Tausi i Poloaiga

Saunia e Peresitene Thomas S. Monson

O Le na foafoaina i tatou ma alofa ia i tatou ma le atoatoa e silafia le auala tatou te manaomia ona ola ai i olaga ina ia maua le fiafiaga silisili e mafai ona maua.

Ou uso pele, ua matagofie lava le toe faatasi ai ma outou. Ua musuia i tatou i lenei afiafi i upu ua tatou falaogo i ai. Ou te tatalo ina ia taialaina foi au i mea ou te tau atu.

O lau savali ia te outou i le po nei e tuusao lava. O le savali lenei: tausi i poloaiga.

E le i aumaia poloaiga a le Atua ina ia faamamafa ai ia i tatou pe avea ai ma ni faafitauli i lo tatou fiafia. Ae o le faafeagai o lea mea, e moni. O Le na foafoaina i tatou ma alofa ia i tatou ma le atoatoa e silafia le auala tatou te manaomia ona ola ai i olaga ina ia maua le fiafiaga silisili e mafai ona maua. Ua Ia saunia ni taiala mo i tatou ia, afai tatou te mulimuli ai, o le a taitai atua i tatou ma le saogalemu i lenei malafa faaletino e tele ina lamatia. Tatou te manatuaina upu o se viiga masani: “Tausi Piloaiga! I lenei mea o loo i ai le saogalemu; i lenei mea o loo i ai le filemu.”¹

Ua lava le alofa o lo tatou Tama Faalelagi ia i tatou ua fetalai mai ai: Aua e te molimau pepelo; aua e te gaoi; aua e te mulilua; ia e alofa atu i lou tuaoi e pei o oe lava ia te oe; ma isi mea faapena.² Ua tatou iloa poloaiga. E malamalama o Ia a tatou tausia poloaiga, o le a fiafia atu o tatou olaga, faamalieina atili, ma faaitiitia le lavelave. O Le a faigofie atu ona onosaia o tatou luitau ma faafitauli, ma o le a tatou mauaina Ana faamanuiaga folafolaina. Ae e ui ua Ia tuuina mai ia i tatou ia tulafono ma poloaiga, ae ua Ia faatagaina foi i tatou e filifili pe talia pe teenaina. O a tatou faaiuga i lenei tulaga o le a iloa ai lo tatou taunuuga.

Ua ou talitonu aiai ua i ai ia i tatou taitoatasi lana lava sini tupito o le ola e faavavai i le afioaga a lo tatou Tama Faalealgi ma Lona Alo, o Iesu Keriso. O le mea lea, e taua tele mo i tatou le faia o filifiliga i o tatou olaga atoa ia o le a taitai atu ai i tatou i lenei sini. Peitai, ua tatou iloa ua tuuto foi Satani ia ia faatoilaloina i tatou. Ua matua tinou o ia ma ana au i a latou taumafaiga ia faalavelave i o tatou manaoga amiotonu. Ua fai i latou faatusa o taufaamatau ogaoga ma le faifai pea i lo tatou faaolataga e faavavau sei vagana ua tatou tinou foi i lo tatou naunautaiga ma taumafaiga ia ausia la tatou sini. Na lapatai mai le Aposetolo o Peteru ia i tatou, “Ia outou faautauta, ia outou mataala, ona o le ua fai outou mona fili, o le tiapolo lea, o loo fealuai o ia e pei o se leona tagi, ua saili se tasi e aina e ia.”³

E ui e le o i ai se taimi i o tatou olaga e tuusaunoa ai mai faaosoosoga, ae o outou alii talavou ua i ai i se vaitau e ono patino ai ona outou vaivai. O tausaga o le talavou e tele lava o tausaga o le le mautonu, e uiga i lagona e peiseai e te le o ausia mea ua faamoemoeina mai ia te oe, o le taumafai e taliaina faatasi ma uo, ma le taumafai e fia lauiloa. Atonu e faaosoosoina oe ia tuu i lalo ou tulaga faatonuina ma ō faatasi ai ma le isi toatele o tagata ina ia mafai ona taliaina e i latou e te manao e fai ma au uo. Faamolemole ia lototele, ma ia nofouta i soo se mea o le a faoa ou faamanuiaga e faavavau. O filifiliga tou te faia iinei ma le taimi nei e matua taua e faavavau.

