Taro kei na iSaunitaro
“Ni tauvimate o tinaqu, keitou a lolo ka masulaki koya, ia a mani mate ga. Meu na vakacegui vakacava ena ka oqori?”
Oqo na gauna rarawataki ena nomu bula. Sa vaka e matau meda dau vinakata na veivakadeitaki kei na isaunitaro ki na taro kecega e tu vei keda. “Na cava e sega ni bula kina? Au na raici koya tale beka? E na rawa vakaevei meu toso tiko ni sa sega o koya?”
Na kosipeli i Jisu Karisito e rawa ni veivakalogalogavinakataki ka sauma na taro. Sa yalataka na Turaga, “Sa kalougata ko ira sa dautagi ni ra na vakacegui” (3 Nifai 12:4). Vakasaqara na Yalo Tabu, ni o Koya na dauveivakacegui.
Ko vakasamataka tiko li se sa rogoci beka na nomu masu. Vakadeitaka: Tamada Vakalomalagi ena dau rogoca kece na masu. Era yalataka vei keda na ivolanikalou kei ira na parofita ni o ya e ka dina. Na ka e a kaya na Turaga vei Josefa Simici, ena vakatalega kina vei iko: “Raica sa rogoci na nomu masumasu kei na nodra masumasu na wekamu” (V&V 90:1). Ia, e diodonu meda nanuma tiko ni Tamada Vakalomalagi e na sauma na noda masu ena dua na vakasama tawamudu (raica na Aisea 55:8–9). O ya na vuna eda vakamuria kina na ivakaraitaki ni iVakabula ena kerei ni veivakalougatataki ia me na qai kerei ena yalodina na loma ni Tamada me na yaco. (raica na Luke 22:42).
Dina ni na dredre, ia na veika oqo ena vakavuna vei iko na tubucake. Ko na rawa ni vulica me tiko na nomu vakabauta na loma ni Kalou kevaka mada ga e a sega ni vakabulai o tinamu Dina sara ni ko a vinakata me a bula. Ia na veivakatovolei ni bula oqo sa ikoya meda vakararavi vua na Kalou ena veigauna kece ena gauna sara ga e dredre kina na bula. Kevaka ko na vakararavi Vua “ena rawa vakavinaka na veika kece e baleti kemudou” (V&V 90:24).
Na mate e Tiki ni iTuvatuva.
Ena yavu ni bulamarau ni Tamada Vakalomalagi baleti keda, ena vakatau na noda na lesu ka laki bula vata kei Koya ena mate kei na tucaketale ka na vukei keda meda veisau mai na bula vakayago ena rawa ni mate kina bula vakayalo ena sega ni mate rawa. Mo na ciqoma walega ni mate e tiki ni yavu ka vakabauta ni dua na siga ko na rawa ni laki bula vata tale kei na tinamu sa mate. Mo na kila ni o tinamu sa bula tu mai na vuravura ni yalo ka sa na waraki iko tu mai.
David M yabaki 18 Kasai, e Democratic Republic mai Congo
O koya sa tu mai na Vuravura ni Yalo
E a laurai vei tinaqu na kenisa ena rua na yabaki sa oti. Au sega ni taleitaka meu raici koya ni dau mosi tu, kau dau gadreva meu cakava kina e dua na ka. Dina ga ni a qai bula vinaka cake o tinaqu sa dua na ka dredre e a sotavi. Na tinamu sa tiko ena vanua ka sega kina na mosi se na tagi Sa ka dredre sara ni ko sa sega ni raici koya, ia ko na sega vakadua ni tu taudua. O koya ena dau lomani iko tikoga, kei na Tamada Vakalomalagi ena dau tu volekati iko me tuberi iko cake ni ko sa tekivu lutu. Kona sega vakadua ni na biu taudua tu. O Jisu Karisito e a vakararawataki baleta na ivalavala ca e vuravaura, e kila vinaka na veika o vakila, kei na veika o sa sotava tiko. Cakava na ka au a cakava ena noqu a vakatovolei, lako Vua ka na qai vakamamadataka o Koya na nomu icolacola.
Shiloh W., yabaki 18 Chihuahua mai Mexico
Ena Veisemati Tale na Nomu Matavuvale
E a mate o tinaqu niu se qai yabaki 12. Au a sega tu ni lewe ni Lotu ena gauna o ya. Ena nona tauvimate voli au a dau masulaki koya me rawa ni bula vinaka cake tale. Au a dei ena vakabauta ka vakararavi vua na Kalou ena vakanuinui ni na bula vinaka tale o tinaqu. Ka ni rarawa ni a qai sega ni bula vinaka cake rawa tale. Au a taroga se cava me mate kina ena yabaki se lailai ka laivi au tu mai niu se yabaki tu ni itabagone. Au sa cudru sara ga ka sa vaka meu tekivu vakabekataka ni bula dina tiko na Kalou. Ia oqo niu sa mai lewena na Lotu au sa qai kila na yavu ni veivakabulai Au kila ni sa waraki au tiko mai ka keitou na laki semati vata tale vakamatavuvale.
Inaê L., yabaki 19, e Minas Gerais, mai Brazil
Na Veivakatovolei e Vakavulici Keda
E mate o tinaqu ena tolu na yabaki sa oti. Na nomu veiwekani kei na Tamada Vakalomalagi kei na iVakabula ena tubucake kevaka mo na vakararavi vei rau ena nomu gauna ni nomu gagadre. Ko na raica ni veivakatovolei oqo, ena tarai iko sara vaka ca, ia ena rawa talega ni ka ni veivakalougatataki. Masu vua na Tamada sa tiko mai lomalagi me baleta na veivakacegui kei na veivakadeitaki. Vakararavi kina yavu ni Turaga me baleti iko. Ciqoma ni kila tu na Tamada Vakalomalagi na vanua eda lako tiko kina kei na ka e gadrevi meda na yaco kina. E lomani kemuni na Turaga ka gadreva mo bula marau Na veika e vakatovolei keda e dodonu me vakavulici keda ka meda na vakaukauwataki kina.
Meghan B., yabaki 18, Ontario, Kenada
Ko na Raici Koya Tale
E a mate o tinai tinaqu ni se qai yabaki 17 o tinaqu. Eratou a lolo ka masu na nona matavuvale me baleti koya ena vica na macawa ni bera ni mate. E a soli talega vua na veivakalougatataki vaka-matabete. Na ka duauda e a vakacegui tinaqu voli mai ni kila tu ni na raici tinana tale ena bula sa bera mai. Na ituvatuva e vakanamata tu kina o tinaqu me na bulakilikili me na rawata na veivakalougatataki o ya. Au rarawa niu sega ni sotavi koya ena bula oqo, ia au sa vakanamata kina gauna me keirau na qai laki sota kina.
Kari R., yabaki 15 Utah, Amerika