa, na dautabapiano e dua na makubuna tagane, ka sa vakakina eso tale na cauravou ena Matabete i Eroni. E dua vei ira na luvena yalewa a vakawati kei na dua na daunivakasala ena mataveiliutaki ni iteki. E dua tale na luvena yalewa a vakawati kei na bisopi ni dua na tabanalevu voleka ga. Levu sara na luvei Leonor era a lako vakaulotu, ka ra sa qaravitavi vakaulotu talega oqo na makubuna.
Keirau vulica ni sa dua na daukaulotu vinaka cake sara o Leonor mai vei au. Nikua era sa vakananuma lesu ena vakavinavinaka na luvena na nona sasaga tawacegu rawa ni vakatavulici ira ena kosipeli. A vakatavulici ira o koya ni vakatulewa lalai, ena gauna emuri, sa na kena vatuka na bula marau e taucoko ka yalododonu, ka ra sa vakatavulica na veika oya vei ira tale eso. Ni tukuni taucoko, era sa curu mai ki na Lotu e sivia ni 500 na tamata baleta ga e dua na matavuvale totoka oqo.
Ka sa rawa ni vagolei lesu taucoko oqo ki na dua na veivosaki ena vakasigalevu. Au dau vakananuma wasoma kevaka me a vakaogai koya vakalevu cake o Dr. Pingree ena nona itavi vakacakacaka se sasaga vakavuravura, ke a sega ni rawa vua me taroga na vuna au a sega ni veiqaravi kina vakaulotu. Ia na nona raiyawa a koto vei ira tale eso kei na tosoi ni cakacaka ni Turaga. A teivaka o koya e dua na sorenikau ka sa tubu, vakavuana, ka sa tomani voli me vua vakaiyauyau (raica na Marika 4:20). Na noqu kaulotu a vakatavulica vei au na vatuka tawamudu ni dua na vakatulewa duadua ga ni cakava na loma ni Turaga.
Nanuma na Nomu iNaki Tawamudu
Au dau railesuva vakavuqa na noqu bula ka vakananuma na vuna e a dredre saraga kina vei au meu cakava na vakatulewa ni gole ki na kaulotu. E a dredre baleta niu a vakagolei tani; au a lecava na noqu inaki tawamudu—na nanuma donu ni vuna eda sa tiko kina eke.
Na noqu gagadre kei na lomaqu a sega ni salavata kei na loma ni Turaga; ke sega, sa na rawarawa cake sara na vakatulewa. Ia cava na vuna era a sega ni salavata kina? Au lako i lotu ka vakayagataka na sakaramede ena Sigatabu, ia au sega ni raica sara na kena ibalebale. Au masu, ia au a lako curuma vakalevu tu ga na itosotoso. Au wilika na ivolanikalou ia vakavudua tu ga ka sega ena nanuma donu.
Au vakayaloqaqataki iko mo bulataka na bula e vakainaki ka raiyawa—ke vaka madaga o se bera ni cakava tudei ena veigauna sa oti. Kakua ni yalolailai ena vakasama ni veika o sa cakava oti se sega ni cakava. Laiva vua na iVakabula me quata vakasavasava. Nanuma na ka sa kaya o Koya: “Ia era na vosoti ena veigauna kece ga era sa veivutuni kina, ena yalodina” (Moronai 6:8; vakamatatataki).
Tekivu oqo. Bulataka e dua na bula vakaituvatuva, ni kilai vakamatata na vuna o cakava kina na ka o cakava kei na vanua ena muataki kina. Ni ko cakava na veika oqo, o na dikeva rawa ni “cava na vuna” bibi duadua ena taudaku ni veika kece o cakava oya ni ko lomana na Turaga ka vakila na Nona loloma vinaka sara vei iko. Mo sa kune reki vakalevu ena nomu vaqara na vinaka sara ka kila vakamatata ka cakava voli na Lomana.