O Le Olioli o le Ola Ai i se Olaga e Faatotonugalemu ia Keriso
Saunia e Elder Richard J. Maynes
O Le Au Peresitene o Fitugafulu
E tatau ona faatotonugalemu o tatou olaga ma le atoatoa ia Keriso pe afai tatou te fia maua le olioli moni ma le filemu i lenei olaga.
O le lalolagi o tatou ola ai nei ua tuuina se uunaiga tele i luga o o tatou tagata i soo se mea e tuu ai i lalo pe faagalogalo ai o latou tulaga faatonuina o le ola amiotonu. Peitai, po o a lava mea leaga ma faaosoosoga o loo siomia ai i tatou i aso taitasi, e mafai lava ma o le a maua le fiafia moni i le taimi nei e ala i le ola i se olaga e taulai ia Keriso.
O le taulai atu o o tatou olaga ia Iesu Keriso ma Lana talalelei, o le a aumaia ai le mausali ma le fiafia i o tatou olaga e pei ona faapupula mai e faataitaiga nei.
O Elder Taiichi Aoba o le Fitugafulu, e nofo i se nuu laitiiti i le mauga i Shikoku, i Iapani, sa talosagaina e faiaoga i se vasega a le autalavou i se konafesi a le autalavou. “Ia Outou Tutu i Nofoaga Paia” o le autu filifilia lea o le konafesi. Ina ua uma ona mafaufau i le autu ma le mea e aoao atu, sa tonu ia Elder Aoba e faaaoga le mea sa ia faia i lana galuega e fai ma ana metotia faafaiaoga. O lana galuega o le gaosia o oa mai le omea.
Na faamatala e Elder Aoba le matua sagisagi fiafia o le autalavou, ina ua latou vaai i le ala na mafai ai ona ia faaliliu toetoe o se faamaneta le foliga o le ‘ele sa i ona lima i ipu mafolafola, ipu faaofuofu, ma iputi. Ina ua uma le faataitaiga, sa ia fesili atu pe i ai se tasi o i latou e manao e faataitai. Sa taufai sii ae uma o latou lima.
Sa aumaia e Elder Aoba ni talavou i luma e taumafai le mea fou ua latou fiafia i ai. Sa latou manatu, ina ua uma ona matamata i ai, o le a faigofie lava. Peitai, e leai se tasi o i latou na manuia ana taumafaiga e fai e oo lava i se ipu faaofuofu faigofie. Sa latou fai mai: “Ou te le mafaia!” “Aisea ua matua faigata ai?” “E matua faigata tele lenei mea.” Sa faia nei faaupuga a o felelei solo fasi ‘ele i le potu.
Sa ia fesili atu i le autalavou pe aisea na matua faigata ai ona latou gaosia le omea. Sa eseese a latou tali: “E leai so’u poto masani,” “Ou te lei aoao ai,” po o le “E le o sa’u taleni.” E faavae la i le taunuuga e moni uma lava mea sa latou fai mai ai; peitai, o le mafuaaga aupito taua mo lo latou le mafaia ona e lei tuutonua le ‘ele i le totonugalemu o le uili. Na manatu le autalavou ua latou tuuina le ‘ele i le ogatotonu, ae mai le vaaiga a se polofesa, sa lei sagatonu lelei. Ona ia ta’u atu lea ia i latou, “O mai tatou toe faataitaia tasi lava.”
O le taimi lea, na tuu ai e Elder Aoba le ‘ele i le totonugalemu o le uili ona amata loa lea ona vili le uili, ma faia se pu i le ogatotonu o le ‘ele. Sa toe taumafai e nisi o le autalavou. O le taimi la lea, sa amata ona taufai patipati tagata uma ina ua latou fai mai: “Oka, e le o tetetete,” “Ua mafai ona ou faia,” po o le “Ua ou iloa!” Ioe, e le’i atoatoa lelei ia foliga, ae o le taunuuga na matua ese lava nai lo le taumafaiga muamua. O le mafuaaga na manuia ai ona sa matuai sagatonu lelei le ‘ele i le ogatotonu o le uili.
O le lalolagi ua tatou nonofo ai e faapei foi o le uili taavili a le fai ipu omea, ma ua faateleina le saoasaoa o lena uili. E faapei o le ‘ele i le uili a le fai ipu omea, e tatau foi ona faatotonugalemu i tatou lava. O la tatou taulaiga, le totonugalemu o o tatou olaga, e tatau ona i ai Iesu Keriso ma Lana talalelei. O le ola i se olaga e taulai ia Keriso, o lona uiga tatou te aoao ia Iesu Keriso ma Lana talalelei ona tatou mulimuli lea i Lana faataitaiga ma tausi Ana poloaiga i le atoatoa.
