Na Vakatulewa Qaqa
Oqo sa nona madigi me qito ena timi dau wini—me na tukuna rawa vakacava na sega?
“Mo nanuma na siga ni vakacecegu mo vakatabuya” (Mosaia 13:16).
Totolo sara yani o Miranda ena katuba e liu, vakavinavinaka ni nona vale e bau liliwa toka mai na katakata ni vula ikatakata E a buno sara tu ga ni se qai oti na nona qito ena iotioti ni gauna ka ratou a druka kina na Teal Turbos Vakaduatale
Curu mai kina rumu o tinaqu ka kauta tiko mai e dua na tavaya wai kei na dua na taga moli sa selesele oti tu ni a vo mai na qito “Ko a qito sara vakavinaka. Na itutu vaka ivakatawa ni matamata e dua na ka dredre.”
O Miranada e a qito vinaka sara—e a tarova e levu sara na icaqe ki matamata ka icaqe kaukauwa sara. E lewe levu sara vei ira na goneyalewa ena nona timi era se bera vakadua ni bau qito veicaqe e liu ka sa qai imatai ni gauna nikua ka ni ratou sa lusi tu ga mai ena veiqito sa caka ka oti
Au dau gadreva tu meu lewena e dua na timi ka rawa ni bau qaqa tu ena so na gauna, ya mo kila toka. E a lulutu mai e vica na turu ni wainimata e matai Miranda ka tausara ena nona siqeleti karakarawa drokadroka ni qito. ena nona a sasaga me bobo e qai taqiri mai na talevoni.
E a sauma na talevoni o tinana ka kaya mai vua, “qo na nomu.”
“Bula, Miranda? Oqo o o Tomu, na dauveivakavulici ni timi na Chili Kickers. Au a saravi iko tiko ena qito nikua Ko sa matai sara ga na qito.”
E a vaka me totolo na tatuki ni utoi Miranda. Na Chili Kickerws na timi vinaka duadua ena sotasota e caka tiko!
“Ena lako tiko na neitou timi ki na sotasota ni jabeni ena iwasewase ena vula mai oqo. Ko sa rui qito vinaka sara nikua kau vinakati iko mo mai lako vata kei keitou mo mai tu vakarau vei neitou ivakatawa ni matamata.”
Voleka ni odo mai ki tuba na utoi Miranda. Oqo sa nona madigi ni laki qito vata kei na dua na timi e dau rawata na qaqa!
“Io, au na taleitaka!” A kaya yani o Miranda. Erau a veitalanoa ena vica na miniti baleta na matailalai ni veika me na caka ni bera ni vakaotivi ka cici yani ki valenikuro me laki tukuna vei tinana. Erau sa tekivu vola sara na tikinisiga ni vakatovotovo kei na siga ni qito ena ivolanivula ni matavuvale.
Vakasauri ni sa cegu na volavola nei tinana ka mai vakalairoro tu na nona peni ena dela ni dua na tikinisiga ena ivolanivula.
“Oi-lei. Miranda, na qito kece oqo ena vakayacori tiko ena Sigatabu. Qo, mai raica.” E a dusi yani kina ituvatuva ni qito ka vuki yani vei Miranda ena rai ni taqaya. “Na cava o nanuma me daru cakava?”
Taulutu na icegu nei Miranada ka mai katia tu yani na tebe ni gusuna ni vakasama tu se cava me na cakava. Ena rawa ni vakatara o tinana me laki qito kevaka me kerea, ia ni nanuma ga na qito ena Sigatabu—vakabibi na calata na lotu e—sa vuvu ca sara ga e ketena. E kila ni Sigatabu na siga ni lako ki lotu ka laki qarava na Tamada Vakalomalagi, ka na sega ni rawa ni laki cakava na veika oqori kevaka me sa na lako i qito.
Kaya yani o Miranda, “Au nanuma meu sa na qiriti koya lesu ka tukuna vua niu sa na sega ni rawa ni laki qito.” Tovolea vakaukauwa me kakua ni tagi. Dina ga ni sa digitaka oqo na ka e dodonu, sa bau ka dredre sara me vakalaiva na ka e dau taleitaka me cakava.
“O kila tiko beka na ka au nanuma?” Tukuna o Tinana, ni a mokoti koya yani. “Au nanuma ni o iko e dua na gone vinaka.”
Ena Sigatabu o ya ni dabe toka o Miranda ena Lalai e a vakananuma na digidigi vinaka sa digitaka. E a kidroa o dauniveivakavulici ni sa qiri yani o Miranda ka kaya yani ni na sega ni rawa me laki qito ena Sigatabu. E a tovolea me veisautaka na vakasama nei Miranda, ia sa dreve na ka kecega ni sa vakadeitaka o Miranda na ka e vinakata. Oqo ni sa mai vakarogoca toka o Miranda ena matadredredre na sere kei na lesoni ena Lalai. Na vakacegu e kauta mai ki yalona e tukuna vua ni sa tiko oqo ena vanua e dodonu me tiko kina. Sa digitaka o koya na digidigi ni qaqa.
Droini mai vei Brad Teare