E Manaomia i Se A Le Ekalesia?

Saunia e Elder D. Todd Christofferson

O Le Korama a Aposetolo e Toasefululua

E aoga le mapu ane ae mafaufau pe aisea ua filifili ai Iesu Keriso e faaaoga se ekalesia, Lana Ekalesia, e faatino Lana galuega ma le galuega a Lona Tama.

I lo’u olaga atoa, o konafesi aoao a le Ekalesia o ni meatutupu faaleagaga e nenee ai, ma o le Ekalesia lava ia o se nofoaga e iloa ai le Alii. Ua ou iloa e i ai i latou o e manatu ia i latou lava o tagata lolotu pe faaleagaga, ae tetee i le auai i se lotu pe tetee i le manaomia o sea faalapotopotoga. O faiga faalelotu mo latou o se mea e patino a’ia’i. Ae o le Ekalesia o le foafoaga a Ia o le o loo taulai i ai lo tatou faaleagaga—o Iesu Keriso lea. E aoga le mapu ane ae mafaufau pe aisea na Ia filifili ai e faaaoga se ekalesia, Lana Ekalesia, O Le Ekalesia a Iesu Keriso o le Au Paia o Aso e Gata Ai, e faatinoina Lana galuega ma le galuega a Lona Tama “ia aumaia le tino ola pea ma le ola e faavavau o le tagata.”¹

E amata ia Atamu, sa talai ai le talalelei a Iesu Keriso, ma sa faatautaia ai sauniga e tatau ai o le faaolataga, e pei o le papatisoga, e ala i se faatulagaga o le perisitua e faavae i le aiga.² Ina ua uluola tagata ma faateleina le lavelave atu nai lo na o aiga lautele, sa valaauina ai e le Atua isi perofeta, avefeau, ma aoao. I le taimi o Mose, tatou te faitau ai i se faatulagaga sili atu ona aloaia e aofia ai toeaina, faitaulaga, ma faamasino. I le talafaasolopito o le Tusi a Mamona, sa faavae ai e Alema se ekalesia i faitaulaga ma aoao.

Ona oo lea i le taulotoaiga o taimi, sa faatulagaina ai e Iesu Lana galuega i se auala ina ia mafai ai ona faatuina loa lava le talalelei i le tele o malo ma tagata eseese. O lena faalapotopotoga, o le Ekalesia a Iesu Keriso, na faavaeina i luga o “aposetolo ma perofeta, a o le maatulimanu o Iesu Keriso lava lea.”³ Sa aofia ai tofi faaopoopo e pei o fitugafulu, toeaina, epikopo, ositaulaga, aoao, ma tiakono. Na faapena foi ona faatuina e Iesu le Ekalesia i le Lalolagi i Sisifo ina ua mavae Lona Toetu.

Na sosoo ma le liliuese ma le malepelepe o le Ekalesia na Ia faatulagaina a o i ai i le lalolagi, na toefaatu ai e le Alii le Ekalesia a Iesu Keriso, e ala i le Perofeta o Iosefa Samita. O loo tumau pea le faamoemoega na i ai anamua: o lona uiga, o le talai atu o le tala fou o le talalelei a Iesu Keriso ma faatautaia ia sauniga o le faaolataga—i se isi faaupuga, ia aumaia tagata ia Keriso.⁴ Ma o lenei, e ala i tufugaaao o lenei Ekalesia toefuataiina, ua mafai nei ona maua le folafolaga o le togiola e oo lava i agaga o e ua maliliu o e sa iloa sina mea pe le iloa foi se mea e tasi e uiga i le alofa tunoa o le Faaola i o latou olaga faaletino.

E faapefea ona faataunuu e Lana Ekalesia ia faamoemoega o le Alii? E taua le iloa o le faamoemoega autu lava o le Atua o lo tatou alualu i luma. O Lona finagalo ia tatou faaauau pea “mai lea alofa tunoa i lea alofa tunoa, seia oo ina [tatou maua] se atoatoaga”⁵ o mea uma e mafai ona Ia foai mai. E manaomia ai mea e sili atu nai lo le na o na fia lelei pe lagona faaleagaga. E manaomia ai le faatuatua ia Iesu Keriso, salamo, papatisoga i le vai ma le Agaga, ma tumau i le faatuatua e oo i le iuga.⁶ E le mafai e se tasi ona ausia lenei mea na o ia lava, o lea, o se mafuaaga tele ua fai ai e le Alii se ekalesia, o le fatuina lea o se nuu o le Au Paia o le a lagolago ai e le tasi le isi i le “ala sa’o ma le vaapiapi lea e tau atu i le ola e faavavau.”⁷

