Aua le Mata’u, Tau Lava Ina [Talitonu]
Saunia e Peresitene Dieter F. Uchtdorf
Fesoasoani Lua i le Au Peresitene Sili
A tatou filifili e talitonu, faatino le faatuatua e oo i le salamo, ma mulimuli i lo tatou Faaola, o Iesu Keriso, ua tatou tatalaina o tatou mata faaleagaga i mea ofoofogia e seasea ona tatou mafaufauina.
Papelonia ma Tanielu
Lua afe ono selau tausaga talu ai, sa avea ai Papelonia ma malo sili ona malosi i le lalolagi. Sa faamatala e se tasi o tusitalafaasolopito anamua, o puipui o Papelonia na siomia ai le aai sa silia ma le 300 futu (90 m) le maualuga ae 80 futu (25 m) le mafiafia. “I le ofoofogia tele,” sa ia tusia ai, “sa leai ma se isi aai na latalata … i ai.”1
I ona aso, o Papelonia o le laumua lea o le lalolagi mo aoaoga, tulafono, ma filosofia. Sa lei mafaatusaliaina lona malosi faafitafita. Na olopalaina le malosi o Aikupito. Sa osofaia, faaumatia, ma veteina le laumua o Asuria, o Nineva. Sa meafua lona faatoilaloina o Ierusalema ma avefaapagota fanau sili ona lelei ma atamamai o Isaraelu i Papelonia e fai ma auauna a le Tupu o Nepukanesa.
O se tasi o ia pologa o se alii talavou e igoa ia Tanielu. E toatele le au atamamai e talitonu o Tanielu sa i le va o le 12–17 tausaga le matua i lea taimi. Mafaufau i ai, ou uso pele talavou o le Perisitua Arona: Sa pei lava Tanielu o le tou matutua ina ua avatu o ia i le maota o le tupu ina ia aoaoina i le gagana, tulafono, tapuaiga, ma le faasaienisi o mea faalelalolagi a Papelonia.
E mafai ona outou mafaufauina pe faape’i ni lagona o le aveese faamalosi mai tou aiga, ma savavali i le 500 maila (800km) i se nuu ese, ma aoao ai i mataupu sese i le tapuaiga a ou fili?
Sa tausi ae Tanielu o se tasi e mulimuli ia Ieova. Sa ia talitonu ma tapuai i le Atua o Aperaamo, Isaako, ma Iakopo. Sa ia suesueina upu a perofeta, ma sa ia iloaina fegalegaleaiga a le Atua ma tagata.
A o lenei la, i le talavou tele, ua avea o ia ma se tamaitiiti aoga pagota i Papelonia. Masalo o se avega ina matua mamafa ia te ia le lafoaia o ona talitonuga tuai ma talia talitonuga a Papelonia. Ae sa ia tumau i lona faatuatua—i upu ma galuega.
E toatele outou ua iloaina le lagona o le puipuia o se upumoni inosia. I le gagana FaaInitoneti o aso nei, tatou te talanoa ai i le “mu i le afi” po o le ita atu i faitioga a i latou e le fiafia ia i tatou. Ae sa le na o le lamatiaina o Tanielu i tauemuga a tagata lautele. I Papelonia, o ē lu’iina taitai faalelotu ua malamalama lelei i lona uiga—faafaatusa ma le mea moni—o le “mu i le afi.” Ia fesili ifo i uo a Tanielu o Sataraka, Mesako, ma Apeteniko.2
Ou te le iloa pe sa faigofie mo Tanielu le talitonu i sea ituaiga o siosiomaga. O nisi tagata ua faamanuiaina i se loto e talitonu gofie—mo i latou, e foliga mai e oo mai le faatuatua o se meaalofa mai le lagi. Ae ou te mafaufau faapea o Tanielu sa pei o le toatele o i tatou e ao ona galue mo a tatou molimau. Ou te talitonu e tele ni itula sa faaalu e Tanielu e tootuli ai e tatalo, ma faataatia ana fesili ma popolega i luga o le fata faitaulaga o le faatuatua, ma faatalitali i le Alii mo le malamalama ma le poto.
Ma sa faamanuia e le Alii ia Tanielu. E ui sa luitauina lona faatuatua ma tauemuina, ae sa ia tumau ma le faamaoni i mea na ia iloa i ona lava aafiaga e sa’o.
