“Afai Tou te Alofa Mai ia te Au, Ia Outou Tausi i Au Poloaiga”
Saunia e Carole M. Stephens
Fesoasoani Muamua i le Au Peresitene Aoao o le Aualofa
O poloaiga a le Atua o se faailoaga o Lona alofa mo i tatou, ma o le usiusitai i Ana poloaiga o se faailoaga lea o lo tatou alofa mo Ia.
Ina ua aumai e le ma afafine matua o Jen, lana tama teine lona tolu mai le falemai, sa ou alu i lona fale e fesoasoani i ai. Ina ua uma ona tuu lana tama teine matua i le aoga, sa tonu ia i ma’ua o le mea sili o loo manaomia e Jen, o le malolo. O le fesoasoani sili la e mafai ona ou tuuina atu o lo’u alu ma ave lana tama o Chloe i le fale ia mafai ai e lona tina ma lona uso pepe ona maua se taimi toafilemu.
Sa ou faamauina Chloe i lona nofoa i le taavale, fai lo’u fusipau ma o ese atu loa. Peitai, ae ma te lei oo atu i le faaiuga o le auala, sa tatala e Chloe lona fusipau ae tu i luga ma tilotilo mai luga o lo’u tauau ma talanoa mai ia te au! Sa seu i tua le taavale, o’u oso i fafo, ma toe faamau o ia i lona nofoa.
Sa toe amata ona ma o ae lei umi foi ae toe oso ese foi mai lona nofoa. Sa faafia ona ou faia lea lava mea e tasi, ae o le taimi lea ae ou te lei toe oso i le taavale ma faamau lo’u lava fusipau, ua toe tu foi i luga Chloe!
Na ou nofonofo ai i le taavale, ua faatu i autafa o le auala, ma faia se tauiviga o le malosi ma se tolu tausaga. Ma sa manumalo o ia!
Sa ou faaaogaina metotia uma sa mafai ona ou mafaufau i ai e faatalitonu ai o ia o le nofo ma lona fusipau ua faamau o se mea lelei. E lei talitonu o ia. Sa iu ina ou filifili e taumafai le faiga o le afai [e te]/ona [ou] lea.
Sa ou fai atu, “Chloe, afai e te nofo i lou nofoa ma faamau lou fusipau, ona ta taaalo lea i paluga [kelei] pe a ta taunuu i le fale o Tinamatua.”
E leai se tali.
“Chloe, afai e te nofo i lalo ma fusi lou fusipau, ona ta faia lea o se falaoa pe a ta o i le fale o Tinamatua.”
E leai se tali.
Sa ou toe taumafai. “Chloe, afai e te nofo i lalo ma fusi lou fusipau, ona ta o lea i le maketi e faatau sau meaai!”
Ina ua uma taumafaiga e tolu, sa ou iloa ai o se faiga e lei aoga. Sa finau o ia, ma sa le i lava se afai [e te]/ona [ou] e faatalitonu ai o ia ia nofo ai i lalo ma faamau le fusipau.
Sa le mafai ona alu ai le aso o nofonofo i autafa o le alatele, ae sa ou manao ou te usitai i le tulafono ma sa le saogalemu le ave o le taavale ae tutu ia Chloe. Sa fai sa’u tatalo le leoa ma sa ou faalogoina le Agaga o musumusu mai, “Aoao o ia.”
Sa ou faliu e faasaga atu ia te ia ma toso ese lo’u fusipau mai lo’u tino ina ia mafai ona vaai mai i ai. Sa ou fai atu, “Chloe, o lea e fai lo’u fusipau aua e puipuia ai au. Ae na e le o faia lou fusipau, ma o le a e le saogalemu. Ma o le a ou faanoanoa tele pe afai e te manu’a.”
Sa tilotilo mai o ia ia te au; sa toetoe ina a ou vaaia le foeuli ua liliu i lona mafaufau a o ou faatalitali atu ma le naunau i lana tali. Na iu ina susulu mai ona mata lanumoana lapopoa, ma sa fai mai, “Tinamatua, e te manao e fai lo’u fusipau ona e te alofa ia te au!”
Sa faatumulia le taavale e le Agaga a o ou ta’u atu lo’u alofa mo lenei teineitiiti laitiiti faapelepele. Ou te lei manao e mou atu lena lagona, ae sa ou iloaina ua ou maua se avanoa o lea sa ou oso ai i fafo ma faamau lona fusipau. Ona ou fesili atu lea, “Chloe, e mafai ona e nofo i lou nofoa faamolemole?” Sa ia faia—seia tau i le maketi e faatau ai sana mea! Ma sa faamau foi lona fusipau seia ma taunuu i le fale lea na fai ai le ma falaoa ma ma taaalo i le paluga kelei aua sa lei galo lava ia Chloe!