“Na tuuina mai e [Keriso] nisi e fai ma aposetolo, o isi foi e fai ma perofeta, o isi foi e folafola le tala lelei, o isi foi e fai ma leoleo atoa ma aoao;

“… Latou te fai ai le galuega a auauna, ia atiina ae ai le tino o Keriso:

“Seia tatou oo atu o i tatou uma lava ma le loto gatasi ma i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso.”⁸

O Iesu Keriso o “le pogai ma le iuga o lo [tatou] faatuatua.”⁹ O le tuufaatasia o i tatou lava i le tino o Keriso—o le Ekalesia—o se vaega taua o le tauaveina o Lona suafa i o tatou luga.¹⁰ Ua ta’u mai ia i tatou faapea o le Ekalesia anamua sa “potopoto soo faatasi, e anapopogi ma tatalo, ma talatalanoa, o le tasi i le isi, e uiga i le manuia o o latou agaga”¹¹ “ma faalogologo i le afioga a le Alii.”¹² E faapena foi i le Ekalesia i ona po nei. E soofaatasi i le faatuatua, tatou te aoao atu ma faagaeetia e le tasi le isi ma taumafai e fesootai i le fuataga atoa o ni soo, “ia oo i le fua o le ua tatau ma le tumu o Keriso.” Tatou te taumafai e fesoasoani i le tasi ma le isi ia oo ina “iloa lelei o le Alo o le Atua,”¹³ seia oo i lena aso pe a latou “le toe aoao atu foi le tagata i le la te tuaoi, … e faapea atu, Ia outou iloa Ieova; aua e iloa a’u e i latou uma lava, o tagata nuu atoa ma alii, o loo fetalai mai ai Ieova.”¹⁴

I le Ekalesia e le gata ina tatou aoao ai aoaoga faavae paia; ae tatou te iloa ai foi lona faaaogaina. i le avea ai ma tino o Keriso, e feauauna ai ia tagata o le Ekalesia i le tulaga moni o le olaga i aso faisoo. O i tatou uma lava e le atoatoa; tatou te faatausuai atu ma tatou te tiga foi. E tele lava ina tatou tofotofoina le tasi ma le isi i o tatou uiga faaletagata tulaga ese. I le tino o Keriso, e tatau ona tatou faia isi mau mea nai lo le na o le aoao o manatu faavae ma upu faaeaea ma ia i ai ni aafiaga tatou te aofia patino ai a o tatou aoao e “nonofo faatasi i le alofa.”¹⁵

O lenei tapuaiga e le na o ia lava e popole i ai; ae ua valaauina i tatou uma e auauna atu. O i tatou o mata, lima, ulu, vae, ma isi itutino o le tino o Keriso, ma “e oo i na itutino … ia e foliga mai e sili ona augavaivai, e taua uma lava.”¹⁶ Tatou te manaomiaina nei valaauga, ma e manaomia ona tatou auauna atu.

O se tasi o alii i la’u uarota na ola ae e le gata e leai se lagolago faamatua, ae sa teena e matua lona toaga i le Lotu. Sa ia faia le matauga lea i se sauniga faamanatuga: “E le malamalama lo’u tama pe aisea e alu ai se tagata i le lotu ae le o e faasee i le kiona, ae ou te fiafia lava e alu i le lotu. I le Lotu, tatou te i ai uma i le malaga e tasi, ma e musuia atu i lena malaga e ni talavou malolosi, o tamaiti mama, ma mea ou te vaaia ma aoao mai i isi tagata matutua. Ua faamalosia atu i le mafutaga ma fiafia foi i le olioli ona o le ola ai i le talalelei.”

Ua faia e uarota ma paranesi o le Ekalesia se mafutaga faalevaiaso o se toomaga ma se faafouga, o se taimi e faataatia ese ai mea o le lalolagi—o le Sapati. O se aso e “te fiafia ai oe lava ia Ieova,”¹⁷ ia maua ai le faamalologa faaleagaga lea e sau mai le faamanatuga, ma mauaina le folafolaga toe faafou ia maua Lona Agaga e faatasi ma i tatou.¹⁸

