Na fai mai tamaiti, “O i Tatou o Ona Aao”

Ua tali mai ma le naunautai le fanau i le salafa o le lalolagi i se auaunaga faalauiloa na faasalalau atu e mekasini a le Ekalesia. Na valaaulia e mekasini ia tamaiti e saili ni auala e auauna atu ai, ona tusi lolomi lea o o latou alofilima i luga o se fasi pepa, tusi a latou auaunaga i luga o le alofilimai, ma auina atu i le Liahona po o le Friend.

Sa maua e mekasini le sili atu ma le 30,000 alofilima na tusia mai le fanau o e na aapa atu e faasoa atu le alofa o le Faaola, faamanuiaina aiga ma tuaoi i le lalolagi atoa.

O musumusuga mo le faalauiloa na oo mai mai se saunoaga o le konafesi aoao ia Aperila 2010 a Peresitene Dieter F. Uchtdorf, Fesoasoani Lua i le Au Peresitene Sili, ua faaulutalaina “O Outou o O’u Lima.” Na faamatalaina e Peresitene Uchtdorf le tala i se faatagata o Iesu Keriso na faaleagaina i le Taua Lona II a le Lalolagi. I le le mafai ai ona toe faafouina ia aao o le faatagata lea na tusia ai e tagata o le aai upu nei i le pito i lalo: “O Outou o O’u Lima.”

O le faatinoga o auaunaga a le fanau o se tulaga uiga ese e pei o alofilima ia na tusia ma ua latou auina mai. Mo se faataitaiga:

Natalie S., 5 tausaga, mai Hong Kong na auina mai ni alofilima se lua. Na fai mai se tasi, “Sa ou fesoasoani i lo’u tina i le fale,” ma le isi, “Sa ou fesoasoani e tulei se tagata o loo i se nofoa faataavalevale.”

Erik S., 11 tausaga, mai Rusia na faamatala mai, “I le aai o ou nofo ai, e malulu le taumalulu.” Sa siitia mai se aiga i lona nuu, ma sa leai ni o latou lavalava mafanafana. “Sa ou tuuina atu lo’u ofu mafanafana ia Artur,” o le tala lea a Erik, “ma sa avea o ia ma a’u uo.”

O Gabriela P. e sefulu tausaga mai Venesula sa lolomiina i luga o lona alofilima: “I la’u aoga, ma sa matou auai ma au uo i se vasega e fai ai le mu. Sa ou saili mo se paga ma te taaalo ae ou vaaia ai se tamaitiiti fou e foliga faanoanoa. Sa ou manao e fesoasoani i ai ae sa ou leiloa pe faapefea. Ona fai mai lea o se leo ia te au na o lou avea lava ma ana uo. Sa ou alu ma talanoa atu ia te ia. O lenei ua avea i maua ma uo mamae.”

Sa faaalia alofilima i le laumua o le Ekalesia i le Aai o Sate Leki, Iuta, ISA, mo le lua vaiaso o Setema ma Oketopa.