“Ua Filifilia e Molimau Atu i Lo’u Igoa”

Saunia e Elder David A. Bednar

O Le Korama a Aposetolo e Toasefululua

E matagofie le i ai o ni tamalii matutua ua i ai le matua faaleagaga ma faia faaiuga sa’o e auauna atu i tofiga faaleautaitai sinia o le Ekalesia toefuataiina a Iesu Keriso.

I le 1996 sa faatalanoaina ai Peresitene Gordon B. Hinckley i luga o le polokalama o le televise a le malo o le 60 Minutes. O Mike Wallace, o se tusitala ua i ai le potomasani ma le atamai i fesili, na faatalanoaina ia Peresitene Hinckley e uiga i ni autu taua.

E latalata lava i le faaiuga o le la talanoaga, sa saunoa atu ai Mr. Wallace, “O loo fai mai isi tagata, ‘O se Lotu lenei o tagata matutua. O se lotu lenei e taitaia e toeaiina matutua.’”

Sa tali atu Peresitene Hinckley ma le fiafia e aunoa ma le faatuai, “E le matagofie ea le i ai o se tamalii faatagata matua e fai ma taitai, o se tamalii e faamasino lelei e le o felafoaia e soo se matagi o mataupu?” (faasalalauga i le aso 7 Ape., 1996).

O lo’u faamoemoega o le faamalamalama atu lea o le mafuaaga moni e matagofie ai le i ai o ni tamalii matutua ua i ai le matua faaleagaga ma faia faaiuga sa’o e auauna atu i tofiga faaleautaitai sinia o le Ekalesia toefuataiina a Iesu Keriso—ma le mafuaaga e tatau ai ona tatou “faalogo” ma “ua’i atu” (Mosaea 2:9) i aoaoga ma nei tamalii o e ua “filifilia [e le Alii] e molimau atu i [Lona suafa] … i atunuu uma, ituaiga, gagana, ma nuu” (MF&F 112:1).

Ou te tatalo ina ia aoaoina uma i tatou e le Agaga Paia a o tatou iloiloina faatasi lenei mataupu taua.

O Se Lesona o le Olaga Atoa

I tausaga o la’u auaunaga, o le averesi o le matua o tamalii o loo auauna atu i le Au Peresitene Sili ma le Korama a Aposetolo e Toasefululua o le 77 tausaga—o le averesi aupito sili lea ona matua o Aposetolo i totonu o le periota o le 11 tausaga i lenei tisipenisione.

Ua faamanuiaina au i aafiaga tuufaatasi faaaposetolo, faaletagata lava ia ma faalegaluega atoa ai ma le malamalamaaga o uso o le korama o loo matou galulue. O se faataitaiga mai la’u fegalegaleaiga ma Elder Robert D. Hales ua faamamafaina ai ni avanoa ofoofogia ua ou aoaoina mai ai ma auauna atu ai faatasi ma nei taitai.

I nai tausaga talu ai sa ou faaaluina ai se aoauli o se Aso Sa faatasi ma Elder Hales i lona maota a o faasolosolo ona toe manuia mai se gasegase tuga. Sa ma talanoa e uiga i o ma aiga, a ma tiutetauave faalekorama, ma aafiaga taua.

I se tasi vaega na ou fesili atu ai ia Elder Hales, “Ua avea oe ma se tane faamanuiaina, se tamā, tagata taalo, pule o se pisinisi, ma se taitai FaaleEkalesia. O a ni lesona ua e aoaoina a o e faasolosolo matua ma faatapulaaina oe i le faaitiitia o le malosi faaletino?”

Sa mafaufau Elder Hales mo sina taimi ona tali mai lea, “A oo ina le mafai ona e faia mea sa masani ona e faia i taimi uma, ona e faia lea tau o mea e sili ona taua.”