A o alu la’u taavale i luga o le alatele i lena aso, sa tumu lo’u mafaufau i se mau: “Afai tou te alolofa mai ia te au, ia outou tausi a’u poloaiga.”1 E i ai tulafono e aoao atu, taiala, ma puipuia ai fanau. Aisea? Ona o lo tatou alolofa tele ia i latou. Ae seiloga e malamalama Chloe o lo’u manao e nofo i lalo ma faamau lona fusipau na afua ona o lo’u alofa ia te ia, o lea sa le fia gauai ai o ia i le mea sa ia manatu o se faasa. Sa manatu o ia o le fusipau e saisaitia ai lona saolotoga.
E faapei foi o Chloe, e mafai ona tatou filifili e vaai i poloaiga o se faatapulaa. Atonu tatou te manatu i nisi taimi o tulafono a le Atua ua faasa ai lo tatou saolotoga patino, e aveesea ai lo tatou faitalia, ma tapulaa ai lo tatou tuputupu ae. Ae a o tatou saili atu mo se malamalama atili, a o tatou tuu atu i lo tatou Tama e aoao i tatou, o le a amata ona tatou vaaia o Ana tulafono o se faailoaga o Lona alofa mo i tatou ma o le usiusitai i Ana tulafono o se faailoaga lea o lo tatou alofa mo Ia.
Afai e tei ua e iloa ane i lou mafaufau o loo paka lau taavale i autafa o le auala, pe mafai ona ou fautuaina atu ni nai mataupu faavae afai e mulimulitaia, o le a fesoasoani e te toe foi saogalemu ai i luga o le “ala o le faatuatua ma le usiusitai”?2
Muamua, faalagolago i le Atua. Faalagolago i Lana fuafuaga e faavavau mo oe. O i tatou taitoatasi o se atalii po o se afafine agaga faapelepele a ni matua faalelagi.” O lo la alolofa mo i tatou e manino i poloaiga. O poloaiga o ni faatonuga taua e aoao ai, taiala, ma puipuia i tatou a o tatou “mauaina le poto masani i le lalolagi.”3
I le muai olaga sa tatou faaaoga ai lo tatou faitalia e talia ai le fuafuaga a le Atua,4 ma sa tatou aoao ai o le usiusitai i le tulafono e faavavau a le Atua sa taua mo lo tatou manuia i Lana fuafuaga. Ua aoao mai e tusitusiga paia: “E i ai se tulafono, na folafola le maaveesea i le lagi i luma atu o le faavaega o le lalolagi lenei ua faavae ai i luga faamanuiaga uma.”5 Afai tatou te usitai i le tulafono, tatou te maua faamanuiaga.
E ui i mea sese uma, o mea faafeagai, ma aoaoga e tatau ona i ai i lo tatou poto masani faaletino, e le faagaloina lava e le Atua lo tatou gafatia e faavavau, tusa lava pe galo ia i tatou. E mafai ona tatou faalagolago ia te Ia “aua e finagalo le Atua ia toe foi atu Ana fanau.”6 Ma ua uma ona Ia saunia se ala e ala lea i le Togiola a Lona Alo, o Iesu Keriso. O le Togiola “o le ute lea o le ata o le faaolataga.”7
Lua, faalagolago ia Iesu. O le faailoaga silisili o le usiusitai ma le alofa, o le Togiola a Iesu Keriso. Sa gauai atu o Ia lava i le finagalo o le Tama, na Ia foai mai Lona soifua mo i tatou. Sa Ia fetalai, “Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.”8
Na aoao mai foi e Iesu:
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi le lona lua, E te alofa atu i le lua te tuaoi, ia pei o oe lava ia te oe.”9
O Aso Sa taitasi tatou te maua ai le avanoa e mafaufau loloto ma manatua ai le alofa mama o le Faaola a o tatou aai ma feinu i faatusa o Lana Togiola e le iu. I le taimi o le faamanatuga, ou te matamata ai a o faaloaloa mai lima e tufa le falaoa ma le vai. A o aapa atu lo’u lima ma ‘ai ma inu, ou te osifeagaiga ai ua ou naunau e tauave i o’u luga Lona suafa e manatua pea o Ia ma tausi Ana poloaiga. Ma e folafola mai o Ia o le a “tatou maua pea Lona Agaga e faatasi ma i tatou.”10
Tolu, faalagolago i musumusuga a le Agaga. Tou te manatua lo’u aafiaga ma Chloe lea na musumusu mai ai lena Agaga i se mau ia te au? O loo i le Ioane 14:15: “Afai tou te alolofa mai ia te au, ia outou tausi mai i a’u poloaiga.” Ma o fuaiupu taua nei o loo sosoo mai ai:
“Ou te fai atu foi i le Tama, ona foai mai ai lea e ia ia te outou le tasi Fesoasoani ina ia tumau pea o ia ia te outou e faavavau:
“O le Agaga lea e tupu mai i le upumoni, e le mafai e le lalolagi ona talia o ia, aua ua le vaaia o ia, ua le iloa foi o ia; a o outou, ua outou iloa o ia, aua e tumau pea ia ia te outou.”11
Ua i ai i tagata agavaa uma ua faamauina o Le Ekalesia a Iesu Keriso o le Au Paia o Aso e Gata Ai, le aia tatau i le mafutaga a le Agaga Paia. O le anapogi, tatalo, suesue i tusitusiga paia, ma le usiusitai e matuai faateleina ai lo tatou tomai e faalogo ma lagonaina uunaiga a le Agaga.
