Elder Dale G. Renlund

Korama a Aposetolo e Toasefululua

Ina ua mavae le ofo tele i le amataga i le valaauina i le Korama a Aposetolo e Toasefululua, sa tootutuli Elder Dale G. Renlund ma lona faletua, o Ruta, i le tatalo e sailia le molimau faapea “na taitaia e le Atua lenei ala.”

Na sailia e Elder Renlund i le tele o taimi lena taitaiga—i le avea ai ma se Fitugafulu o le au Pulega Aoao, o se fomai fatu, ma o se tane ma se tamā. Ao ia galue ai o se fomai ua faauu o loo aoaoina i Maryland, ISA, mo se faataitaiga, sa maua lona faletua i le kanesa o totoga fanau. O le la tama teine, o Ashley, sa na o le 16 masina le matua. I na vaitaimi faigata, sa toefuatai mai lagona o Elder Renlund o le latalata atu i le Alii ina ua tuu atu e Ruta le faafetai i le Alii i le tatalo mo lo latou faamauga i le malumalu.

Sa faaaoga e Elder Renlund lana matata o se fomai fatu, e togafiti ai gasegase o faaletonu fatu. Sa ia vaaia le tele o gasegase o maliliu. Ae ina ua mavae le maliu o se gasegase e igoa ia Chad, na nutipalaina faalogoga taumamao mai lagona ootia sa faatumauina ia te ia i taimi o faalavelave i le avea ai ma se fomai tipitipi ina ua faatasi atu matua o Chad i totonu o le potu tigaina. I lena taimi na ia vaai atu ia Chad e ala i o laua mata.

O lenei aafiaga, o le tala lea a Elder Renlund, “ua ou iloaina nei i le Ekalesia, o le auauna atu ma le mataalia i isi, e tatau lava ona tatou vaai atu ia i latou mai se vaaiga faamatua, e ala atu i se vaaiga mai fofoga o le Tama Faalelagi. Ona faatoa mafai lea ona tatou amata ona malamalama i le taua moni o se agaga” (itulau 94).

Na fesoasoani foi le tulaga talavou ma auaunaga faale-Ekalesia o Elder Renlund e saunia ai o ia e vaai atu i isi e ala i fofoga o le Alii ma malamalama ai i tagata auai eseese o le Ekalesia.

Sa soifua mai Dale Renlund i le aso 13 o Novema, 1952, i tagata na faimalaga mai Suetena o e na malaga mai i Iuta ina ia faamauina i le malumalu. A o tamaitiiti Dale, sa siitia atu le aiga i Finelani ona toe foi lea i Suetena. Sa ia toe foi atu i Iuta ma lona aiga i le tolu tausaga mulimuli ane. I le 19 tausaga sa valaauina o ia e auauna atu i se misiona talai i Suetena.

I le 2009 na valaauina Elder Renlund e auauna atu o se Fitugafulu o le Pulega Aoao. O lona tofiga muamua o le Au Peresitene o le Eria o Aferika Sautesasae. Sa faaiuina e Elder Renlund lana galuega faalematata o se fomai tipitipi ma se polofesa, ae o lona toalua, o lana tala lea, “na faia le ositaulaga sili atu.” Na avea Ruta ma se peresitene o lana ofisa loia i le taimi na valaauina ai Elder Renlund ma sa tuua foi lana galuega. Ae talu lava ona la faaipoipo i le 1977, sa ia fai mai, sa avea lava (Ruta) ma “mea uma i” ma se punavai o le malosi tele ia te ia.

A o i ai i Aferika, sa “aoaoina [Elder ma Sister Renlund] e le Au Paia e uiga i mea e sili ona taua.” I se tasi taimi, i le Ripapelika Temokarasi o Congo, sa fesili atu ai Elder Renlund i tagata o le ekalesia po o a ni o latou luitau o i ai. Na ia manatua ina ua mavae ni feeuaiga, “sa tu i luga se tamalii matua ma fai mai, ‘Elder Renlund, e faapefea ona i ai ni o matou luitau? Ua ia i tatou le talalelei a Iesu Keriso.’” Na tomanatu Elder Renlund: “Ma te fia pei o na Au Paia Kananga. … E foliga mai e leai ni a latou oa, ae ua latou maua mea uma.”

I le faaiuga o lana saunoaga muamua i le avea ai ma se Aposetolo, na molimau mai ai Elder Renlund: “Ma lo’u loto atoa ou te manao e avea ma se soo moni a Iesu Keriso. Ou te alofa ia te Ia. Ou te faapelepele ia te Ia. Ou te molimau atu i Lona moni. Ou te molimau atu o Ia o Le ua Faauuina, o le Mesia” (itulau 94).