E Manuia ma Fiafia i Latou o E Tausi i Poloaiga a le Atua
Saunia e Elder Von G. Keetch
O Le Fitugafulu
O papupuni e faatuina e le Alii e fatu ai mo i tatou se uafu saogalemu mai faatosinaga leaga ma le faataumaoi.
I se taimi ua mavae atu a o asiasi atu i Ausetalia, sa ou malaga ai i se faga faaofuofu i le talafatai ua lauiloa mo faaseega i galu. A o ou savalivali i le matafaga, sa faagaeetia au i le matagofie o galu fafati tetele e fatitu i fafo atu o le faga ona sosolo malie mai ai lea o galu laiti i le apitaogalu.
A o faaauau pea la’u savalivaliga, sa matou fetaiai ma le au faasee mai Amerika. Sa iloagofie sa i ai se mea sa le fiafia ai, sa talanoa leotetele ma faasino atu i le sami. Ina ua ou fesili atu pe o le a le mea ua faaletonu, sa tusitusi atu o latou lima i talaatu teisi o le faga i le mea sa fatitu ai galu tetele.
“Vaai atu i o,” sa fai mai ai se tasi ia te au ma le ita. “O mafai ona e vaai atu i le papupuni?” Na ou vaavaai teisi atu i ai, e sa’o sa mafai ona ou iloa atu se papupuni o toso i le gutu atoa o le faga, i le mea tonu o loo fatitu ai galu tetele, faatosina. Sa foliga mai sa gaosia le papupuni i se uaea mamafa ma sa lagolagoina e ni mea sa faatafetafea ai i luga o le vai. E tusa ai ma le au faasee, e tau lava i lalo o le alititai o le sami.
Sa toe fai mai le tagata faasee Amerika, “E na o le faa-tasi i o matou olaga ona maua le matou malologa lea iinei e faasee ai i galu tetele. E mafai ona matou faasee i galu laiti ia e fati i totonu o le faga lava ia, ae o le papupuni lea ua le mafai ai ona matou faasee i galu tetele. Matou te le malamalama pe aisea ua fai ai le papupuni i o. Pau le mea ua matou iloa ua matua le aoga atoa ai lava le matou malaga.”
A o faateleina le le fiafia o le au faasee mai Amerika, sa taa’ina atu la’u vaai i se tasi tagata faasee i talaatu—o se tagata matua atu na iloagofie o se tagata o le nuu. Sa foliga mai ua amata ona le lava onosai a o faalogologo mai i faitioga ua saga faateleina e uiga i le papupuni.
Na iu ina tu ane i luga o ia ma savali mai i le vaega lea. E aunoa ma se upu, sa ia to mai lana seti meavaai mamao mai lana ato faafafa ma tuu atu i se tasi o le au faasee ma faasino atu agai i le papupuni. Sa tofu autilotilo atu le au faasee i le mea vaai. Ina ua oo mai ia te au, faatasi ai ma le fesoasoani a se vaaiga mamao, sa mafai ai ona ou vaai ma iloa atu se mea e lei mafai ona ou vaai i ai muamua: apaapa—o malie tetele o loo aai e latalata i le aau i le isi itu o le papupuni.
Sa vave ona masuigamalie le vaega. Sa toe ave e le toeaina faasee ana mea vaai ma faliu e savali ese. A o ia faliu, sa ia fai maia upu nei ou te le faagaloina lava: “Aua le soona faitio i le papupuni,” sa ia fai mai ai. “E na o le pau lava lena o le mea e puipuia outou mai le faaumatiaina.”
A o matou tutu ai i luga o lena matafaga matagofie, sa vave ona suia la matou vaaiga. O se papupuni sa foliga mai e malo ma faasasa—sa foliga mai ua faasa ai le malie ma le sagisagi fiafia o le faasee ai i galu tetele—a ua avea o se mea ua matua ese lava. Faatasi ai ma lo matou malamalama fou i le matautia sa faapuna i lalo ifo tonu o le fogasami, ua tuuina mai nei e le papupuni le puipuiga, saogalemu, ma le filemu.
