Elder Ronald A. Rasband

Korama a Aposetolo e Toasefululua

Ina ua uma ona maua e Elder Ronald A. Rasband lona valaauga i le Korama a Aposetolo e Toasefululua, sa ia faitauina le Ioane 15:16: “Ua le filifilia a’u e outou, a ua filifilia outou e a’u, ma faauuina outou.”

Na saunoa mai Elder Rasband, “na ou maua se uunaiga faaleagaga e leai se mea e uiga i lenei [valaauga] sa avea ma … ou manaoga. O le faaiuga a le Alii.”

I le 19 tausaga, ua uma ona aoaoina e Elder Rasband se lesona faapena e uiga i le gauai atu i faaiuga a le Alii. Sa ia faamoemoe e auauna atu i se misiona i Siamani, e pei ona o lona tama ma lona uso matua, ae nai lo lena, na valaauina o ia i le Misiona a Setete i Sasae (ISA). Sa ia liliu atu i ana tusitusiga paia ma faitau i le vaega e 100 o le Mataupu Faavae ma Feagaiga:

“O lea, mulimuli mai ia te aʼu, ma faalogo mai i le fautuaga o le a Ou tuu atu ia te oulua.

“… O le a tatalaina se faitotoa aoga i itulagi faataamilo i laueleele lenei i sasae. …

“O lea, e moni Ou te fai atu ia te oulua, ia sii ae o oulua leo i lenei nuu” (fuaiupu 2, 3, 5).

Sa i ai sana molimau o loo finagalo le Alii ia te ia e auauna atu i le Misiona a Setete i Sasae.

Sa soifua mai Elder Rasband, i le aso 6 o Fepuari, 1951, e sau mai tulaga faatauvaa. “Sa ou fanau mai i se aveloli o [falaoa] ma se tina pele [e nofo i le fale],” o lana tala lea. E tupuga mai o ia mai se aiga o augatupulaga e toatele o le Au Paia o Aso e Gata Ai, o se talatuu na te faapelepele i ai.

I le 1973 sa faaipoipo atu ai Elder Rasband ia Melanie Twitchell. E toa 5 o laua alo ma fanau a fanau e 24. E faafetaia e Elder Rasband lona toalua o le 42 tausaga mo le fesoasoani ia te ia e avea ma tagata ua avea ai o ia i le asō. “Ma sa aveina au e lo’u toalua e pei o le omea ma mamanuina au i se mea ua sili ona taua. … O lana uunaiga faaleagaga ua oo mai ai e le gata i lenei valaauga matagofie ma faapitoa ae faapena foi i mea uma ua ou faia faaleagaga.”

I le 1987 sa avea Elder Rasband ma peresitene ma ofisa sinia e faaagaoioia se faalapotopotoga o vailaau kemikolo i le lalolagi atoa. Sa ia aoaoina mai ona taitai le auala e sili atu ai ona lelei i le auaunaga o le Ekalesia. “Sa ou aoaoina i la’u galuega … e sili atu le taua o tagata nai lo soo se mea e mafai ona tatou faia.” Sa ia “aoaoina foi le tele, ma tele o ni tomai faaletaitai … lea na aoga tele ia te au i le avea ai ma se Pulega Aoao.”

Na tele ni avanoa sa maua e Elder Rasband e faaaoga ai na tomai. Sa ia auauna atu o se epikopo; peresitene o se misiona; Pulega Aoao o Fitugafulu talu mai Aperila 2000; supavaisa o Eria i Amerika i Matu Sisifo, Matusisifo, ma Vaega e tolu o Iuta; fesoasoani i le Au Peresitene o le Eria o Europe Tutotonu; Pule Faatonusili o le Matagaluega o le Malumalu; uso o le Au Peresitene o Fitugafulu talu mai le 2005; ma se Peresitene Sinia o Fitugafulu talu mai Aperila 2009.

Ua tuuina atu e ona tofiga Faale-ekalesia ia te ia se alofa mo le Au Paia o Aso e Gata Ai i soo se nofoaga. Na te ta’u atu i tagata o le ekalesia, “O lo outou faatuatua ua faateleina ai lo matou faatuatua; o a outou molimau ua faaopoopoina i a matou molimau” (itulau 90).

Ua faalotomaualaloina Elder Rasband e auauna atu o se Aposetolo a le Alii o Iesu Keriso. “Sa i ai lava lou manaoga e auauna atu ia te Ia,” o lana tala lea. “O le a ou tuuto atu lo’u taimi, o au taleni, ma mea uma ua ia te au i le taimi nei mo le vaega o totoe o lo’u olaga. Ua ou tautino e faia. Ua faamamaluina au e faia.”