Na ta’ua e le perofeta anamua o Isaia, “A o lenei, Ieova e, o oe lava lo matou Tama, o i matou nei o le omea, a o oe le Tufuga; o le galuega a ou aao i matou uma.”1
Afai e faatotonugalemu o tatou olaga ia Iesu Keriso, e mafai ona Ia mamanuina lelei i tatou i ituaiga tagata e tatau ona avea ai e toe foi atu ai i Lona afioaga faatasi ma le Tama Faalelagi i le malo selesitila. O le olioli tatou te oo i ai i lenei olaga o le a fitoitonu i le lelei o le taulai atu o o tatou olaga i aoaoga, faataitaiga, ma le taulaga togiola a Iesu Keriso.
Uso e ma tuafafine, sa ou fanau mai i se aiga o augatupulaga e tele o le Au Paia o Aso e Gata Ai, o lea la o faamanuiaga ma le olioli o le i ai o le talalelei a Iesu Keriso o se faavae o lo matou aganuu faaleaiga, sa lalagaina i o matou olaga i aso faisoo. Ou te lei iloaina vagana ai ina ua ou faamisiona tala’i o se alii talavou, le aafiaga maoae lelei o le atoaga o le talalelei a Iesu Keriso ia i latou e lei maua muamua ona faamanuiaga i o latou olaga. O le fuaiupu lea i le Mataio o loo ta’u mai ai le faagasologa o le aafiaga o tagata e liua i le talalelei a Iesu Keriso “e tusa foi le malo o le lagi i le oa ua atia i le fanua; ua iloa e le tasi, ona nana ai lea e ia; ua alu foi ma le fiafia, ma faatau atu ana mea uma, i le faatau a’i mai lea fanua.”2
Sei ou faasoa atu se faataitaiga mai le Tusi a Mamona o loo faapupula mai ai se mea na naunau se tasi na liliu mai e totogi ina ia maua ai e ia le olioli e o faatasi ma le mauaina o le oa o loo ta’ua e Iesu i le faataoto o le oa na natia i le fanua.
Manatua le tusi a Alema, mataupu 20, na malaga atu Amona ma Lamonae i le nuu o Mitonae mo le faamoemoe e laveai ia uso o Amona mai le falepuipui. I le taimi o la la’ua malaga, sa latou fetaiai ai ma le tama o Lamonae, o le tupu lea i le laueleele uma o sa Lamana.
Sa matua le fiafia le tupu ona o le malaga faatasi o lona atalii ma Amona, o se faifeautalai Nifae, lea ua ia manatu o se fili. Sa ia manatu sa tatau i lona atalii ona auai atu i se taumafataga sa ia faia mo ona atalii ma lona nuu. O le ita tele o le tupu o sa Lamana na ia poloaiina ai lona atalii o Lamonae e fasioti Amona i lana pelu. Ina ua musu Lamonae, sa sei e le tupu lana lava pelu e fasiotia ai lona atalii ona o le le usitai; peitai, na faalava Amona e laveai le ola o Lamonae. O le mea moni na sili atu lona malosi i lo le tupu ma sa ono mafai lava ona ia faaumatia o ia.
O le mea lea na fai atu ai le tupu ia Amona ina ua iloa ua i ai o ia i le tulaga e o lua ai le ola-ma-le-oti: “Afai e te faasaoina au, o le a ou tuu atu ia te oe soo se mea e te fai mai ai, e oo lava i le afa o le malo.”3
O lona uiga sa naunau le tupu e totogi le tau o le afa o lona malo ina ia faasaoina ai lona ola. Atonu ai na ofo le tupu ina ua talosaga atu Amona ia tau lava o le tatalaina mai o lona uso o Arona ma ana paaga mai le falepuipui ma ia faatumauina le malo o lona atalii o Lamonae.
Mulimuli ane, ona o lenei fetaiaiga, na tatalaina ai le uso o Amona o Arona mai le falepuipui o Mitonai. Ina ua uma ona tatalaina o ia, sa musuia o ia e malaga i le mea na pule ai le tupu o sa Lamana. Sa faafeiloai atu Arona i le tupu ma sa maua le avanoa e aoao atu ai ia te ia mataupu faavae o le talalelei a Iesu Keriso, e aofia ai ma le fuafuaga sili o le faaolataga. O aoaoga a Arona na matua musuia loloto ai le tupu.
O le tali a le tupu i aoaoga a Arona o loo maua i le fuaiupu 15 o le Alema, mataupu 22: “Ma sa oo ina ua uma ona faamatala atu e Arona nei mea ia te ia, sa fai mai le tupu: O le a se mea ou te faia ina ia mafai ona ou maua o lenei ola faavavau ua e tautala i ai? Ioe, o le a se mea ou te faia ina ia mafai ai ona fanauina o au i la le Atua, ina ia seia ese ai i fafo lenei agaga leaga mai lo’u fatafata, ma ou maua ai lona Agaga, ina ia mafai ona faatumuina o au i le olioli, ina ia le mafai ona lafoaia ese o au i le aso gataaga? Faauta, ua fai mai o ia, o le a ou tuu atu mea uma ua ou maua, ioe, o le a ou lafoai i lou malo, ina ia mafai ona ou maua lenei olioli tele.”