O se tasi o faamanuiaga silisili o le avea o se itutino o le tino o Keriso, e ui atonu e le foliga mai o se faamanuiaga i le taimi nei, o le a’oa’ia lea ona o le agasala ma sese. Tatou te lolo e faagalogalo ma fetuutuunai o tatou sese, ma o nisi taimi ua na ona tatou le iloa po o fea e tatau ona tatou faaleleia po o le faapefea foi ona fai. A aunoa ma i latou e mafai ona a’oa’ia i tatou “e aoai atu i taimi e tatau ai ma le maatiati, pe a uunaia ai e le Agaga Paia,”¹⁹ atonu tatou te le maua le lototoa e suia ai ma mulimuli atili ai ma le atoatoa i le Matai. O le salamo o se mea mo tagata taitoatasi, ae o le faaaumea i lena mea o nisi taimi o se ala e tiga i le Ekalesia.²⁰

I lenei talanoaga o le Ekalesia o le tino o Keriso, e tatau ona tatou manatua mea e lua. Tasi, tatou te le taumafai ia liua i le Ekalesia a o Keriso ma Lana talalelei, o se liuaina e lagolagoina e le Ekalesia.²¹ Ua sili le faamatalaina e le Tusi a Mamona ina ua ia fai mai o le nuu “sa faaliliuina i latou i le Alii, ma e faatasia i le ekalesia a Keriso.”²² Lua, e tatau ona tatou manatua e faapea i le amataga, o le Ekalesia o le aiga lea, ma e oo lava i aso nei o ni faalapotopotoga eseese, o le aiga ma le Ekalesia e feauaunaai ma fefaamalosiai e le tasi le isi. E le suia e le tasi le isi, ma e mautinoa o le Ekalesia, e oo lava i lona tulaga sili, e le mafai ona suia ai matua. O le itu i le aoao atu o le talalelei ma sauniga o le perisitua e faatautaia e le Ekalesia ia agavaa ai aiga mo le ola e faavavau.

E i ai le mafuaaga taua lona lua e galue ai le Faaola e ala mai i se ekalesia, Lana Ekalesia, o le faataunuuina ai lea o mea e manaomia ia e le mafai ona faataunuuina e tagata taitoatasi po o ni vaega toaitiiti. O se tasi o faataitaiga manino o le taulimaina o le mativa. E moni i le avea ai ma tagata taitoatasi ma aiga, tatou te taulimaina ia manaoga o isi, “sa latou faasoa atu le tasi i le isi faaletino ma faaleagaga e tusa ma mea sa latou manaomia ma o latou manaoga.”²³ Ae au faatasi ai i le Ekalesia, e faateleina ai le gafatia e tausia e matitiva ma e le tagolima ina ia faafetaiaia ai se manaoga lautele, ma faamoemoe ai mo le ola tutoatasi ia tino moni mai mo le toatele.²⁴ E le gata i lea, o le Ekalesia, o ona Aualofa, ma ona korama o le perisitua ia maua le gafatia e tuuina atu le toomaga i le tele o tagata i le tele o atunuu e aafia i mala faalenatura, taua, ma sauaga.

A aunoa ma le tulaga tonu o gafatia o Lana Ekalesia, semanu e le mafai ona tino mai le poloaiga a le Faaola ia avatu le talalelei i le lalolagi uma.²⁵ Semanu e leai ni ki faaaposetolo, le faatulagaga, o puna o mea tautupe, ma le tuuto ma osigataulaga a le fia afe o faifeautalai o loo manaomia e faatino ai le galuega. Manatua, “o lenei Talalelei o le Malo [e tatau] ona talai atu i le lalolagi atoa, mo se molimau i atunuu uma, ona oo mai ai lea o le iuga.”²⁶

E mafai e le Ekalesia ona fauina ma faagaoioia ia malumalu, o maota o le Alii, lea e mafai ona faatautaia ai sauniga taua ma feagaiga. Na ta’ua e Iosefa Samita faapea o le faamoemoega o le Atua o le faapotopotoina o Lona nuu i soo se tupulaga o le “fauina lea i le Alii o se fale e [mafai] ai e Ia ona faaali mai i Lona nuu ia sauniga o Lona fale ma mamalu o Lona malo, ma aoao atu tagata i le ala o le faaolataga; aua e i ai ni sauniga patino ma mataupu faavae e faapea, pe a aoaoina atu ma ola ai, e tatau ona faia i se nofoaga po o se fale e fauina mo lena faamoemoe.”²⁷

Afai e talitonu se tasi e tau atu auala uma i le lagi pe faapea e leai ni mea patino e manaomia mo le faaolataga, o le a faapea o ia e le manaomia le folafola atu o le talalelei, e le manaomia foi ni sauniga ma ni feagaiga i le togiolaina o e ola po o e ua oti. Ae ua le na o tino ola pea o loo tatou talanoa ai ae faapea foi le ola e faavavau, ma ina ia taulau lena mea, o lea e taua ai le ala o le talalelei ma feagaiga o le talalelei. E manaomia foi e le Faaola se ekalesia ina ia maua ai na mea uma mo fanau uma a le Atua—o e ola ma e ua oti.

