Piimau i Lou Ala
Saunia e Elder Koichi Aoyagi
Fitugafulu ua Faamalolo ma le Mamalu
Ia faamuamua le Atua, tusa lava po o a faigata lua te feagai. Ia e alofa i le Atua. Ia faatuatua ia Keriso, ma ia e faalagolago atu oe lava ia te Ia i mea uma.
I le aso 11 o Mati, 2011, sa ou tu ai i le mea e faaee ma tuu ai pasese o nofoaafi i Tokyo Shinagawa, ou te asiasi i le Misiona a Kobe Iapani. Pe tusa o le 2:46 i le afiafi, ae lia’i se mafuie e 9.0 le malosi. Sa le mafai ona ou tu ona o le ogaoga o le lulu, ma sa ou pipiimau ai i se si’o o le faasitepu. Na amata ona toulu ifo i lalo ia moli i taualuga na lalata ane. Sa galulu Tokyo atoa.
O le mea na lelei ai, ou te lei manu’a, ma i le fa itula mulimuli ane, sa ou mapu ina ua ou maua se tali o loo saogalemu lo’u aiga atoa.
I le televise, sa le uma le faaali mai o ata matautia ma le taufaafefe. Sa ufitia le eria o le misiona a Sendai e le galulolo—ma tafiesea ai mea uma i lona ala; o taavale, fale, falegaosimea, ma laufanua. Sa ou matua maofa i foliga matautia, ma sa ou tagi. Ma sa ou tatalo atu ma le faatauanau mo le puipuiga ma le fesoasoani a lo tatou Tama Faalelagi ia i luga o tagata o loo ola i lea itulagi ia sa ou matua alofa faapelepele i ai.
Mulimuli ane, sa faamaonia mai sa saogalemu uma faifeautalai ma tagata o le Ekalesia. Peitai, e toatele tagata o le Ekalesia sa aafia ai, sa maliliu tagata o o latou aiga, o fale, ma a latou meatotino. E lata i le 20,000 tagata na fano, sa faatamaia nuu, ma e toatele tagata sa tuua faamalosi o latou aiga ona o le tulaga matautia na i ai le falegaosi malosiaga faaniukilia.
O faalavelave matautia faapenei ua o se faatafunaga ua faatitino i le tele o vaega o le lalolagi i le taimi nei, ma ua mafua ai ona tele ola e maumau. Ua lapataia i tatou mai nei faalavelave matautia, o taua, ma le mau faigata e le mafaitaulia o le a tulai mai i le lalolagi.
A oo ina tulai mai faafuasei tofotofoga faapenei ia i tatou, atonu tatou te fesili ifo, “Aisea ua tutupu ai nei mea ia te au?” po o le “Aisea ua tatau ai ona ou mafatia?”
Mo se taimi umi talu ona ou liua i le talalelei, sa ou le mauaina se tali manino i le fesili “Aisea ua tuuina mai ai tofotofoga ia te au?” Sa ou malamalama i le vaega o le faaolataga faapea o le a tofotofoina i tatou. Peitai, i le tulaga moni lava, ina ua oo mai i le fesili lea, sa ou lei maua se talitonuga maumaututu sa lava lona mamana e tali lelei ai. Ae na oo mai se taimi i lo’u olaga sa ou oo ai foi i se tofotofoga tele naua.
Ina ua 30 o’u tausaga, sa ou asia le misiona a Nagoya o se vaega o la’u galuega. Ina ua uma le fonotaga, sa faatulaga ma le agalelei e le peresitene o le misiona ia faifeautalai e momoli au i le malaevaalele. Peitai, ina ua matou taunuu atu i le magaala i lalo atu o se a’ega umi, sa sau saoasaoa se loli tele i o matou tua. Sa sunui sa’o le tua o le matou taavale ma taavalevale atu ai i luma i le silia ma le 20 mita. O le vaega taufaafefe o lenei mea, sa lei i ai se avetaavale o le loli. Sa ‘afa le omia o le tua o le matou taavale agai i totonu. O le mea e sili ai, sa matou ola uma ma faifeautalai.
Peitai, i le aso na sosoo ai, sa amata ona ou faalogoina tiga i lo’u ua ma tauau ma sa amata ona aliae mai se tiga matautia o le ulu. Mai lena aso sa le mafai ona ou moe, ma sa faamalosi ona ou ola i aso taitasi ma ni tiga i le tino ma le mafaufau. Sa ou tatalo i le Atua e faamolemole faamalolo o’u tiga, ae sa i ai pea nei auga pe tusa ma le 10 tausaga.
O le taimi lenei, na amata foi ona tolotolo mai lagona o le le mautonu i lo’u mafaufau, ma sa ou tau manatunatu ai, “Aisea ua tatau ai ona ou mafatia i nei tiga e tele?” Peitai, e ui e lei to maia le ituaiga faamalologa lea sa ou sailia, ae sa ou taumafai lava e faamaoni i le tausiga o poloaiga a le Atua. Sa faaauau pea ona ou tatalo ia mafai ona ou foiaina a’u fesili sa i ai e uiga i o’u tofotofoga.
