Tuuina Atu o le Toomaga i Tagata Sulufai

O loo faaauau pea ona tuuina atu e Auaunaga Limafoai a le AAG, o le aao alofa o le Ekalesia, le toomaga i eria ia ua tuua ai e faalavelave eseese le toatele o tagata i tulaga o le atuatuvale. O ni faataitaiga nei se tolu:

• O taua i Iukureini ua faaaunuua ai le faitau miliona o tagata talu mai le 2014. O le onosefulu pasene o tagata ua faaaunuua o tagata matutua. Ua aapa atu ia Auaunaga Limafoai a le AAG i le Polokalama Atinae a Malo Aufaatasi ina ia auai i se taumafaiga tuufaatasi ma faalapotopotoga tumaoti i le lotoifale o loo tausia tagata matitiva ma tagata matutua ua faaaunuua. Na tuuina atu e Auaunaga Limafoai a le AAG sapalai o pusa ma vailaau o le tumama, ma le 3 masina o le aofai o meaai i nofoaga e 37 ia o le a auauna atu i tagata e 13,000.

• Talu mai Ianuari, ua sili atu ma le 350,000 tagata sulufai ua sosola ese mai taua i totonu o Suria ae saili ni nofoaga saogalemu i Europa, o se aofaiga ua fuafuaina e oo atu i le faaiuga o le tausaga ua faaluaina. Ua faipaaga nei ia le Auaunaga Limafoai a le AAG ma faalapotopotoga tumaoti mai fafo, nuu po o aai i le lotoifale, ma faalapotopotoga a le malo e taulimaina manaoga o tagata sulufai ma o loo saunia punaoa mo faalapotopotoga a Ekalesia i le lotoifale e faaaoga ia latou taumafaiga e tali atu ai.

• Ina ia fesoasoani e saunia ni malutaga sili ona lelei i tolauapiga mo tagata sulufai i le lalolagi atoa, ua auai atu le Auaunaga Limafoai a le AAG i le Komisi Maualuga a Malo Aufaatasi mo galuega faatino mo tagata sulufai. Ua mamanuina e se faleoloa faumeaafale faavaomalo se fausaga e i ai ni itu lelei i le faatusatusa lea i faleie. E aofia i le fausaga ni faitotoa ma faamalama mo le faateleina o le saogalemu ma se taualuga e sili ona mautu e puipuia ai tagata mai elemene o aofia ai. Ua faagasolo nei le fausiaina o fale iunite e 333 lea ua tuuina atu e le Auaunaga Limafoai a le AAG i le tolauapiga mo tagata sulufai i Iraki Kurdistan.