Tatou te faitau i le 1 Korinito: “Atonu e … tele lava [ituaiga] leo i le lalolagi.”⁴ O loo siomia i tatou e leo faatosina, leo taufaasese, leo faalumaluma, leo faaonapo nei, ma leo fenumiai. Ou te faaopoopo atu o nei leo o leo malomaloā. Ou te apoapoai atu ia tuutuu i lalo le leotele ae ia faatosinaina e lena leo filemu ma le itiiti lea o le a taialaina oe i le saogalemu. Manatua sa tuu e se tasi e i ai le pule ona lima i luga o lou ao ina ua uma ona e papatiso, ma faamauina oe o se tagata o le Ekalesia ma faapea atu, “Talia le Agaga Paia.”⁵ Tatala o outou loto,, e oo lava i o outou agaga, i leo o lena siufofoga faapitoa lea e molimau mai i le upumoni. E pei ona folafola mai e le perofeta o Isaia, “E faalogo foi o outou taliga i le upu … , e faapea mai, O le ala lava lenei, ia outou savavali ai.”⁶ Tau ina ia tatou faalogo, ina ia tatou lagona lenei leo faamafanafana ma taiala lea o le a faatumauina i tatou i le saogalemu.

O le lafoaia o poloaiga e matala ai le ala o le mea ua ou manatu i ai o le mala o o tatou aso. E aofia ai le mala o le faasausili, le mala o ponokalafi, le mala o fualaau faasaina, le mala o le ola le mama, ma le mala o le faapa’u pepe, ua taua na o ni nai mea. Ua tau mai e tusitusiga paia ia i tatou o le tiapolo “o le faavae o ia mea uma.”⁷ Ua tatou iloa o ia “o le tama o pepelo uma, e faasese ma faatauaso tagata.”⁸

Ou te aioi atu ia te outou ia aloese mai soo se mea o le a faoa maia ia te oe lou fiafia iinei i le olaga faaletino ma le ola e faavavau i le lalolagi a sau. I ana mea taufaasese ma pepelo, o le a taitai ai e le tiapolo oe i lalo i tifato maseesee i lou faafanoga pe afai e te faatagaina oe ia faia lea mea. O le a e i ai i lena tifato maseesee ae a o lei e iloaina e le o i ai se auala e tu ai. Ua e faalogo i feau a le tiapolo. Na te valaau mai ma le poto: Na o le tasi lava e le afaina; o loo faia foi e tagata uma; aua e te faatoetoeaina; ua suia taimi; e le afaina ai lava se tasi; e pule lava oe i lou olaga. E iloa e le tiapolo i tatou, ma na te iloaina faaosoosoga ia o le a faigata mo i tatou ona faaleano i ai. E matuai taua mo tatou le matua faautauta i taimi uma ina ia mafai ona aloese mai le lolo atu i ia pepelo ma faaosoosoga.

O le a manaomia le lototele aiai a o tatou tumau faamaoni ma le faatuatua i le lotolotoi o le faateteleina pea o uunaiga ma faatosinaga taufaasese ia o loo siomia ai tatou ma faasese ai upumoni, olopalaina ai mea lelei ma matagofie, ma taumafai ia suitulaga i ai filosofia faaletagata o le lalolagi. A na faapea na tusia e tagata ia poloaiga, ona suia lea e ala i mea e loto i ai pe faia faaletulafono pe i soo se auala lava o le a faamalieina ai le tagata. Peitai, o poloaiga, na aumai mai le Atua. O le faaaogaina o lo tatou faitalia, e mafai ai ona tatou faataatia ese poloaiga. Peitai, e le mafai ona tatou suia e pei lava o lo tatou le mafaia ona suia taunuuga e oo mai i le le usitaia ma le soliga o poloaiga.

Tau ina ia tatou iloaina o lo tatou fiafiaga silisili i lenei olaga o le a oo mai pe a tatou mulimuli i poloaiga a le Atua ma usitai i Ana tulafono! Ou te fiafia i upu o loo maua i le Isaia mataupu 32, fuaiupu 17: “O le [galuega a] le amiotonu, o le manuia lea; e tupu mai foi i le amiotonu le filemu ma le saogalemu e faavavau.” O lea filemu, o lea saogalemu ua na o le amiotonu lava e mafai ona oo mai ai.