O le mea e ofo ai, i se faatusatusaga i le mea e ese ai, o le ofo atu o le afa o lona malo ina ia faasao lona ola, a o lea ua naunau le tupu o sa Lamana e ofo atu lona malo atoa ina ia mafai ai e ia ona maua le olioli lea e maua mai le malamalama, taliaina, ma le ola ai i le talalelei a Iesu Keriso.
O lo’u toalua o Nancy, e liliu mai foi i le Ekalesia. Sa tele taimi sa ia ta’u mai ai ina ua mavae le tele o tausaga, le olioli ua ia iloa i lona olaga talu ona ia maua, talia, ma ola i le talalelei a Iesu Keriso. O mafaufauga ia o Sister Maynes i lona aafiaga:
“A o avea ma talavou matua i le popofou o lo’u 20 ma ona tupu tausaga, sa ou oo i le tulaga o lo’u olaga ua ou iloa ua tatau ona suia se mea ina ia avea au o se tagata e sili atu le fiafia. Sa ou lagonaina sa ou faaopeopea e aunoa ma se faamoemoega moni ma se taitaiga, ma sa ou le iloa po o fea ou te alu e sue ai. Sa ou iloa i taimi uma sa i ai se Tama Faalelagi, ma o nisi taimi i lo’u olaga atoa ou te tatalo ai, ma le manatu o la sa Ia faafofoga mai.
“Ina ua amata la’u sailiga, sa ou alu i ni lotu eseese ae ou te toe foi lava i lagona lava e tasi ma le lotovaivai. Ou te lagonaina lava lo’u matua faamanuiaina aua sa tali mai lava a’u tatalo mo se taitaiga ma se faamoemoega i le olaga, ma sa aumaia le atoaga o le talalelei a Iesu Keriso i lo’u olaga. Mo le uluai taimi, sa ou lagona ai ua i ai so’u faamoemoega, ma o le fuafuaga o le fiafia na aumaia le olioli moni i lo’u olaga.”
O se isi aafiaga mai leTusi a Mamona o loo faapupula manino mai ai le ala e mafai ai le avea ai o le taulai atu o le olaga ia Keriso ona faatumuina i tatou i le fiafia tele tusa lava pe siomia e faigata matautia.
Ina ua tuua e le perofeta o Liae ma lona aiga ia Ierusalema i le 600 t.l.m., sa latou feofeoai pe tusa ma le 8 tausaga i le vao seia iu lava ina latou taunuu i se laueleele sa latou faaigoaina ia Nuumau, lea sa tulata i le talafatai. Na faamatala e Nifae lo latou olaga o mafatiaga ma faigata i le vao faapea: “Sa matou mafatia i puapuaga e tele ma faigata e tele, … sa matua tele lava e le mafai ona matou tusia uma.”4
A o nonofo ai i Nuumau, sa tuuina atu e le Alii ia Nifae se tiutetauave e fau le vaa e ave ai i latou i luga o le sami i le nuu o le folafolaga. Ina ua taunuu i le nuu folafolaina, sa tulai mai pea feteenaiga e tele i le va o tagata sa taulai atu o latou olaga ia Keriso ma tagata e lei talitonu o e sa mulimuli i faataitaiga a Lamana ma Lemuelu. Mulimuli ane, o le tulaga matautia o ia feteenaiga i le va o vaega nei e lua sa matua tele naua o lea na tavavaeese ai e Nifae ma e sa mulimuli i aoaoga a le Alii i latou lava ma sosola atu i le vao mo lo latou saogalemu. O le taimi lea, pe tusa ua 30 tausaga talu ona tuua e Liae ma lona aiga ia Ierusalema. Na faia e Nifae se faamaumauga lelei ma se faamatalaga e peiseai e ofo ai, aemaise ina ua uma ona tusia i mau le tele o mafatiaga ma puapuaga sa latou feagai ai mo se taimi umi tele. O ana upu nei: “Ma sa oo ina matou [ola] e tusa ai ma le ala o le fiafia.”5 E ui i o latou faigata, ae sa mafai ona latou ola i le ala o le fiafia aua sa latou taulai atu ia Keriso ma Lana talalelei.
Uso e ma tuafafine, e pei o le ‘ele i le uili a le fai omea, e tatau foi ona faatotonugalemu o tatou olaga ma le atoatoa ia Keriso pe afai tatou te fia maua le olioli moni ma le filemu i lenei olaga. O faataitaiga a le tupu o sa Lamana; o lo’u toalua o Nancy; ma le nuu o sa Nifae ua lagolagoina uma ai lenei mataupu faavae moni.
Ou te tuu atu la’u molimau e mafai foi ona tatou maua le filemu, lena fiafia pe afai tatou te filifili e ola i ni olaga e faatotonugalemu ia Keriso, i le suafa o Iesu Keriso, amene.