Sa faagaeetia au i le faigofie ma le malamalama o lana tali. Sa faasoa mai e la’u paaga pele faaaposetolo ia te au se lesona o le olaga atoa—o se lesona sa aoaoina e ala i tofotofoga faigata o mafatiaga faaletino ma sailiiliga faaleagaga.

O Tapulaa ma Vaivaiga Faaletagata

O tapulaa o taunuuga faalenatura ia o le matua o le soifua, o le mea moni e mafai ona avea ma ni puna ofoofogia o le aoaoina ma le malamalamaaga faaleagaga. O mafuaaga tonu ia e ono talitonu ai le toatele o loo faatapulaaina ai le mataalia o nei auauna, e mafai ona avea ma nisi o o latou malosiaga silisili ona maoae. O tapulaa faaletino e mafai ona faalauteleina ai le vaaiga mamao. O le malosi faatapulaaina e mafai ona faamanino ai mea e faamuamua. O le le mafai ona faia o le tele o mea e mafai ona tuusao atu ai le taulaiga i mea e silisili ona taua.

Ua fautua mai nisi tagata faapea, o taitai talavou ma sili atu ona malolosi o loo manaomia i le Ekalesia e taulimaina ma le mataalia ia luitau ogaoga o lo tatou lalolagi i aso nei. Ae e le faaaogaina e le Alii ni filosofia ma ni faiga faaonapo nei o le taitaiga e ausia ai Ona faamoemoega (tagai Isaia 55:8–9). E mafai ona tatou faamoemoeina i taimi uma le Peresitene ma isi taitai sinia o le Ekalesia o ni tamalii matutua ma lava le tomai faaleagaga.

O le mamanu faaalia a le Alii o le puleaina e ala i aufono i Lana Ekalesia ua sauniaina ma faaitiitia ai le aafiaga o vaivaiga faaletagata. O le mea e mataina ai, o tapulaa faaletino o nei tamalii ua faamautu moni mai ai le puna faalelagi o faaaliga ia e oo mai ma auala mai ia i latou. O le mea moni, o nei tamalii ua valaauina e le Atua e ala i valoaga (tagai Mataupu Faavae o le Faatuatua 1:5).

O Se Mamanu o Sauniuniga

Ua ou matauina i le matou Usoga o se vaega o le faamoemoega o le Alii mo le i ai o tamalii matutua e faatagata matua ma faia faaiuga lelei ia auauna i tofiga sinia faaletaitaiga o le Ekalesia. O nei tamalii ua aoaoina e le Alii mo se vaitau umi o le olaga, o lē ua fai ai i latou ma sui, e auauna i ai, ma alolofa i ai. Ua latou aoaoina ia malamalama i le gagana paia a le Agaga Paia atoa ai ma mamanu a le Alii mo le mauaina o faaaliga. O nei tamalii masani ua oo i se faagasologa tulagaese o le atinaeina ua faamaai ai la latou vaai, uunaia ai lo latou malamalamaaga, fatuina ai lo latou alofa mo tagata mai malo uma ma tulaga uma, ma faamautu ai le moni o le Toefuataiga.

Ua ou molimauina soo le matou Usoga o taumafai ma le filiga e faataunuu ma faalautele o latou tiutetauave a o tauivi ai ma faafitauli ogaoga faaletino. O nei tamalii e le o tuusaunoaina mai mafatiaga. Ae, ua faamanuiaina ma faamalosia ia fetaomi atu i luma ma le lototoa a o puapuaga ai i mafatiaga.

O le auauna faatasi ai ma nei sui o le Alii, ua ou iloa ai lo latou manao silisili ia iloatino ma faia le finagalo o le Tama Faalelagi ma Lona Alo Pele. A o matou fefautuaai ai faatasia, na maua musumusuga ma faia ni faaiuga e atagia ai se tikeri o le malamalama ma le upumoni e sili atu i lo le atamai, manatu, ma aafiaga faaletagata. A o galulue faatasi ma le lotogatasi i faafitauli faigata, ua faalauteleina lo matou malamalama autasi i se faafitauli i ni auala ofoofogia e ala i le mana o le Agaga Paia.