E le mafai ona tatou faatagaina i tatou lava e faia sina fetuunaiga itiiti lava i le taulimaina o le agasala. E le mafai ona tatou faatagaina i tatou lava ia talitonu e mafai ona tatou auai “tau lava o sina” lē usiusitai i poloaiga a le Atua, aua e mafai e le agasala ona pule ia i tatou lea e matua tiga matuitui ai le tau faasaolotoina mai ai o i tatou. O nei vaisu e sau mai fualaau faasaina, o mea inu malolosi, o ponokalafi, ma le agasala e moni ma e toetoe lava a le mafai ona gauia e aunoa ma se taumafaiga maoae ma se fesoasoani tele.

Afai e i ai se tasi o outou o tau pule ai le agasala i le olaga, ou te faamautinoa atu ia te oe o loo i ai se auala e toefoi mai ai. O lea auala ua ta’ua o le salamo. E ui e faigata le ala, ae o lou faaolataga e faavavau o loo faalagolago i ai. O a nisi mea e sili ona taua atu i lo au taumafaiga? Ou te aioi atu ia te oe ia fuafua loa iinei i le taimi nei lava e faia laasaga talafeagai e salamo atoatoa ai. O le vave o lou faia o lea mea, o le vave foi lena o le a mafai ai ona e lagonaina le manuia ma le filemu ma le saogalemu lea na tautala i ai Isaia.

I sina taimi e lei mamao atu sa ou faalogo ai i le molimau a se tamaitai, o lona toalua sa aluese mai le ala o le saogalemu, soli poloaiga ma, i le faagasologa, sa toeiititi lava a malepe ai lo la aiga. Ina ua iu ina la taufai iloa uma le taufasese o vaisu ma iloa ai le le fiafia ua oo i ai o laua olaga, atoa ai ma lo la faamanualiaina o e pele ia i laua, o lea sa amata ai ona la sui. Sa telegese le faagasologa o le salamo ma sa i ai taimi na tiga ai, ae faatasi ai ma le fesoasoaniga a taitai perisitua, atoa ai ma le fesoasoaniga mai aiga ma uo faamaoni, sa la toefoi mai ai.

Ou te faasoa atu ia te outou se vaega o le molimau a lenei tuafafine e uiga i le mana faamalolo o le salamo: “E faapefea e se tagata ona sau mai le avea ma se mamoe na leiloa ma saisaitia i le [agasala], ona oo i lenei filemu ma le fiafia ua ma lagonaina nei? E faapefea ona tupu lena mea? O le tali … ona o se talalelei atoatoa, o se Alo atoatoa ma Lana taulaga mo a’u. … I le mea sa pogisa, ua i ai nei malamalama. I le mea sa i ai le faanoanoa ma le tiga, ua i ai nei le olioli ma le faamoemoe. Ua matua lemafuatia le faamanuiaina o i maua i le suiga lea e na o le salamo lava na mafai ai e ala i le Togiola a Iesu Keriso.”

Na maliu lo tatou Faaola ina ia maua e oe ma au lena meaalofa faamanuiaina. E ui lava i le mea moni e faapea e faigata le ala, ae o le folafolaga e moni. Na fetalai le Alii ia i latou o e salamo:

“E ui lava ina pei o ofu mumu a outou agasala, e sisina ia e pei o le kiona.”⁹

“Ma ou le toe manatua a latou agasala.”¹⁰

I o tatou olaga atoa o le a tatou manaomia ai ona faafailele ni molimau malolosi e ala i le suesue i tusitusiga paia ma e ala i le tatalo ma le mafaufau loloto i upumoni o le talalelei a Iesu Keriso. A toto ma le mausali, o a tatou molimau o le talalelei, e uiga i le Faaola, ma lo tatou Tama Faalelagi o le a faatosinaina mea uma tatou te faia.

Ou te molimau atu o i tatou uma o atalii faapelepele a lo tatou Tama Faalelagi, na auina mai i le lalolagi i nei aso ma le taimi mo se faamoemoega, ma tuuina mai le perisitua a le Atua ina ia mafai ai ona tatou auauna atu i isi ma faatino le galuega a le Atua iinei i le lalolagi. Ua poloaiina i tatou ia ola i o tatou olaga ina ia faatumauina le agavaa e umia ai lena perisitua.

Ou uso e, tau ina ia tatou tausia poloaiga! O loo faapolopoloina mea ofoofogia ma le mamalu mo i tatou pe afai tatou te faia. Ia avea lenei mea ma o tatou faamanuiaga, ou te tatalo ai i le suafa o Iesu Keriso, lo tatou Faaola ma le Togiola, amene.