Sa talitonu Tanielu. Sa lei masalosalo Tanielu.
Ona oo lea i se tasi po, sa faia ai e le Tupu o Nepukanesa se faalepo na atuatuvale ai. Sa ia faapotopoto mai lana vaega o tagata atamamai ma faufautua ma poloaiina latou te faamatala atu le faalepo ia te ia ma faaali atu foi ia te ia lona uiga.
Ioe, sa latou le mafai. “E leai ma se tasi e mafai ona faia le mea ua e fai mai ai,” sa latou aioi atu ai. Ae sa tupu tele ai le ita o Nepukanesa, ma ia poloaiina ai ia fasiotia uma tagata popoto, taulaitu, tagata vaai ma faufautua—e aofia ai ma Tanielu ma isi tamaiti aoga laiti mai Isaraelu.
O oe ua masani i le tusi a Tanielu ua e iloaina le mea na sosoo ai. Sa ole atu Tanielu ia Nepukanesa mo se isi taimi faaopoopo, ma o atu ai loa o ia ma ana soa faatuatua i le puna o lo latou faatuatua ma le malosi tonu. Sa latou tatalo i le Atua ma ole atu mo le fesoasoaniga a le lagi i lea taimi taua tele. “Ona faaali mai ai lea i le faaaliga … ia Tanielu o le mea sa lilo.”3
O Tanielu, le taulealea mai se malo na faatoilaloina—sa amusiaina ma sauaina ona o le talitonu i lana tapuaiga ese—sa alu atu i luma o le tupu ma faailoa atu ia te ia le faalepo ma lona faauigaga.
Mai lena lava aso, ona o se taunuuga tonu o lona faatuatua i le Atua, na avea ai Tanielu ma se faufautua faatuatuaina a le tupu, na lauiloa i lona atamai i Papelonia atoa.
O le taulealea na talitonu ma ola i lona faatuatua ua avea nei ma se tagata o le Atua. O se perofeta. O se aloalii o le amiotonu.4
O Tatou pei ea o Tanielu?
Ia i tatou uma o loo umiaina le perisitua paia a le Atua ou te fesili atu, o tatou pei ea o Tanielu?
O tatou tumau ea ma le faamaoni i le Atua?
O tatou ola ea i mea o tatou talai atu, pe o tatou ua na o ni Kerisiano i le Aso Sa?
O atagia manino atu ea i a tatou amioga o aso uma mea ua tatou talitonu i ai?
O tatou fesoasoani atu ea i “e matitiva ma lē tagolima, o e mamai ma mafatia”?5
Pe o tau na ona tatou tautatala ai, pe o tatou savavali ma le naunautai ea i na mea sa’o?
Uso e, ua tele mea ua aumai ia i tatou. Ua aoaoina i tatou i upumoni paia o le talalelei toefuataiina a Iesu Keriso. Ua faatuatuaina i tatou i le pule o le perisitua e fesoasoani ai i o tatou uso a tagata ma fausia ai le malo o le Atua i le lalolagi. O loo tatou ola i se taimi o le liligi tele mai o le mana faaleagaga. Ua ia i tatou le atoaga o le upumoni. Ua ia i tatou ki o le perisitua e faamau ai mea i le lalolagi ma i le lagi. Ua maua tusitusiga paia ma aoaoga paia a perofeta soifua ma aposetolo e lei maua i se isi lava taimi muamua.
Au uo pele, aua nei o tatou manatu faatauvaa i mea nei. Faatasi ai ma nei faamanuiaga ma avanoa e oo mai ai tiutetauave ma matafaioi tetele. Sei o tatou tutulai ma tali atu i na tiute.
O le aai anamua o Papelonia ua faatafunaina. Ua leva ona leai sona matagofie. Ae o loo ola pea mea faalelalolagi ma amioleaga a Papelonia. O lo tatou tiute la le ola ai o ni tagata talitonu i se lalolagi lē talitonu. O la tatou lu’i o le faatinoina i aso taitasi o mataupu faavae o le talalelei a Iesu Keriso ma ola ma le faamaoni i poloaiga a le Atua. E ao ona tatou toafimalie i taimi o faatosinaga a uo, aua nei faafiafiaina i sitaili a le lalolagi po o perofeta pepelo, ia lafoai le faatauemu i le amioatua, ma tetee atu i faaosoosoga a le tiapolo e toatasi, ma faatoilalo lo tatou lava paie.
