Epikopo Dean M. Davies

Fesoasoani Muamua i le Au Epikopo Pulefaamalumalu

“A o talavou,” o le tala lea a Epikopo Dean M. Davies, “o le mauaina o se fanua sili ona manaia i lo matou pitonuu sa aumaia le olioli ia te au, ma sa ou aoaoina ai se lesona taua: e mafai e se taumafaiga laitiiti faaopoopo ona faia se eseesega moni i le toeitiiti lava o mea uma tatou te faia.” O le tuuina atu o se mea faaopoopo itiiti ua avea ma se tulaga faatonuina o le a faaauau pea ona auauna lelei ai i le avea ai ma se Fesoasoani Muamua fou i le Au Epikopo Pulefaamalumalu.

Sa auauna atu Epikopo Caussé, o se Fesoasoani Lua ia Epikopo Gary E. Stevenson, o le sa lagolagoina o se uso o le Korama a Aposetolo e Toasefululua i le aso 3 o Oketopa, 2015.

Na soifua mai Dean Myron Davies i le Aai o Sate Leki, Iuta, ISA, i le 1951. Sa ia ola ae o se tasi o le fanau e toavalu. Na te faaalia le agaga faafetai mo matua e le gata ina alofa ma faafaileleina a latou fanau ae fesoasoani foi ia te i latou e talisapaia ia faamanuiaga o le galue. Na ia faaipoipo ia Darla James i le 1973, i le Malumalu o Sate Leki. E toa 5 o laua alo ma fanau a fanau e 14.

Sa aoaoina foi e Epikopo Davies se lesona taua a o nofo ai i San Francisco, Kalefonia, ISA, i le 1989. I le taimi o le mafuie, na ia molimauina ai le faaleagaina o fale mautotogi na fausia e aunoa ma se faavae mautinoa. O le mafaufau la i mea na tutupu i lena vaitaimi ua toe faamautu ai i lou mafaufau ma lou loto faapea, o le mafai ona tatalia ma le manuia o afa, mafuie, ma mala o le olaga, e tatau ona tatou fausia lea i luga o se faavae mautinoa … o le faavae o Iesu Keriso” (“O Se Faavae Mautinoa,” Liahona, Me 2013, 9).

Na faigaluega Epikopo Davies i le Ekalesia talu mai Iulai 1995. Talu ai nei lava sa avea ai o ia ma pule faatonu i le Matagaluega o Galuega Faatino Faapitoa, ma ni tiutetauave mo faamoemoega faapitoa o fanua, mamanu o malumalu, ma le fausiaina o malumalu.

A o lei galue i le Ekalesia, sa faigaluega Epikopo Davies mo le High Industries, Inc., o Lancaster, Penisilevania, ma Bechtel Investments, Inc., o San Francisco, Kalefonia. Sa ia maua se faailoga o le tagata malaga i mataupu tau faatoaga i le Iunivesite o Polika Iaga ma faamaeaina ia polokalama faalepulega maualuga atu i Iunivesite o Stanford ma Northwestern.

Sa auauna atu Epikopo Davies o se peresitene o le Misiona a Puerto Rico San Juan, fesoasoani i le peresitene o le misiona, peresitene o se siteki, fesoasoani i le peresitene o se siteki, failautusi faapitoa a le siteki, fautua maualuga, i le tele o le au epikopo, ma o se faifeautalai faamisiona i le Misiona a Iurukuei/Parakuei.