Veiqaravi ena Lotu
Sa Rauta Beka na Ka Au a Cakava Tiko?
E vakaitikotiko mai Utah, Amerika, o koya e vola.
Na lesoni baleta na sipi a yali a vukea meu kila vinaka kina na sala meu vakayacora vinaka kina na noqu veikacivi.
iTaba mai vei Mike Boyland/iStock/Thinkstock and Oleksiy Fedorov/Hemera/Thinkstock
Niu se qai yabaki 23, au a kacivi meu peresitedi ni iSoqosoqo ni Veivukei ena neimami tabanalevu ni gonevuli sa vakamau. Au nanuma lesu na noqu tawa veiganiti kaya, kei na noqu gadreva meu cakava na noqu vinaka taucoko. Au maqusa ka marautaka sara meu veiqaravi ia au vakatitiqataka niu na rawa ni iliuliu vinaka.
Ni oti e vica na vula noqu peresitedi ni iSoqosoqo ni Veivukei, au vakila niu sega sara ni gugumatua. Au a vinakata meu semati au kei ira na marama ka duavata kei na nodra dui gagadre, ia au vakila niu sega ni rawata.
Au a veivosaki kei noqu bisopi kau vakaraitaka vua na lomaqu. Au a vakamacalataka noqu sega tiko ni semati au rawa vei ira kece na marama. Au vakamacalataka niu diva tu ke me lima e vakataki au meu cakava rawa na itavi oqo ena sala au gadreva me caka kina. Au a saga me toka donu ka vinaka na noqu vakasama, ia e totolo sara na turu ni wai ni mataqu niu sa yalolailai. A dredre o bisopi ka vakasalataki au sara vakavinaka vakailiuliu ena kena au se qai bau ciqoma vakadua.
“O kila tiko beka na italanoa ni ivakatawa ni sipi, ni sa yali e dua na nona sipi, a sa biuti ‘laivi tu na ciwasagavulu ka ciwa’ me kunea rawa?” a kerea (raica na Luke 15:4–7). Au a deguvacu.
“E veivakayalomatuataki sara vakalevu na vosa vakatautauvata o ya,” a tomana. “Sa kila vinaka tu na ivakatawa ni sipi ni ra na tiko vinaka na ciwasagavulu ka ciwa ke sa na biuti ira me vakasaqarai koya na sipi sa yali.”
A qai tomana o bisopi ena vakasala oqo:
“Raica, e vuqa na sala cecere era na veivukevukei kina na ciwasagavulu ka ciwa ena gauna o gole kina. Era na veilaveti cake ka lomavata tiko vakavinaka sara. Au kerea mo raici ira matua ga era sa vaka mera yali tiko. Era na tiko vinaka na kena vo.”
Au vakadinadinataka sara ga ni dina na veika a kaya vei au ni sega ni dodonu meu leqataka na qele ni sipi taucoko ena dua vata na gauna. Sa noqu inaki ga meu kunei ira era sa yali tu ka sureti ira lesu mai ki na qele ni sipi. Ena sala oqo, ena vakayacori rawa kina na inaki nei Tamada Vakalomalagi, kau sa na iyaya ni cakacaka ena Ligana.
Niu vakamuria na ivakasala oqo ni bisopi, au vakila ni cecere cake na noqu kila na sala e vinakata vei au na Turaga meu qarava kina na Nona matanitu. A vakasinati talega vakayalo na lomaqu kau vaqaqacotaki kina ena noqu veikacivi baleta niu sa veiqaravi tiko me vaka na ivakasala ni iVakabula. Mai na kaukauwa ni Yalo Tabu, sa solia kina vei au o bisopi e dua na isolisoli cecere ni kila kei na veivakararamataki.
Au vakadinadinataka ni gauna eda masu kina ka vakasaqara na veivakauqeti vakayalo mai vei ira na noda iliuliu vakamatabete, era na vakauqeti mera vakaraitaka na sala meda veiliutaki kina ena sala dodonu.