Papukeni se Meleni?

Mai vei Rachel Cox

Na dauvolaivola e vakaitikotiko mai Utah, Amerika.

Eso na gauna e sega na digidigi cala. E dua ga na digidigi.

A kurabui o tamaqu ni raica era sa buroro mai ena vula ikatakata oqo na soreni papukeni a tea ena yabaki sa oti ena maliwa ni laini ni meleni. Era sa kadre vinaka tale tikoga mai na meleni—ia sa vakakina na papukeni. Sa mani yaco kina, me temaki sara o tamaqu mera sa vakabulai talega na papukeni. Ia e kila kevaka me cakava oqo, era na vakacacana na bula ni meleni na papukeni.

Sa dodonu kina me sa digidigi kina o koya. Sa na drutia laivi na papukeni mera na bula vinaka cake mai na meleni se mesa na laivi ira ga na papukeni mera tubu ka vakarugui ira na meleni, ka na rawa ni lailai sara na vuadrau ruarua. Papukeni se Meleni? Oqo e dua na digidigi mai na rua na ka vinaka.

Ni sa veidutaitaki rau vata, sa lomai tamaqu sara me sa na cavuti ira laivi na papukeni era sa bula vinaka mai. E sega walega ni berabera nodra buroro mai, ia sa lewa ga ni vinakata cake na meleni sa tuvanaki tu mai ni vakatauvatani na nona vinakata na papukeni veivakakurabuitaki.

Na ka oqo a vakauqeta noqu vakasamataka na digidigi eda dau cakava, vakabibi ena noda tiko veitokani kei ira na tamata. Se da tiko kei ira na noda matavuvale, itokani, taukei ni cakacaka, se o ira noda itau se watida, ni yaco noda digidigi mai na rua na ka vinaka, ka da kila na digidigi vinaka duadua e dau dredre ena so na gauna, vakabibi ni da gadreva meda kakua ni digidigi cala. Ni da rerevaka noda rawa ni digidigi cala e dau vakataotaki keda ena so na gauna, ka yaco me vakaleqai keda mai na noda toso ki liu ena vakabauta. Ia na ka dina, eso na gauna e sega ni dua na digidigi cala. E dua ga na digidigi. Na ka e sotava o tamaqu, a digitaka na ka e bibi vakalevu cake vua. A besetaka sara mera mate na papukeni, ia sa kila tu ni na veivutunitaka e muri na veika ca ena rawa ni yaco vei ira na meleni.

Ena bula oqo, e sega soti ni bibi na digidigi eda dau sotava, me vaka na ka meu na kania ena mataka lailai? Na roka ni vinivo meu na dara nikua? Ni sa rua na ka vinaka meda na digidigi mai kina, eda na cakava na ka a cakava o tamaqu ka taroga, “Na kena cava e bibi cake vei au?” Mo vakatulewa sara ka toso ki liu ena vakabauta, ka nuitaka tiko na Turaga me vakadodonutaki keda ke da sa cala tiko.

Ia eso na digidigi sa ka bibi sara. A kaya vaqo o Peresitedi Thomas S. Monson: “Sa tu ga e matada na vakatulewa. Me caka vakavuku, sa gadrevi kina na yalodei—na yalodei me tukuni na sega, na yalodei me tukuni na io. Na vakatulewa ena vakadeitaka na ilakolako” (“Na Tolu na Yavu ni Digidigi,” Liaona, Nove. 2010, 68). Ni sotavi na mataqali digidigi vakaoqo, oqo ga na taro vinaka duadua, “Na cava e vakabibitaka vakalevu cake na Turaga?” Kevaka eda kila na isau ni taro o ya, na ka ga meda cakava o ya meda muataka na veika e bibi vei keda ki na Nona ka meda qai cakava na digidigi o ya. Ena dau yaco me digidigi dodonu ga.