Ua Manatunatu Pea Lo’u Loto I Ai
Saunia e Devin G. Durrant
Fesoasoani Muamua i le Au Peresitene Aoao o le Aoga Sa
Ou te tatalo faamaoni ina ia tou filifili e mafaufau loloto i afioga a le Atua i se tulaga lautele ma loloto atu.
I le matata faalegaluega, o au o se tagata e teufaafaigaluega tupe. I le faatuatua, o au o se soo o Iesu Keriso, le Alo o le Atua.1 I le faiga o la’u pisinisi, ou te fiafia i mataupu faavae lelei tautupe. A ou ola i lo’u faatuatua, ou te taumafai e mulimuli i mataupu faavae faaleagaga ia o le a fesoasoani ia te au ou te avea atili ai faapei o le Faaola.
O Valaaulia e Aumaia ai Faamanuiaga
O le tele o taui patino ua ou mauaina i le olaga, na ou maua ona o se taunuuga o se tasi na valaaulia au e faia se galuega faigata. I lena faamoemoega, ou te fia tuu atu ai ia te outou taitoatasi ni valaaulia se lua. Muamua e i ai ni aafiaga tautupe. O le valaaulia lona lua, o aafiaga e faaleagaga. O ia valaaulia uma e lua, afai e taliaina, o le a manaomia ai se taumafaiga e pulea lelei mo se taimi umi ina ia selesele ai ia taui.
O Le Valaaulia Muamua
O le valaaulia muamua e faigofie: Ou te valaaulia outou ia teu se tupe i vaiaso taitasi. O le aofaiga e te teuina e le matua tele tele; e pule lava oe. A e atinae se mausa o le teu, o le a manuia ai lava oe. E mafai foi ona e maua ai avanoa e fesoasoani atu ai i isi i tulaga tautupe ona o se taunuuga o lou maelega. Mafaufau i le taunuuga lelei o le teuina o tupe i vaiaso taitasi mo le 6 masina, se tausaga, 10 tausaga, pe sili atu. O taumafaiga laiti e lagolagoina mo se taimi umi, e mafai ona fua mai ai ni taunuuga iloga.2
O Le Valaaulia Lona Lua
O la’u valaaulia lona lua e fai lava si ese mai, ma e sili atu ona matua taua nai lo le muamua. O lenei: Ou te valaaulia outou e “manatunatu loloto”3 se fuaiupu se tasi o tusitusiga paia i vaiaso taitasi. O le upu manatunatu loloto e le o maua i le lomifefiloi, ae ua mauaa i lo’u loto. O le a la le uiga o le manatunatu loloto? Ou te fia fai atu o se tuufaatasiga o le 80 pasene o le manatunatu loloto ma le 20 pasene o le taulotoina.
E lua nai sitepu faigofie:
Muamua, filifili se fuaiupu o se mau i vaiaso taitasi o le a e vaai i ai i aso uma.
Lua, faitau pe mafaufau i le fuaiupu i le tele o taimi i aso taitasi ma manatunatu i le uiga o ona upu ma fasifuaitau autu i le vaiaso atoa.
Mafaufau i taunuuga faagaeetia o le faia o lenei mea i vaiaso taitasi mo le ono masina, se tausaga, 10 tausaga, ma sili atu.
A o e faia lenei taumafaiga, o le a e lagonaina le faateleina o le faaleagaga. O le a mafai foi ona e aoao atu ma sii ae i latou e te alofa i ai i ala e sili ona anoa.
Afai e te filifili e manatunatu loloto i vaiaso taitasi, e mafai ona e lagonaina sina mea e pei o se tagata sa fiafia e faitau tusitusiga paia muamua, a o lea ua atili fiafia ma malamalama ai nei. Faatasi ma lena faaiuga o le a e maua se malamalama loloto atu o mataupu faavae o le talalelei ma o le a faamanuiaina ai lou olaga i se vaaiga faaleagaga fou.