A o tatou savavali i ala o le olaga ma tulimatai a tatou miti, o poloaiga ma tulaga faatonuina o le Atua—e pei o le papupuni—e mafai i nisi taimi ona faigata ona malamalama i ai. Atonu e foliga mai e malo ma le matuu mai, e punitia ai se ala e foliga mai e malie ma sagisagi fiafia ma sa ui ai le toatele o isi. E pei ona tautino mai e le Aposetolo o Paulo, “Tatou te vaavaai faanenefu i le faaata,”1 ma se vaaiga e utiuti, lea e tele ina le mafai ona tatou malamalama ai i tulaga matautia tetele o loo natia i lalo ifo tonu o le fogamea.
Ae o Ia o le “malamalama i mea uma”2 e silafia lelei mea o taoto ai na tulaga matautia. Na te tuuina mai le taitaiga faalelagi, e ala i Ana poloaiga ma le taitaiga alofa, ina ia mafai ai ona tatou taumamao mai mea matautia—ina ia tatou faatuina ai se kosi i o tatou olaga lea e puipuia mai mea faataumaoi faaleagaga ma auvae faamamaga o le agasala.3
Tatou te faaalia lo tatou alolofa i le Atua—ma lo tatou faatuatua ia te Ia—e ala i le faia o le mea sili tatou te mafaia i aso uma e mulimuli ai i le ala na Ia faataoto mo i tatou ma e ala i le tausiga o poloaiga na Ia tuuina mai ia te i tatou. E faapitoa lo tatou faaalia o lena faatuatua ma le alolofa i tulaga tatou te le malamalama atoatoa i ai i le mafuaaga o poloaiga a le Atua po o le ala faapitoa o loo Ia ta’u mai ia i tatou e ui ai. E matua faigofie lava le mulimuli i se kosi i totonu o le papupuni i le taimi lava tatou te iloa ai o loo i ai mea feai o loo mumumumu i fafo teisi. E sili atu ona faigata ona tausisia la tatou kosi i totonu o le papupuni pe afai na pau le mea o mafai ona tatou iloa atu o galu sagisagi ma le faamata’ai i le isi itu. Ae o taimi na—o taimi tatou te filifili ai e faatino lo tatou faatuatua i le Atua, ma faaalia lo tatou alolofa ia te Ia—tatou te tuputupu ae ai ma maua le mea aupito sili.
I le Feagaiga Fou, sa lei mafai ona malamalama ia Anania i le poloaiga a le Alii e saili ma faamanuia ia Saulo—o se tagata sa umia totino se pule e faafalepuipuia ai e sa talitonu ia Keriso. Ae ona o lona usitai i le poloaiga a le Atua, sa avea ai Anania ma se meafaigaluega i le fanauina faaleagaga o le Aposetolo o Paulo.4
A tatou faalagolago i le Alii, faatino lo tatou faatuatua, usitai i Ana poloaiga, ma mulimuli i le ala sa Ia faataoto mo i tatou, ona avea atili lea o i tatou ma tagata e finagalo le Alii ia avea ai. O le “avea ai” lea—o le liua o le loto—e taua tele. E pei ona sa aoao mai e Elder Dallin H. Oaks i tatou: “E le lava mo se tasi le na o le fai o le mea sa’o. O poloaiga, sauniga, ma feagaiga o le talalelei e le o se lisi o tupeteu e manaomia ona fai i se teugatupe i le lagi. O le talalelei a Iesu Keriso o se fuafuaga lea ua faaali mai ai ia i tatou le ala e avea ai ma tagata ua finagalo lo tatou Tama Faalelagi ia avea ai.”5
O le mea lea, o le usiusitai moni, o le tuuina atu o i tatou lava atoa ia te Ia, ma faatagaina o Ia e faataoto lo tatou ala e le gata i le malū o le tai ae faapea foi pe a sou, ma le malamalama e mafai ona Ia faia i tatou ma tagata e sili atu nai lo le mea e mafai ona tatou faia e i tatou lava.