O le toe mafuaaga o le a ou ta’ua na afua ai ona faatuina e le Alii Lana Ekalesia—o le Ekalesia, e sili ona tulaga ese, o le malo o le Atua i le lalolagi.

Ina ua faatuina le Ekalesia a Iesu Keriso o le Au Paia o Aso e Gata Ai i le 1830, na fetalai atu le Alii i le Perofeta o Iosefa Samita, “Ia sii ae o outou loto ma olioli, ona ua tuu atu ia te outou le malo, pe i ni isi upu, ki o le ekalesia.”²⁸ I le pule o nei ki, ua faasaoina ai e tofi o le perisitua o le Ekalesia le mama a’ia’i o le aoaoga faavae a le Faaola ma le faamaoni a’ia’i o Ana sauniga faaola.²⁹ Latou te fesoasoani e saunia i latou o e mananao ia mauaina, faamasinoina tulaga e manaomia ma le agavaa o i latou e talosagaina, ona faatino ai lea.

Faatasi ai ma ki o le malo, e mafai ai e auauna a le Alii ona iloa le moni ma le pepelo, ma ua toe faaupu mai ma le pule, “O loo faapea ona fetalai mai o le Alii.” O le mea e faanoanoa ai, o nisi ua tetee i le Ekalesia ona ua latou mananao e auiliili la latou lava mau, ae o le upumoni o le “iloa lea o mea e pei ona i ai [moni], ma e pei ona sa i ai, ma e pei ona o le a oo mai”³⁰ i le tulaga e finagalo le Alii e faaali mai ai. E malupuipuia ma lolomiina e le Ekalesia faaaliga a le Atua—o tusitusiga faavae.

Ina ua faamatala e Tanielu le faalepo a le Tupu o Papelonia o Nepukanesa, ma faailoa atu i le tupu “mea o le a tutupu i aso amuli,”³¹ sa ia ta’u atu “[o le a] faatuina e le Atua o le lagi o le malo e le faaumatia e faavavau: o lea malo foi e le tuuina atu ia i se tasi nuu, na te tuimomomoina ma faaumatia [isi] malo uma lava, a o ia e tumau lava e faavavau.”³² O le Ekalesia o le malo lena na valoia i aso e gata ai e lei fausiaina e le tagata, ae na faatuina e le Atua o le lagi ma taavale atu ai e pei o se maa na tofi mai le mauga e aunoa ma ni lima e faatumu ai le lalolagi.³³

O lona taunuuga o le faatuina lea o Siona e saunia ai mo le toe foi mai ma le pule faameleniuma a Iesu Keriso. A o lei oo mai lena aso, e le o se malo i soo se itu faaupufai—e pei ona fetalai le Faaola, “E le mai iinei lo’u malo.”³⁴ Ae, o le punavai o Lana pule i le lalolagi, o le pule o Ana feagaiga paia, o le tausimea o Ona malumalu, o le leoleo ma le fofoga taumomoli o Lana upumoni, o le nofoaga o le faapotopotoina o Isaraelu, ma “o se puipuiga, ma … o se sulufaiga mai le afa, ma mai le toasa pe a sasaa mai e aunoa ma le suia i luga o le lalolagi atoa.”³⁵

Ou te faaiu atu i le augani ma le tatalo a le Perofeta:

“Valaau atu i le Alii, ina ia alu i luma lona malo i luga o le lalolagi, ina ia maua e e o nonofo ai, ma saunia mo aso o le a oo mai, lea o le a afio mai ai i lalo le Atalii o le Tagata o i le lagi, ua laei i le pupula o lona mamalu, e fetaia’i ma le malo o le Atua ua faatu i luga o le lalolagi.

“O le mea lea, ia alu i luma le malo o le Atua, ina ia oo mai le malo o le lagi, ina ia faamamaluina oe, le Atua e, i le lagi faapea foi i le lalolagi, ina ia faatoilaloina ou fili; ona e a oe le mamalu, mana ma le viiga, e faavavau, faavavau lava.”³⁶

I le suafa o Iesu Keriso, amene.