A o e mafaufau i lau fuaiupu filifilia i vaiaso taitasi, o le a tusia ia upu ma fasifuaitau i lou loto.4 O le a tusia foi upu ma fasifuaitau i lou mafaufau. I se isi faaupuga, o le a faigofie ma masani ona taulotoina. Ae o le uluai sini lava o le manatunatu loloto o le saunia lea o se nofoaga faagaeetia mo ou mafaufauga e alu i ai—se nofoaga e te latalata atu ai i le Agaga o le Alii.
Na fetalai le Faaola, “Ia teu i o outou mafaufau e le aunoa ia upu o le ola.”5 O le manatunatu loloto o se auala faigofie ma le faagaeetia e fai ai lea mea.
Ou te talitonu o Nifae o se e manatualoto. Fai mai a ia, “Ua fiafia lo’u loto i tusitusiga paia, ma ua manatunatu loloto i ai lo’u loto [e le aunoa], ma ua ou tusia mo le aoaoga ma le manuia o a’u fanau.”6 Sa mafaufau o ia i ana fanau a o ia manatunatu loloto ma tusia ia tusitusiga paia. E mafai faapefea ona manuia lou aiga a o e taumafai e le aunoa e faatumu lou mafaufau i afioga a le Atua?
O La’u Fuaiupu
Talu ai nei sa ou manatunatu loloto ai le Alema 5:16. E faitauina, “Ou te fai atu ia te outou, e mafai ea ona outou mafaufau ifo ia te outou lava e peiseai ua outou faalogo atu i le siufofoga o le Alii, ua fetalai mai ia te outou i lena aso: O mai ia ia te au, outou o e ua faamanuiaina, aua faauta, o a outou galuega o galuega ia o le amiotonu i luga o le lalolagi?”
I le faaiuga o le vaiaso o le mea lea na iu ane ua tusia i lo’u mafaufau: Mafaufau faapea ua e faalogo i le siufofoga o le Alii ua faapea mai, “O mai ia ia te au outou o e ua faamanuiaina, aua faauta, o a outou galuega o galuega ia o le amiotonu” (Alema 5:16).
Ua outou vaai nei la, ou te lei taulotoina le fuaiupu atoa o le upu ma le upu. Peitai, sa ou manatunatu loloto i lea taimi ma lea taimi i elemene autu o le fuaiupu, ma le mea e maua ai. Ae o le vaega sili o le faagasologa, sa i ai sa’u nofoaga maualuga atu e oo i ai o’u mafaufauga. I le gasologa o le vaiaso, sa ou vaai faalemafaufau ai i le Faaola o fai mai nei upu faamalosiau ia te au. O lena ata na tuia ai lo’u loto ma avea ma mea e musuia ai au ia ou manao e faia “galuega o le amiotonu.” O le mea lea e mafai ona tupu pe a tatou “vaai atu ia [Keriso] i mafaufauga uma.”7
E Tatau Ona Tatou Teena
Atonu e te fesili, “Aisea e tatau ai ona ou faia lenei mea? O le a ou tali atu o loo tatou ola i se taimi ua matua salalau ai le amioleaga. E le mafai na ona tatou taliaina le tulaga o mea i le taimi nei ma faalogologo i upu leaga ma matamata i ata mataga e toetoe o soo se itu tatou te faliu i ai ma leai se mea e faia e tali atu ai. E tatau ona tatou teena. A oo ina tutumu o tatou mafaufau i mafaufauga ma ata faagaeetia, pe a tatou “manatua pea o ia,”8 ona leai lea o se avanoa e totoe mo mea eleelea ma otaota.
I le Tusi a Mamona, ua valaaulia ai e Iesu Keriso i tatou uma e “mafaufau loloto i mea sa [Ia] fai mai ai.”9 Vaavaai i le manatunatu loloto o se faaopoopoga i lau suesuega o tusitusiga paia e oe lava faapea ma le aiga. O le manatunatu loloto e peiseai ua faaopoopo se vaitamini fou faatoa sau i lau tausamiga faaleagaga i le taimi nei.
