O Le Avea o le Konafesi ma Vaega o o Tatou Olaga

Mafaufau e faaaoga nisi o nei gaoioiga ma fesili e fai ma vaega amata mo talanoaga faaleaiga po o mafaufauga loloto faaletagata lava ia.

Mo Tamaiti

Itulau 86: Sa talosaga mai Peresitene Thomas S. Monson ia i tatou ia avea ma faataitaiga lelei e ala i le mulimuli ia Iesu Keriso. Pe a tatou mulimuli ia te Ia, e mafai ona avea i tatou ma malamalama i le lalolagi. E mafai faapefea ona avea oe ma faataitaiga i lou aiga ma uo? E mafai ona e amata i le faia o se sini e fai se mea se tasi ia avea atili e faapei o Iesu.
Itulau 104: Sa faamatala e Peresitene Henry B. Eyring, Fesoasoani Muamua i le Au Peresitene Sili se tala e uiga i lona tama ao sailia le ekalesia i se tasi o Aso Sa ao asiasi atu i Ausetalia. A o ia saili, sa ia tatalo i fetaulaiga ala taitasi ina ia iloa le itu e tatau ona ia savali i ai. E lei umi ae sa ia faalogo i pesepesega ma iloa ai o le Agaga Paia sa fesoasoani ia te ia e sue lona auala. Mafaufau i se taimi na e lagona ai le Agaga Paia. O a ni ou lagona e uiga i ai?
Itulau 6: Na faasoa mai e Sister Rosemary M. Wixom, le peresitene aoao o le Peraimeri, se tala e uiga i se teineitiiti e igoa ia Amy. Sa tatalo Amy ina ia iloa pe alofa moni le Atua ia te ia ma o loo i ai o ia iina. Faitau pe toe faamatala le tala lenei o se aiga ma talanoa e uiga i se taimi na e lagonaina ai le alofa o le Atua. O a ni ou lagona i le iloaina o oe o se atalii/afafine o le Atua? E mafai faapefea ona e fesoasoani i isi ia iloa o i latou o fanau a le Atua?
Itulau 121: Sa faamatala e Elder Allen D. Haynie o le Fitugafulu e uiga i se taimi sa latou eliina ai ma ona uso matutua se lua tele lea sa latou faia o se vai taele. Na matua palapala ia tama i le taaalo ai. O le tinamatua o Elder Haynie sa le faatagaina o ia i totonu o le fale seia oo ina sa fufulu ese ma faamamaina [le palapala]. O a mea e mafai e lana tala ona aoao mai e uiga i le Togiola a Iesu Keriso? Aisea e taua ai ona mama i luma o le Atua?

Mo Le Autalavou

Itulau 83: Na saunoa mai Peresitene Thomas S. Monson o poloaiga a le Atua e le o ni faafitauli ae nai lo lena o ni taiala mo le fiafia. “O Le na foafoaina i tatou ma alofa ia i tatou ma le atoatoa,” na ia fai mai, “e silafia le auala tatou te manaomia ona ola ai i olaga ina ia maua le fiafiaga silisili e mafai ona maua.” Tuu atu upu a Peresitene Monson i le suega, ma tausi i poloaiga a le Alii. Aua le ofo pe afai e te maua le fesoasoani faalelagi ma le puipuiga.
Itulau 6: Pe a tatou vaai atu i isi mo lo tatou taua faaletagata lava ia, tatou te masani ona le fiafia. Na saunoa mai Sister Rosemary M. Wixom, le peresitene aoao o le Peraimeri, “Tatou te maua lo tatou lagona faatauaina mai ia te Ia [le Alii], ae le mai i tagata o loo siomia i tatou, pe mai ia i latou i luga o le Facebook, po o le Instagram.” Tusi i lau api o talaaga i lenei vaiaso e uiga i lau natura paia ma faamanuiaga e oo mai mai lena malamalama.
Itulau 20: Na saunoa mai Peresitene Diete F. Uchtdorf, Fesoasoani Lua i le Au Peresitene Sili, “Afai e te mafaufau lava o le talalelei e le o le galulue lelei mo oe, ou te valaaulia oe e laa ai i tua, vaai i lou olaga mai se tulaga maualuga atu, ma faafaigofie lou auala i le avea ai ma soo. Taulai atu i le aoaoga faavae autu, mataupu faavae, ma le faaaogaaga o le talalelei.” Afai ua e lagona le popole ma le lofituina, mafaufau ni auala e mafai ai ona e faafaigofie lau tapuaiga i le olaga ma le talalelei.
Itulau 65: Na faamatala e Elder Neil L. Andersen o le Korama a Aposetolo e Toasefululua se tala e uiga i se alii talavou o le sa faamoemoe e auauna atu i se misiona, ae sa aoaoina nai lo lena e tatau ona ia tausia lona aiga. E ala i le faatuatua mamana ma faamanuiaga mai le Alii, sa mafai ai e le alii talavou ona auauna atu i se misiona. Pe mafai faapefea ona tatou avea e faapei o ia ma agai i luma ma le faatuatua e ui lava i faalavefau i o tatou ala?
Itulau 33: Na faamatalaina e Elder Larry R. Lawrence o le Fitugafulu se tala i se faifeautalai ua maea le misiona o le na tauivi ma ana matafaioi e tele seia oo ina ia filifili e tuuto atu le aso Sa mo le galuega a le Atua ma i le suesueina o le talalelei. “O lenei fetuunaiga itiiti na aumaia ai le filemu ma le faapaleniina na ia sailia,” o le tala lea a Elder Lawrence. O a mea e mafai ona e faia ia sili atu ai ona tuuto atu le aso Sa i le Alii?