Sei mafaufau i ai. Semanu e matua faigofie tele mo Tanielu le tau na ona mulimuli ai i ala o Papelonia? Sa ono mafai lava ona ia faataatia ese tulaga faatonuina o le amio na tuu atu e le Atua i le fanauga a Isaraelu. Sa mafai lava ona ia ai i meaai na saunia e le tupu ma gauai atu ai i fiafiaga faalelalolagi o le tagata natura. Semanu na te alofia le tauemuina. Semanu e taliaina o ia e tagata maualuluga o Papelonia ma maua viiga ma faamamaluga a uo, faiaoga, ma le malo o Papelonia.
Semanu e lauiloa o ia.
Semanu e taliagofie o ia.
O lona ala semanu e le faigata tele.
Ioe, o le mea lena sa tupu seia oo i le aso na poloaiina ai e le tupu se faaliliuga o lana faalepo. Ma semanu e pei ai Tanielu o isi uma “tagata popoto” o Papelonia, e motusiaina lana fesootaiga ma le puna moni o le malamalama ma le atamai.
Sa pasi le suega a Tanielu. Ae o loo faaauau pea [le tatou suega].
O Le Lototele e Talitonu ai
O Satani, lo tatou fili e manao ia tatou toilalo. Na te faasalalauina pepelo o se vaega o ana taumafaiga e faaumatia lo tatou talitonuga. Na te fautua mai ma le poto e faapea o le tagata masalosalo, lē talitonu, ma lē mautonu e sili ma atamai, a o latou e faatuatua i le Atua ma Ana vavega e vālea, tauaso, ma faaseseina. O le a ia taufaasese mai e lelei le masalosalo i meaalofa faaleagaga ma aoaoga a perofeta moni.
Maimau pe ana mafai ona ou fesoasoani i tagata uma ia malamalama i lenei mea moni faigofie: Tatou te talitonu i le Atua ona o mea ua tatou iloa i o tatou loto ma mafaufau, ae le ona o mea tatou te le o iloaina. O o tatou aafiaga faaleagaga o nisi taimi e fefefe tele ai e faamatala i faaupuga faalelalolagi, ae e le faapea ai e le moni.
Ua sauniaina e le Tama Faalelagi mo Ana fanau se tausamiga faaleagaga, ua ofo mai ai ituaiga uma o meaai manogi e mafaufauina—ae i lo le fiafia ai i nei meaalofa faaleagaga, o le au lē talitonu e faamalieina i latou lava i le matau mai se mea mamao, ma inu mai latou ipu o le le mautonu, masalosalo, ma le le faaaloalo.
Aisea e savali ai se tasi i lona olaga ua faamalieina i sina malamalama itiiti mai le moligao o lona lava tamai malamalama, a o lea e mafai, e ala i le aapa atu i lo tatou Tama Faalelagi, ona mauaina le susulu tele o le la o le malamalama faaleagaga lea e mafai ona faalauteleina ai o latou mafaufau i le atamai ma faatumuina ai o latou agaga i le olioli?
Pe a tatou talanoa atu i tagata e uiga i le faatuatua ma le talitonu, tatou te le faalogo soo ea faapea, “Maimau pe a na ou talitonu i le ala e te talitonu ai.”
I le malamalama ai i sea faamatalaga o se isi taufaasese lea a Satani: e faapea e maua e nisi tagata le talitonu, ae le maua e isi. Ae e le o se maneta e maua ai le talitonu. O le manao ia talitonu o le laasaga taua muamua lea! E le faailoga tagata le Atua.6 O Ia o lou Tama. E finagalo o Ia e fetalai atu ia te oe. Peitai, e manaomia ai sina fiailoa maoti—se faataitaiga o le afioga a le Atua—ma le faatinoga o se “vaega o le faatuatua.”7 E manaomia ai foi sina lotomaualalo. Ma e manaomia ai se loto matala ma se mafaufau matala. E manaomia ai se sailiga, i le uiga atoa o le upu. Ma e masalo o le mea sili ona faigata o mea uma, e manaomia ai le onosai ma le faatalitali i le Alii.
Afai tatou te le faia se taumafaiga e talitonu ai, e pei lava la i tatou o le tagata na te seieseina le uaea o le molīsulu ona tuuaia lea o le molī i le le faasusulu maia o se malamalama.