E Faigata Tele
Atonu e te faapea, “O le manatunatu loloto e foliga faigata ia te au.” Aua e te lotovaivai. O le faigata e mafai ona lelei. Ua valaaulia i tatou e Keriso e faia mea faigata e tele ona ua Ia silafia o le a faamanuiaina i tatou o se taunuuga o a tatou taumafaiga.10
E i ai so matou tuaoi talavou na mauaina se ala faigofie e manatunatu loloto ai. Na te tuuina lana mau faalevaiaso i luga o le lau o lana telefoni. O se isi aitia e mafai ona e faataitaia o le faasoa atu o lau fuaiupu i se uso po o se tuafafine, se tamaitiiti, po o se uo. O ma’ua ma lo’u toalua o Julie e fesoasoani le tasi i le isi. Ma te filifilia a ma fuaiupu i Aso Sa taitasi. Na te tuuina lana fuaiupu i luga o le matou pusa aisa. O au e tuu i la’u taavale. Ona faasoa lea o o ma mafaufauga e uiga i a ma fuaiupu i le gasologa o le vaiaso. Ma te fiafia foi e talanoaina a ma fuaiupu ma le ma fanau. A o matou faia, e foliga mai e atili ai ona faigofie ia i latou ona faasoa mai o latou manatu e uiga i le afioga a le Atua.
O i ma’ua ma Julie ma te auai i se vaega o le upega tafailagi lea e toatele tagata o aiga, uo, ma faifeautalai e mafai ona faasoa mai ai mau i vaiaso taitasi ma o isi taimi e aofia ai ma se mafaufauga po o se molimau. O le avea ai ma se vaega o se faalapotopotoga e faia ia atili ai ona faigofie le tumau ai. E faaaoga e lo’u afafine i le aoga maualuga ma ana uo ala faasalalau faaleagafesootai ma feau tusitusia e fefaasoaai ai ia tusitusiga paia.
Faamolemole aua tatou te faatuai e faaaofia ai tagata o isi faatuatuaga i a outou vaega. O loo latou vaavaai foi mo ni ala e siitia ai o latou mafaufauga ma lagonaina le latalata atu i le Atua.
O A Faamanuiaga?
O a la faamanuiaga? Sa ma manatunatu loloto ma Julie se fuaiupu i le vaiaso mo le silia ma le tolu nei tausaga. Muamua, sa ma faatuina se sini mo le 20 tausaga. Sa ia fai mai ia te au talu ai nei, “Ina ua e faatoa valaaulia au e manatualoto se mau i vaiaso taitasi mo le 20 tausaga, sa ou taumafaufau pe mafai ona ou faia mo se masina. Ua le toe ia te au na masalosaloga. Ou te le talitonu i le malie o le tuu o se mau i luga o le pusa aisa i vaiaso taitasi ma i le na o le manatunatu loloto i ai i taimi taitasi ou te vaai ai i ai, e musuia ai lo’u agaga.”
Ina ua uma ona manatunatu loloto mo le ono vaiaso, sa fai mai se tuafafine mai Texas, ISA: “Ua faamalosia lava la’u molimau, … ma ua ou lagonaina lava le latalata atu i lo’u Tama Faalelagi. … Ua ou fiafia lava i le ala ua suia ai e le afioga a le Atua a’u mo se mea e sili atu.”
Na tusi mai se uo talavou: “Ua ou matua fiafia lava ua mafai ona ou [manatunatu loloto] aua ua fesoasoani ia te au e taulai ai i mea e taua moni.”
Na faasoa mai e se tasi o a matou faifeautalai le mea lenei: “Sa ou manatunatu loloto se fuaiupu i vaiaso taitasi talu mai Iuni 2014, ma ua ou fiafia lava i ai. … O nei mau ua avea e pei o ni uo i taimi e manaomia ai.”
Ia te au lava ia, ua atili ou lagonaina atoa ai le Agaga a o ou manatunatu loloto i vaiaso taitasi. O lo’u fiafia i tusitusiga paia, ua faateleina foi ona o se taunuuga lea o le taumafai e “teuteu [o’u mafaufauga] i le mama e le aunoa.”11
Mafaufau i le valaaulia lea ma le faamanuiaga maoae na faamatala mai e Nifae: “Afai tou te fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tama: O le a outou maua le ola e faavavau.”12 I le agaga o le “taumamafa fiafia i le afioga a Keriso,” ma manatunatu loloto e pei o le tofo i se meaai matagofie ona lamulamu malie ai a lea seia oo ina fiafia i ai atoatoa.
