A Vosa Tiko kivei Au o Sisita Spafford

Sandy Howson, Ohio, Amerika

Au a qitotaka voli e dua na qito ni vale ni kana ena komupiuta ena dua na bogi ni tasiri na watiqu ka tukuna ni sa laki moce.

“Au na qai gole yani,” au tukuna vua.

“Au na vakadinata niu sa raica,” a kaya o koya.

Au a qitotaka tiko e dua na qito kau a vakasaqara kina na kakana rogo ena dua na vale ni kana rogo me baleti ira na tamata vakaitutu. Au raica cake na sikirini ni komupiuta ka kaya, “Sa na buta tiko mai vakaidina na kakana ena 15 na miniti.”

Meu cakava toka edua na ka niu wawa voli, au a tomika cake na Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei, ka a koto ga ena teveli mai na gauna au taura kina ena iSoqosoqo ni Veivukei. Au tekivu wilika sara na ikau. Ena ikatolu ni tabana au raica kina na kena oqo mai vei Belle S. Spafford, na ikaciwa ni peresitedi raraba ni iSoqosoqo ni Veivukei.

“Na marama yadua ni kua, au vakabauta,” e vola o koya, “ni na vinaka vua me dikeva na veika e dau taleitaka, kalasitaka na itaviqaravi e vakaitavitaki koya kina, qai taura na ikalawa me vakarawarawataka na nona bula, vakaliuca na veika e dodonu me liu, ka vakabibitaka na vanua ena levu kina na kena isau ka levu na vosota e gadrevi kina, ka vakuwai koya mai na kena e sega na betena” (2011, xiii).

Me vakatauvatani kei na ivolanikalou, e sega na ka au sa wilika rawa me tarai au vakatitobu saraga. Na marama ka sa mai mate yani ena sivia na 30 na yabaki sa oti sa mai vosa tiko vei au. Na nona vosa era sa veiganiti cake nikua mai na gauna a cavuta kina.

Au kila kusarawa saraga niu na sega ni na qai qitotaka tale vakadua na qito eso ena komupiuta. Au a bokoca na komupiuta, gole ki davo, ka tukuna vei watiqu na ka au sa vakatulewataka. Na siga e tarava au sega madaga ni waqaca na komupiuta. Ia, au a veidutaitaka na levu ni auwa au a vakamaumautaka tu ena veiqito oya ena veisiga.

Au cakacakataka na tolu na auwa ni siga yadua ki na 365 na (siga taucoko ena dua na yabaki) ka wasea vaka 24 na (auwa taucoko ena dua na siga). Au a kurabui niu kila niu a vakamaumautaka tu e 45.62 na siga ena yabaki yadua. Era sa tasiri sara vakaoti na veiauwa kei na siga vakasakiti oya. Sa rawa niu a vakayagataki ira ena wiliki ni noqu ivolanikalou, veimaliwai vata na watiqu kei ira na luvequ, nodra qaravi tale eso, se na kena vakarabailevutaki na noqu veikacivi.

Era dau tukuna vakawasoma na Vakaitutu Raraba na ulutaga oqo ena koniferedi raraba. Ia e sega ni veilauti sara, kau nanuma ni a sega ni baleti au.

Au vakavinavinaka ni a vukei au na Yalo Tabu meu vakila ni o ira na Vakaitutu Raraba—kei Belle S. Spafford—era a vosa sara tikoga vei au.