A tumu lou mafaufau i le le mautonu ma le fenumiai, o le a auina mai e le Tama ma le Alo le Agaga Paia e lapatai oe ma taiala oe ma le saogalemu i tulaga matautia o lenei malaga i le tino. O le a Ia fesoasoani ia te oe ia manatua, faamafanafana oe, ma faatumu oe “i le faamoemoe ma le alofa atoatoa.”12
Fa, faalagolago i fautuaga a perofeta soifua. Ua uma ona saunia e lo tatou Tama se ala mo i tatou e faalogo ai i Lana tulafono e ala mai i Ana perofeta. Ua fetalai le Alii, “O la’u upu o le a … faataunuuina uma, pe i lo’u lava leo po o i le leo o a’u auauna, ua tutusa lava.”13
Talu ai nei, ua fautuaina i tatou e perofeta soifua e “manatua le aso sapati, e tausia ia paia,”14 ma ia ola i le tulafono o le anapogi. O le usitai i lenei fautuaga faaperofeta ua saunia ai se ala mo i tatou ia usiusitai ai i poloaiga a le Atua ia alofa ia te Ia ma o tatou tuaoi a o tatou faateleina lo tatou faatuatua ia Iesu Keriso ma faaloaloa atu lo tatou lima e alolofa atu ai ma tausi isi tagata.15
O loo i ai le saogalemu i le mulimulitaia o le afioga a le Alii e auala mai i Ana perofeta. Na valaauina e le Atua Peresitene Thomas S. Monson, o fesoasoani i le Au Peresitene Sili, faapea ma uso o le Korama a Aposetolo e Toasefululua e avea ma perofeta, tagatavaai, ma talifaaaliga. I lenei lalolagi o le faateleina o le fefe, mea faalavefau, faigata, ma le ita, e mafai ona tatou vaai atu ia i latou pe faapefea e soo o Iesu Keriso, ona tumu i le alofa mama, o foliga, o leo, ma tali atu i faafitauli e ono tulai mai ai ni fevaevaeaiga. Latou te molimau mai ia Iesu Keriso ma e tali mai ma le alofa moni, le alofa mama o Iesu Keriso, o Ana molimau i latou.
Ina ua mavae lo’u aafiaga ma Chloe, sa ou sailiili i tusitusiga paia mo ni fuaiupu o loo ta’ua ai poloaiga ma le alofa. Sa tele ni fuaiupu na ou mauaina. O nei fuaiupu taitasi e faamanatu mai ia i tatou o Ana poloaiga o se faailoaga o Lona alofa mo i tatou, ma o le usiusitai i Ana poloaiga o se faailoaga lea o lo tatou alofa mo Ia.
Ou te molimau atu afai tatou te faalagolago i le Atua, lo tatou Tama e Faavavau; faalagolago i Lona Alo, o Iesu Keriso ma faatino le faatuatua i Lana Togiola, faalagolago i musumusuga a le Agaga; ma faalagolago i perofeta soifua, o le a tatou maua lo tatou ala mai autafa o le alatele ma faaauau atu ai ma le saogalemu—e le na o le tumau ai—ae maua le olioli i la tatou malaga i le fale. I le suafa o Iesu Keriso, amene.