O Le A Lau Fuaiupu?
Pe o le a e manatunatu loloto se fuaiupu o se mau i vaiaso taitasi mo lenei masina atoa? mo aso o totoe o lenei tausaga? Pe umi atu foi? Sa ma valaauliaina ma Julie a matou faifeautalai totoa uma o Texas Dallas matou te manatunatu loloto faatasi mo le 20 tausaga. O le a matou taunuu faatasi i le tini i nai tausaga pupuu e 17. Ona matou faatu ai lea o se sini fou e faagaeetia o matou mafaufauga ma aumaia atili ai i matou ia Keriso.
E mafai ona e siakia i matou i le fesili mai, “O le a lau fuaiupu?” Ae afai e te faia, ia e saunia e faasoa mai foi lau mau. O le a taufai faagaeetia faatasi i tatou o se taunuuga o la tatou fefaatauaiga.
Mata o mafai ona e vaai i le suiga o lou olaga ma le olaga o lou aiga pe afai e te tusia se fuaiupu fou o se mau i lou loto ma le mafaufau i vaiaso uma mo nai masina o totoe po o nai tausaga? pe umi atu foi?
O Iesu Keriso o Lo Tatou Faataitaiga
Atonu na atinae e Iesu Keriso se fiafia mo tusitusiga paia i lona laitiiti. Atonu na Ia faitauina ma manatunatu loloto i tusitusiga paia o se tama itiiti ina ia faia ai ni talanoaga anoa ma fomai popoto i le malumalu i le 12 o Ona tausaga.13 Sa Ia amataina lana misiona i le 30,14 o Ona tausaga, ma sa Ia vave faasino atu i tusi paia ma i le tele o taimi o Lana galuega.15 Pe ua le saogalemu ea lo tatou fai atu na faaalu e Iesu e le itiiti ifo ma le 20 tausaga e suesue ai ma manatunatu loloto i tusitusiga paia o se vaega o le tapenaga mo Lana misiona? Pe o i ai se mea e manaomia ona e faia i le aso, e saunia ai oe lava faaleagaga mo avanoa i le lumanai e aoao atu ai ma faamanuiaina lou aiga ma isi?
Faatino Lou Faatuatua ma Faia
I se iloiloga, ou te faamoemoe o le a e filifili e teu se tupe i vaiaso taitasi. Faatino lou faatuatua, ia pulea oe lava, ma faia. Ou te tatalo foi ma le lotofaamaoni o le a e filifili e manatunatu loloto i afioga a le Atua i se faiga ua faateleina ma loloto atu i vaiaso taitasi. Faatino lou faatuatua, ia pulea oe lava, ma faia.
E le pei o la’u valaaulia muamua e teu-tupe, o faamanuiaga uma o la’u valaaulia lona lua e laveai-agaga o lau lea e teuina e faavavau—e le o i ai ni mogamoga ma le ‘ele o lenei lalolagi.16
Ua ofoina mai e Elder D. Todd Christofferson le fautuaga manino lea ma le folafolaga: “Suesue i tusitusiga paia ma le faaeteete, ma le loto i ai. Manatunatu loloto ma tatalo ai. O tusitusiga paia o ni faaaliga, ma o le a aumaia ai faaaliga faaopoopo.”17
Faaiuga
Ou te folafola atu o le a e le salamo i lou tusia o se fuaiupu o se mau i lou mafaufau ma lou loto i vaiaso taitasi. O le a e maua se faalogoga o le faamoemoega faaleagaga faifai pea, puipuiga, ma le mana.
Manatua afioga a Keriso ina ua Ia fetalai, “Fai mea ua outou vaai ua Ou faia.”18 Ina ia tatou faaaogaina atoatoa Ana afioga i o tatou olaga, ou te tatalo atu ai i le suafa o Iesu Keriso, amene.