Na i ai se taimi na ou tauivi ai au lava ia ma se faafitauli faaopoopo patino, ma sa ou gaulemalie ona sa ou le iloa pe faapefea ona ou taulimaina lenei tofotofoga fou. Sa ou tatalo mo se tali. Ae ou te lei mauaina lava se tali i le taimi lea. O lea sa ou alu ai ma talanoa i se taitai faatuatuaina o le Ekalesia.
A o ma talanoa, faatasi ai ma le alofa i lona leo, sa ia fai mai, “Uso Aoyagi, pe le o lou faamoemoega ea o lou i ai i lenei lalolagi o lou oo lea i lenei tofotofoga? Pe le o le taliaina ea o tofotofoga uma o lenei olaga i o latou tulaga ua oo mai ona tuu atu lea o mea o totoe i le Alii? Pe e te le manatu ea o le a foia lenei faafitauli pe a tatou toetutu?”
Ina ua ou faalogo atu i nei upu, sa matua malosi lou lagonaina o le Agaga o le Alii. Sa le mafaitaulia taimi na ou faalogo ai i lenei aoaoga faavae, ae e lei matala mata o lo’u malamalama i le mamao lea ua i ai i le taimi nei. Sa ou malamalama o le tali lea sa ou sailia mai le Alii i a’u tatalo. Sa mafai ona ou malamalama manino i le ata o le faaolataga a lo tatou Tama Faalelagi, ma ua toe malamalama lelei i lenei mataupu faavae taua.
I le Aperaamo, o loo fetalai mai ai le Alii le Atua, “Ma o le a tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua.”1
O le mataupu faavae o le, o lena Atua o le na foafoaina le lagi ma le lalolagi ua silafia le mamanu tele o lenei lalolagi, ua ia te Ia le pule i mea uma i le lagi ma le lalolagi, ma ia mafai ona faataunuuina le ata o le faaolataga, o lea ua Ia tuuina mai ai ia i tatou le tele o aafiaga eseese—e aofia ai nisi o tofotofoga—a o tatou i ai i lenei lalolagi.
Ma na fetalai atu le Alii i le mea lea ia Iosefa Samita:
“Ia e iloa lo’u atalii e, o nei mea uma e te maua ai le poto masani, ma o le a avea mo ou lelei. …
“O lea, piimau i lou ala … , aua o le a faatasi le Atua ma oe e faavavau ma faavavau lava.”2
O tofotofoga o lenei lalolagi—e aofia ai ma’i ma le oti—o se vaega o le ata o le faaolataga ma o ia aafiaga e le mataofia. E tatau ai mo i tatou le “piimau i lou ala” ma talia o tatou tofotofoga ma le faatuatua.
Peitai, o le faamoemoega o o tatou olaga e le na ona onosaia o tofotofoga. Na auina mai e le Tama Faalelagi Lona Alo Pele, o Iesu Keriso, e fai ma o tatou Faaola ma Togiola, ina ia mafai ai ona tatou manumalo i tofotofoga tatou te feagai i lenei lalolagi; i se isi faaupuga, Na te faia a tatou mea vaivai e avea ma mea malolosi,3 Ua Ia togiola a tatou agasala ma o tatou le atoatoa, ma ua Ia faia ia mafai ona tatou maua le tino ola pea ma le ola e faavavau.
Na ta’ua e Peresitene Henry B. Eyring: “Ae o le suega ua tuu mai e se Atua alofa i o tatou luma e le o le vaai pe mafai ona tatou onosaia faigata. O le vaai pe mafai ona tatou onosaia lelei. Tatou te pasi i le suega i le faaali atu tatou te manatua o Ia ma poloaiga na Ia tuuina mai ia i tatou.”4
“Piimau i lou ala” o se filifiliga autu lea i taimi o tofotofoga. Liliu atu lou loto i le Atua, aemaise pe a tatou feagai ma tofotofoga. Usitai ma le lotomaualalo i poloaiga a le Atua. Faaalia le faatuatua i le faaogatasi o ou manaoga ma le finagalo o le Atua.
Tatou mafaufau nei i lena taavale na lavea i Nagoya. Semanu ou te oti i lena faalavelave. Ae ui o lea, e ala i le alofa tunoa o le Alii, sa ou ola ai i se vavega. Ma ua ou iloa o o’u mafatiaga sa mo lo’u aoaoina ma mo lo’u tuputupu ae.5 Sa aoaoina au e le Tama Faalelagi ia lava lo’u onosai, ia atinae le malamalama, ma ia faamafanafana i e o mafatia. Ina ua ou iloaina lenei mea, sa faatumuina lo’u loto i lagona o le faafetai i lo’u Tama Faalelagi mo lenei tofotofoga.
Faamuamua le Atua, tusa lava po o a tofotofoga e te feagai ai. Alofa i le Atua. Ia faatuatua ia Keriso, ma tuu atu lou lava faatuatuaga ia te Ia i mea uma. Na tuuina mai e Moronae le folafolaga lenei i tagata faapena: “Ma afai tou te faafiti outou lava mai mea uma e le faaleatua, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso.”6
Ou te molimau atu ma le faamaoni o le Atua le Tama ma Lona Alo Pele, o Iesu Keriso, o loo soifua ma o folafolaga a le Atua ia i latou o e “piimau i lou ala” ma alolofa ia te Ia o le a faataunuuina e oo lava i le lotolotoi o tofotofoga, i le suafa paia o Iesu Keriso, amene.