Ua faamanuiaina lava au e matauina i se tulaga faaleaso ia uiga malie faaletagata, tomai, ma uiga malualii o nei taitai. O nisi tagata e avea ni vaivaiga faaletagata o le Usoga ma ni popolega ma faaitiitia ai [lo latou] faatuatua. Mo au, o na lē atoatoa e uunaia ma siitia ai le faatuatua.

O Se Lesona Faaopoopo

Ua ou matauina nei le toaono o le matou Usoga ua mauaina se siitaga e ala i le oti faaletino ma see atu ai i ni tiutetauave fou i le lalolagi o agaga: Peresitene James E. Faust, Peresitene Gordon B. Hinckley, Elder Joseph B. Wirthlin, Elder L. Tom Perry, Peresitene Boyd K. Packer, ma Elder Richard G. Scott.

Na tuuto atu e nei Uso lototoa o latou “agaga atoa” (Ominae 1:26) e molimau atu ai i le suafa o Iesu Keriso i le lalolagi atoa. O a latou aoaoga atoa e le mafaatauina.

Sa faasoa mai e nei auauna ia i matou i tausaga faaiuiu o a latou auaunaga ni aotelega mamana faaleagaga o lesona na aoaoina i le gasologa o tausaga e tele o auaunaga faapaiaina. Na faamatalaina mai e nei taitai ia upumoni e matua taua lava i se taimi ua talitonu ai nisi e itiiti lava se mea latou te foai atua.

Mafaufau i aoaoga faaiu a perofeta maoae i tusitusiga paia: Mo se faataitaiga, na faaiu e Nifae ana faamaumauga i upu nei: “Aua ua faapea ona poloaiina ai o a’u e le Alii, ma e ao ina ou usiusitai” (2 Nifae 33:15).

E tulata i le mutaaga o lona soifua, na apoapoai mai ai Iakopo:

“Ia outou salamo, ma ia outou ulu atu i le faitotoa vaapiapi, ma tutumau pea i le ala ua lauitiiti, seia oo ina outou maua le ola e faavavau.

“E, ia outou atamamai! O le a se isi mea e mafai ona ou fai atu?” (Iakopo 6:11–12).

Ma faamaea e Moronae lana galuega o le sauniaina o papatusi faatasi ai ma se tulimatai atu ma le faamoemoe i le Toetutu: “Ua lata ona ou alu atu e malolo i le parataiso o le Atua, seia toe faatasia lou agaga ma lou tino, ma aumai au i le ea ma le manumalo, e feiloai ma outou i luma o le pa faamasino logomalie a le Ieova silisili, le Faamasino Faavavau o e o ola ma e ua oti” (Moronae 10:34).

Ua faamanuiaina oe ma au e aoao mai aoaoga ma molimau faaiu a perofeta ma aposetolo o aso e gata ai. O igoa i nei ona aso e le o Nifae, Iakopo, ma Moronae—ae o Peresitene Faust, Peresitene Hinckley, Elder Wirthlin, Elder Perry, Peresitene Packer ma Elder Scott.

Ou te le o fautuaina atu o savali faaiu a nei tamalii faapelepele o ni savali sili ia ona ta’uaogaina pe taua i a latou auaunaga. Peitai, o le tauaofaiga o a latou aoaoga faaleagaga ma aafiaga o le olaga ua mafai ai e nei taitai ona faamamafa atu upumoni e faavavau i le faamaoni a’ia’i ma le mana tele.