Talu ai nei sa faateia ai au ma faanoanoa i le iloaina o se alii Perisitua Arona sa foliga mai na faamaualuga i lona manatu moni ua ia faataumamao o ia mai le Atua. Fai mai o ia, “Afai e faaali mai e le Atua o Ia lava ia te au, ona ou talitonu lea. Ae o le taimi nei, o le a ou sailia le upumoni i lou lava malamalama ma le atamai e faamalamalama ai le ala i ou luma atu.”
Ou te le iloaina patino lenei alii talavou, ma ou te le iloa foi lona loto, ae ua le mafai lou lagonaina o le faanoanoa tele mo ia. Oka se faigofie ona ia teenaina o meaalofa a le Alii sa ofoina atu ia te ia. Ua seiese e lea alii talavou le molīsulu ma foliga mai ua faamalieina o ia i lana lava matauga atamai i le leai o se malamalama o susulu mai.
O le mea e leaga ai, o lenei uiga e foliga mai ua fai lava si taatele i nei aso. Afai tatou te tuu atu i le Atua e faaali mai upumoni nai lo lo tatou sailia, ou te manatu e mafai ona tatou faia ni alofaga mai le manatu mamafa i poloaiga a le Atua ma mai le faia o tiutetauave mo la tatou sootaga ma lo tatou Tama Faalelagi.
Uso e, sei ou faamanino atu: e leai se mea mamalu pe faagaeetia i le masalosalo. O le le talitonu e faigofie lava—soo se tasi e mafai ona oo i ai. O le olaga faatuatua e manaomia le malosi tonu, tuuto, ma le lototele. O i latou e pipiimau i le faatuatua e sili atu ona faagaeetia nai lo i latou e gauai atu i le masalosalo pe a aliae mai ni fesili po o ni atugaluga fenumiai.
Ae e le tatau ona faateia i tatou i le le faatauaina o le faatuatua e malo. Ua i ai i le lalolagi se talafaasolopito umi o le teenaina o le faatuatua lea e le malamalama i ai. Ma e i ai se faafitauli patino i le malamalama i mea e le vaaia. Ae e le faapea tatou te le mafai ona vaaia se mea i o tatou mata faaletino ona faapea ai lea e le o i ai. O le mea moni, “e anoanoai mea i le lagi ma le lalolagi … i lo mea o moemiti ai i tusia’oga, apitalaaga faasaienisi, ma filosofia faalelalolagi.8 Ua faatumulia le atulaulau i mea ofoofogia e oooo ma maofa ai—o mea e na o mata faaleagaga lava e mafai ona malamalama i ai.
O Le Folafolaga o le Talitonu
A tatou filifili e talitonu, faatino le faatuatua e oo i le salamo, ma mulimuli i lo tatou Faaola, o Iesu Keriso, ua tatou tatalaina o tatou mata faaleagaga i mea ofoofogia e seasea tatou mafaufauina. O le mea lea o le a faatupulaia malosi atili ai lo tatou talitonu ma le faatuatua, ma o le a tele atu mea tatou te vaaia.9
Uso e, ou te molimau atu e oo lava i taimi sili ona faigata, o le a fetalai atu le Faaola ia te oe e pei ona Ia fetalai atu ai i se tamā popole i se ala tumutumu i Kalilaia, “Aua e te mata’u, tau lava ina e [talitonu].”10
E mafai ona tatou filifili e talitonu.
Aua o le talitonu, tatou te maua ai le malamalama.
O le a tatou mauaina upumoni.11
O le a tatou maua le filemu.12
Ona o lo tatou talitonu, o le a tatou le matelaina ai, pe galala.13 O meaalofa o le alofa tunoa o le Atua o le a tatou mafai ai ona tatou faamaoni i lo tatou faatuatua ma o le a faatumulia ai o tatou agaga i le “vaipuna e puna i luga i le ola e faavavau.”14 O le a tatou lagonaina le olioli moni ma le tumau.15
O le mea lea, au uo pele, ou uso pele i le perisitua a le Atua:
Ia lototetele e talitonu.
Aua le matata’u, tau lava ina talitonu.
Tutu faatasi ma Tanielu.
Ou te tatalo mo i tatou uma taitoatasi—talavou ma matutua—o le a maua se malosi faafouina, lototele, ma le manao e talitonu. I le suafa o Iesu Keriso, amene.