Taqiri ni Talevoni ena Gauna Donu
E vakaitikotiko o koya e vola mai Taichung, Taiwan.
Niu tubu cake voli, au a sega ni vakabauta ni tiko e dua na Kalou. A sinai tu na noqu bula ena veilecayaki, kau dau lomabibi sara ena noqu veisiga butobuto kau sa vinakata kina meu sa yalana na noqu bula. Oya na gauna rau a mai tukituki kina ena noqu katuba na daukaulotu. Na kosipeli sai koya saraga na ka au a gadreva tu; au a dreti kina me vaka na makeneta.
Na noqu veivakatovolei a sega ni cava ni oti na noqu lewena na Lotu, ia au a sa tu vinaka sara meu vorata na veivakayarayarataki ni vunica. Oqo na matai ni gauna, au sa qai vakila na cava na bula marau.
Ia, na yalolailai a sega ni tasereka vakarawarawa na kena kukube. Ena dua na gauna au a sa via soro tale. Ena gauna oya a qiri mai kina o Sisita Ting, na wati bisopi. E tukuna vei au o koya ni a vakila voli ni sa gadrevi vua me qiriti au. A taroga o koya seu sa vakacava tiko. Au tukuna vua na ka taucoko me baleti au. Vei au, sa dua na agilosi o koya a tala mai na Kalou.
A vakaukauwataki au na ka a yaco oya. Sa vaqaqacotaki na noqu vakabauta. Au vakila niu sa rawa ni valuta na mate. Au vakila niu sa sereki, vaka e tukuni ena Alama 36:2–3:
“Sa sega ni dua sa sereki ira rawa mai na nodra tiko vakabobula, ko koya ga na … Kalou. …
“…Ko ira kecega sa vakabauta na Kalou sa dauvukei ira ko Koya ena nodra leqa, ka vakacegui ira mai na nodra rarawa, ia era na laveti cake ena siga mai muri.”
Au se vakatovolei tikoga, ia au na sega ni vakadrukai tale. E sa tokoni au tu na Kalou ena noqu veivakatovolei kei na nuiqawaqawa taucoko. E sa vakabulai au o Koya mai na valeniveivesu vakayalo kei na veivakararawataki, na mate sara madaga. O Koya sa noqu iVakabula.