I lana saunoaga faaiu i le konafesi aoao ia Aperila o le 2007, sa tautino mai ai e Peresitene Faust:

“Ua uma ona ofoina mai e le Faaola ia i tatou uma se filemu taua e ala i Lana Togiola, peitai ua na o lo tatou naunau e lafoai lagona le lelei o le ita, lotovale, po o le tauimasui e mafai ai ona oo mai. …

“Ia tatou manatua e manaomia ona tatou faamagalo atu ina ia faamagaloina ai i tatou. … Faatasi ai ma lo’u agaga ma lo’u loto atoa, ou te talitonu i le mana faamalolo lea e mafai ona oo mai ia i tatou, pe a tatou mulimuli i fautuaga a le Faaola ‘ia faamagalo atu i tagata uma’ [MF&F 64:10]” (“O Le Mana Faamalolo o le Faamagalo Atu,” Liahona, Me 2007, 69).

O le savali a Peresitene Faust o se lesona mamana o le olaga atoa mai se tamalii ou te alofa i ai ma se tasi e sili ona lotofaamagalo ua ou iloaina.

Sa molimau mai Peresitene Hinckley i lana konafesi aoao mulimuli ia Oketopa o le 2007: “Ou te toe faamautu atu la’u molimau o le valaauga o le Perofeta o Iosefa, o ana galuega, o le faamaufaailogaina o lana molimau i lona lava toto o se maturo o le upumoni e faavavau. … O loo tatou taufai feagai uma ma le fesili faigofie o le taliaina o le moni o le Uluai Faaaliga ma mea na mulimuli mai ai. O le sa’o o lenei Ekalesia o loo faavae lea i le moni o le Uluai Faaaliga. Afai o le mea moni lea, ou te molimau atu e moni lava, o le galuega la o loo tatou i ai o le galuega sili lea ona taua i luga o le fogaeleele” (“O Le Maa Na Tofia Mai le Mauga,” Liahona, Nov. 2007, 86).

O Le Maa Na Tofia Mai le Mauga.

Sa tuuina mai e Elder Wirthlin lana savali faaiu i le konafesi aoao ia Oketopa o le 2008.

“Ou te manatua pea le fautuaga [a lo’u tina] ia te a’u i lena aso ua leva lava ina ua faia’ina le matou au i se taaloga lakapi: ‘Ia tuu po o le a lava se mea e tupu, ia fiafia pea.’

“… O puapuaga, pe a sa’o ona taulimaina, e mafai ona avea o se faamanuiaga i o tatou olaga. …

“A o tatou vaavaai mo mea malie, saili mo le vaaiga e faavavau, malamalama i le mataupu faavae o le tauia, ma faalatalata atu i lo tatou Tama Faalelagi, e mafai ai ona tatou onosaia faigata ma tofotofoga. E mafai ona tatou faapea atu e pei ona fai mai lo’u tina, ‘Ia tuu po o le a lava se mea e tupu, ia fiafia pea’” (Ia Tuu Po o Le A Lava se Mea e Tupu, Ia Fiafia Pea,” Liahona, Nov. 2008, 28).

O le savali a Elder Wirthlin o se lesona mamana o le olaga atoa mai se tamalii ou te alofa i ai ma sa avea ma se molimau ola o le faatoilaloina o faigata e ala i le faatuatua i le Faaola.

Sa tulai atu Elder Perry i lenei pulelaa i le na o le ono masina talu ai. I lena taimi, sa tatou lei mafaufauina lava o lana molimau faaiu lea i se konafesi aoao.

“Sei ou faamaea atu i le tuuina atu o le molimau (ma o lo’u ivasefulu tausaga i luga o lenei lalolagi ua ou agavaa atoa ai e ta’u atu lenei mea) e faapea o le matua lava ou te oo i ai, o le faateleina foi lena o lo’u iloaina o le aiga o le totonugalemu o le olaga ma o le ki lea i le fiafia e faavavau.