A o tatou gauai atu i tatou lava i Lona finagalo, e faateleina lo tatou filemu ma le fiafia. Na aoao mai le Tupu o Peniamina e faapea o i latou o e tausi i poloaiga a le Atua e “manuia ma fiafia” i “mea uma, i le faaletino ma le faaleagaga.”6 E finagalo le Atua ia tatou maua le olioli. E finagalo ia tatou maua le filemu. E finagalo ia tatou manuia. E finagalo ia tatou saogalemu ma ia puipuia mai faatosinaga a le laolagi o loo siomia ai i tatou.
I se isi faaupuga, o poloaiga a le Alii e le o ni ala felavasa’i lavelave o papupuni i lalo o le sami faapea e tatau ona tatou aoao e onosaia ma le musuā i lenei olaga ina ia mafai ai ona faaeaina i tatou i le isi olaga. Ae, o papupuni na faatuina e le Alii e fatufatu ai mo i tatou se uafu saogalemu mai faatosinaga leaga ma le faataumaoi ia semanu e toso faatataina i tatou i lalo i le loloto o le faanoanoa. Ua tuuina mai poloaiga a le Alii ona o le alofa ma le manatu tele mai; ua fuafuaina mo lo tatou olioli i lenei olaga7 e faapei foi ona fuafuaina mo lo tatou olioli ma le faaeaga i le isi olaga. Ua faailoga ai le ala e tatau ona tatou galulue ai—ma o le mea e sili atu ona taua, e faasusulu mai ai e e tatau ona tatou avea ai.
E pei ona lelei ma moni o mea uma, o Iesu o le faataitaiga sili. O le faatinoga aupito silisili o le usiusitai i le faavavau uma ina ua gauai atu e le Alo o Ia lava i le finagalo o le Tama. Na ole atu i le lotomaualalo aupito o’oo’o ina ia aveese le ipu—ia mafai ona Ia ui atu i se isi ala nai lo le ala na faailoga mo Ia—sa gauai atu e Keriso o Ia lava i le ala na finagalo Lona Tama mo Ia e ui ai. O se ala na ui atu i Ketesemane ma Kolokota, lea na Ia onosaia ai le tiga e le mafuafuaina ma lea na tuulafoaiina atoa ai o Ia ina ua afio ese le Agaga o Lona Tama. Ae o le ala lava lea na taualuga i se tuugamau gaogao i le aso tolu, faatasi ai ma le alaga o le “Ua toetu o Ia!”8 sa tatagi i taliga ma loto o i latou o e sa alolofa ia te Ia. Sa aofia ai le olioli e lei mafaufauina ma le toafilemu na totonugalemu i Lana Togiola mo fanau uma a le Atua e oo i le faavavau. O le faatagaina o Lona finagalo e tofatumoanaina i le finagalo o le Tama, na aumaia ai e Keriso ia i tatou le faamoemoe o le filemu e faavavau, olioli e faavavau, ma le ola e faavavau.
Ou te molimau atu o i tatou o fanau a se Atua alofa. Ou te molimau atu e finagalo o Ia ia tatou fiafia ma ia saogalemu ma manuia. O le mea lea, sa Ia faataoto ai mo i tatou se ala e toe foi atu ai ia te Ia, ma sa Ia faatuina ni papupuni o le a puipuia ai i tatou i le ala. A tatou faia le mea sili e mulimuli ai i lena ala, tatou te maua le saogalemu moni, fiafia, ma le filemu. Ma a o tatou gauai atu i Lona finagalo, e avea i tatou ma e e finagalo o Ia e avea ai. I le suafa o Iesu Keriso, amene.