Mo Tagata Matutua

Itulau 86: Sa faamanatu mai e Peresitene Thomas S. Monson ia i tatou ina ia avea ma faataitaiga ma se malamalama i le lalolagi. “A tatou mulimuli i le faataitaiga a le Faaola ma ola e pei ona sa Ia soifua ai ma e pei ona sa Ia aoao mai,” na saunoa mai Peresitene Monson, “o le a mumu mai lena malamalama i totonu o i tatou ma o le a faamalamalama ai le ala mo isi.” O a ni mea e mafai ona e faia e avea ai ma se malamalama sili atu o le “a susulu atu i se lalolagi ua faateteleina le pogisa”?
O Peresitene Russell M. Nelson, o le Peresitene o le Korama a Aposetolo e Toasefululua, ma Elder Jeffrey R. Holland o le Korama a Aposetolo e Toasefululua sa laugaina le taua o tamaitai ma le tulaga faatina. Na aoao mai Elder Holland, “E leai se alofa i le olaga faaletino e latalata atu pe faatusalia i le alofa le pona o Iesu Keriso nai lo le alofa le manatu faapito e i ai i se tina mo sana tama” (itulau 47). Na aoao mai e peresitene Nelson na liua o tamaitai o e tausia a latou feagaiga “o le a tu matilatila atili i se lalolagi ua fai ifo” (itulau 95). Mafaufau ma le agaga tatalo i nei saunoaga ma talanoaina pe faapefea ona mafai e tagata o le aiga ona lagolagoina tamaitai i o latou matafaioi faale-Atua taua.
Na laugaina e nai failauga le malosi e ala i faigata. Na aoao mai Elder Hugo Montoya o le Fitugafulu o tofotofoga ma faaosoosoga e oo mai i tagata uma, “ae e aumaia foi ia i tatou le malosi tatou te tuputupu ae ai pe a tatou faatoilaloina ma le manuia” (itulau 53). Faitau lana saunoaga ma lauga a Elders James B. Martino o le Fitugafulu (itulau 58); Elder Koichi Aoyagi, o se uso o le Fitugafulu ua faamaloloina ma le mamalu (itulau 126); ma Neill F. Marriott, Fesoasoani Lua i le Au Peresitene Aoao a Tamaitai Talavou (itulau 30). Mafaufau i auala e mafai ona e faamalosia ai lou faatuatua ia Iesu Keriso ma le auala e mafai ai ona Ia fesoasoani ia te oe e ala i faigata.
Itulau 33: I lana lauga, sa aoao mai Elder Larry R. Lawrence o le Fitugafulu, “E faaauau pea ona luiina tatou e le Agaga ia sili atu ma ia faaauau pea i luma. … Afai tatou te lotomaualalo ma aoaogofie, o le a musuia i tatou e le Agaga Paia ia faaleleia ma taitai i tatou i le aiga.” A maea ona e faitau i lana saunoaga, saili le taitaiga a le Agaga mo auala e mafai ona e faaleleia ma suia ai.
Itulau 104: Na aoao mai Peresitene Henry B. Eyring, Fesoasoani Muamua i le Au Peresitene Sili, e faapea “o le i ai pea o le Agaga e faatasi ma i tatou, o le i ai lea o le taiala ma le taitaiga a le Agaga Paia i o tatou olaga i aso taitasi.” Mafaufau i mea e mafai ona e faia pe taofia ina ia i ai pea le Agaga ia te oe.