“Ou te faafetai lava i lo’u toalua, mo la’u fanau, mo fanau a la’u fanau, ma fanau a fanau a la’u fanau, ma mo … aiga lautele lea ua matuai faamanuiaina ai lava lo’u lava ia olaga ma, ioe, e oo lava i le faavavau. Ou te tuu atu ai la’u molimau sili ona malosi ma paia” (“Aisea e Taua ai le Faaipoipoga ma le Aiga—I Soo Se Mea i le Lalolagi,” Liahona, Me 2015, 42).

O le savali a Elder Perry o se lesona mamana o le olaga atoa mai se tamalii ou te alofa i ai ma na malamalama e ala i aafiaga tetele i le sootaga taua i le va o le aiga ma le fiafiaga e faavavau.

Sa faamamafa e Peresitene Packer i le konafesi aoao i le ono masina talu ai le fuafuaga o le fiafia a le Tama, le Togiola a le Faaola, ma aiga e faavavau:

“Ou te molimau atu o Iesu o le Keriso, o le Alo o le Atua soifua. O loo tu o Ia i le ao o lenei Ekalesia. O Lana Togiola ma le mana o le perisitua, e mafai ai e aiga na amata i le olaga nei ona faatasi e oo i le faavavau. …

“Ou te matua faafetai mo … o le Togiola lea e mafai ona fufulu mamaina soo se pisia e tusa lava po o le a le faigata po o le a le umi po o le a foi le tele o taimi na toe faia ai. O le Togiola e mafai ona toe faasaolotoina oe ia agai i luma, i le mama ma le agavaa” (“O Le Fuafuaga o le Fiafia,” Liahona, Me 2015, 28).

O le savali faaiu a Peresitene Packer o se lesona o le olaga atoa mai se tamalii ou te alofa i ai ma na tautino soo mai ma le malosi e faapea o le faamoemoega “o gaoioiga uma i le Ekalesia o le vaaia lea o loo fiafia se alii ma se tamaitai ma le la fanau i le aiga, ua faamauina faatasi mo le olaga nei ma le faavavau atoa” Liahona, Me 2015, 26).

Sa folafola mai e Elder Scott i lana lauga i lana konafesi aoao mulimuli, ia Oketopa 2014: “Na tatou o mai tonu lava i le olaga faaletino ina ia tuputupu ae mai tofotofoga ma faaosoosoga. E fesoasoani luitau ia i tatou ia avea ai e faapei o lo tatou Tama o i le Lagi, ma o le Togiola a Iesu Keriso ua mafai ai ona tatou onosaia nei luitau. Ou te molimau atu pe a tatou o mai ma le naunautai ia te Ia, o le a mafai ona tatou onosaia faaosoosoga uma, lototiga uma, luitau uma e fetaiai ma i tatou” (“Ia Avea le Faaaogaina o le Faatuatua ma Mea E te Faamuamuaina,” Liahona, Nov. 2014, 94).

O le savali a Elder Scott o se lesona mamana o le olaga atoa mai se tamalii ou te alofa i ai ma o se molimau faapitoa faapelepele o le suafa o Keriso i le lalolagi atoa (tagai MF&F 107:23).

Folafolaga ma le Molimau

Na folafola mai e le Faaola, “Pe i lo’u lava leo po o i le leo o a’u auauna, ua tutusa lava” (MF&F 1:38). Tau ina ia tatou faalogo ma lagona ma gauai atu i upumoni e faavavau ua aoaoina e sui faatagaina o le Alii. A tatou faia lea mea, ou te folafola atu o le a faamausaliina lo tatou faatuatua i le Tama Faalelagi ma Iesu Keriso, ma o le a tatou mauaina le taitaiga faaleagaga ma le puipuiga mo o tatou tulaga patino ma manaoga.

Faatasi ai ma le malosi atoa o lou loto, ou te molimau atu o loo taitaia e le Keriso toetu ma soifua ia mataupu o Lana Ekalesia toefuataiina ma ola e ala i Ana auauna o e ua filifilia e molimau atu i Lona suafa. Ou te molimau atu ai i le suafa paia o Iesu Keriso, amene.