Epikopo Gérald Caussé

Epikopo Pulefaamalumalu

Sa faatulagaina pea e Gérald Caussé sana galuega i le pisinisi e faatauina meaai i Farani i le 33 o ona tausaga ae valaauina loa o ia e le peresitene o lana kamupani la te talanoa. Sa ia matauina le tautinoga faaleagaga a Gérald ma lona tomai e faia ai faamasinoga lelei ma le tuufaatasia o tagata faigaluega—o uiga na atiaeina e ala i gaoioiga, auaunaga, ma taitaiga i le Ekalesia. Na faaiuina e le peresitene o Gérald o se tagata e mafai ona ia faatuatuaina.

I lona ofo tele, e lei pine ae ua tuuina atu ia Gérald le tiutetauave o le puleaina o tagata faigaluega e toa 1,800. E oo atu i le taimi na valaauina ai o ia e auauna atu o se Fitugafulu i le Pulega Aoao i le 10 tausaga mulimuli ane, ia Aperila 2008, ua ia pulea le tele o kamupani e faatauina atu meaai.

O tomai faalepisinisi ma faalepulega a Epikopo Caussé, faatasi ai ma lana auaunaga faalelotu ma le poto masani faaletaitai, o le a matua fesoasoani tele ia te ia i le avea ai ma Epikopo Pulefaamalumalu fou a le Ekalesia. Sa auauna atu Epikopo Caussé o se Fesoasoani Muamua i le Au Epikopo Pulefaamalumalu talu mai Mati 2015, na mauaina lona valaauga fou i nai aso faatoa mavae le konafesi aoao ia Oketopa. Ua suitulaga o ia ia Elder Gary E. Stevenson, o le sa lagolagoina i le Korama a Aposetolo e Toasefululua i le aso 3 o Oketopa, 2015.

O Epikopo Gérald Jean Caussé, o le Epikopo Pulefaamalumalu lona 15 lea a le Ekalesia, sa soifua mai i Bordeaux, Farani, i le 1963. Na faaipoipo ia Valérie Babin i le 1986, i le Malumalu o Bern Suitiselani. E toalima o laua alo ma fanau a fanau e toalima.

E faaopoopo atu i lona aafiaga i le Au Epikopo Pulefaamalumalu ma o se tasi o Fitugafulu, sa ia auauna atu o se fesoasoani i le Au Peresitene o le Eria i Europa ma se Fitugafulu Eria, peresitene o se siteki, fesoasoani o se peresitene o se siteki, fesoasoani o le epikopo, taitai vaega a faitaulaga sili, ma se peresitene o le korama a toeaina.

A o talavou, sa maua e Epikopo Caussé le fiafia faapea foi ma le faatuatua e ala i lana auaunaga i le Ekalesia. Sa avea o ia ma ta piano a le Peraimeri i le 12 o ona tausaga ma peresitene o le Aoga Sa i le 16 o ona tausaga. Sa faatumauina foi lona pisi i tiute o le Perisitua Arona.

O le “Auauna atu i le Ekalesia,” e aofia ai le faatasi atu ma lona tama i ona tiute o se epikopo ma se peresitene o paranesi, “na fesoasoani ia te au i le mauaina o la’u molimau,” o lana tala lea.

Sa maua e Epikopo Caussé le faailoga o le matuaofaiva i mea tau pisinisi mai le Aoga Faapisinisi ESSEC i Farani i le 1987. A o lei amataina lana galuega, sa ia auauna atu i le Ea Fosi a Farani, lea sa tofia ai o ia i se vaega o le NATO.